કોમનવેલ્થ-ઓલિમ્પિક માટે મોટેરામાં ડિમોલિશન ?

Narendra Modi Stadium Road AMC Demolition: અમદાવાદ શહેરમાં વધી રહેલા ટ્રાફિકના દબાણને ધ્યાનમાં રાખીને અમદાવાદ મ્યુનિસિપલ કોર્પોરેશન દ્વારા શહેરના મહત્વપૂર્ણ માર્ગોના વિસ્તરણનું કામ ઝડપી ગતિએ આગળ ધપાવવામાં આવી રહ્યું છે.આ જ અભિયાનના ભાગરૂપે નમો સ્ટેડિયમ (પૂર્વે મોટેરા સ્ટેડિયમ તરીકે ઓળખાતું) નજીક આવેલા 18 મીટર પહોળા રસ્તાને હવે 61 મીટર પહોળો બનાવવાની મહત્ત્વાકાંક્ષી યોજના અમલમાં મુકાઈ છે.આ પ્રોજેક્ટ માટે રસ્તાની બંને બાજુ આવેલા અનેક કોમર્શિયલ બાંધકામો અને અન્ય અવરોધરૂપ મિલકતો દૂર કરવાની કાર્યવાહી શરૂ કરવામાં આવી છે.આ કાર્યવાહીથી એક તરફ ટ્રાફિકની સમસ્યાનો લાંબા ગાળાનો ઉકેલ મળશે તો બીજી તરફ શહેરના પશ્ચિમ અને ઉત્તર વિસ્તારો વચ્ચેનું કનેક્ટિવિટી નેટવર્ક પણ વધુ મજબૂત બનશે. જોકે ડિમોલિશનને કારણે કેટલાક વેપારીઓ અને મિલકતધારકોમાં ચિંતા પણ જોવા મળી રહી છે.

કેમ જરૂરી બન્યું રસ્તાનું વિસ્તરણ?
નરેન્દ્ર મોદી સ્ટેડિયમ દેશ-વિદેશના મોટા ક્રિકેટ મુકાબલા, જાહેર કાર્યક્રમો અને અન્ય વિશાળ ઇવેન્ટ્સનું મુખ્ય કેન્દ્ર બની ગયું છે. મેચ અથવા મોટા કાર્યક્રમો દરમિયાન હજારો વાહનો એકસાથે પહોંચતા હોવાથી આસપાસના માર્ગો પર ભારે ટ્રાફિક જામ સર્જાય છે.હાલનો 18 મીટર પહોળો રસ્તો વધતા વાહનવ્યવહારને પહોંચી વળવામાં અસમર્થ બન્યો છે.તેથી AMC દ્વારા તેને 61 મીટર સુધી વિસ્તૃત કરવાનો નિર્ણય લેવામાં આવ્યો છે.

18 મીટરના રોડને 61 મીટર સુધી વિસ્તૃત કરાશે
મ્યુનિસિપલ કોર્પોરેશનના આયોજન મુજબ હાલનો આશરે 18 મીટર પહોળો માર્ગ આગામી સમયમાં 61 મીટર પહોળો બનાવવામાં આવશે. આ રોડ નરેન્દ્ર મોદી સ્ટેડિયમ તરફ જતો મુખ્ય માર્ગ હોવાથી મોટા આંતરરાષ્ટ્રીય રમતોત્સવો દરમિયાન ટ્રાફિક વ્યવસ્થાપન, વાહનવ્યવહાર અને મુલાકાતીઓની અવરજવર વધુ સરળ બને તે હેતુથી રોડનું વિસ્તરણ કરવામાં આવી રહ્યું છે.રોડલાઈનના અમલમાં અનેક કોમર્શિયલ અને કેટલીક રહેણાંક મિલકતો અસરગ્રસ્ત બનતી હોવા છતાં, હાલના તબક્કે માત્ર કોમર્શિયલ મિલકતો સામે જ કાર્યવાહી શરૂ કરવામાં આવી છે.

50થી વધુ કોમર્શિયલ મિલકતો તોડવાની કાર્યવાહી
સાબરમતી પોલીસના ચુસ્ત બંદોબસ્ત વચ્ચે જનપથ ત્રણ રસ્તાથી ડી-માર્ટ સુધીના રોડ પર આવેલી અંદાજે 50થી વધુ કોમર્શિયલ મિલકતોને તોડી પાડવાની કામગીરી શરૂ કરવામાં આવી છે. ડિમોલિશન દરમિયાન કોઈ અનિચ્છનીય બનાવ ન બને તે માટે પોલીસની વિશેષ વ્યવસ્થા પણ ગોઠવવામાં આવી હતી.AMCના અધિકારીઓના જણાવ્યા મુજબ, અસરગ્રસ્ત મિલકતધારકોને અગાઉથી નોટિસ આપી કાયદેસરની પ્રક્રિયા પૂર્ણ કરવામાં આવી હતી. ત્યારબાદ આજે રોડલાઈનના અમલ માટે સ્થળ પર કાર્યવાહી શરૂ કરવામાં આવી છે.

આ પ્રોજેક્ટ પૂર્ણ થયા બાદ શું થશે ?
ટ્રાફિકનું દબાણ નોંધપાત્ર રીતે ઘટશે.ઇમરજન્સી વાહનોની અવરજવર સરળ બનશે.નરેન્દ્ર મોદી સ્ટેડિયમ સુધી પહોંચવું વધુ સરળ બનશે.આસપાસના વિસ્તારોમાં મુસાફરીનો સમય ઘટશે.ડિમોલિશનની કાર્યવાહી શરૂ,રસ્તા વિસ્તરણ માટે જરૂરી જમીન ઉપલબ્ધ કરાવવા AMC દ્વારા ડિમોલિશનની કાર્યવાહી હાથ ધરવામાં આવી છે.અધિકારીઓની ટીમો, પોલીસ બંદોબસ્ત અને જરૂરી મશીનરી સાથે સ્થળ પર પહોંચી કાર્યવાહી શરૂ કરવામાં આવી.પ્રાથમિક તબક્કામાં રસ્તાની હદમાં આવતા કોમર્શિયલ બાંધકામો, દુકાનો, ઓફિસો અને અન્ય અવરોધરૂપ માળખાં દૂર કરવામાં આવી રહ્યા છે. સમગ્ર કાર્યવાહી દરમિયાન કાયદો અને વ્યવસ્થા જળવાઈ રહે તે માટે પોલીસનો ચુસ્ત બંદોબસ્ત ગોઠવવામાં આવ્યો છે.

હાલના રહેણાંક મિલકતને તોડવાનો નિર્ણય નથી
અધિકારીઓના જણાવ્યા પ્રમાણે હાલના તબક્કે કોઈ રહેણાંક મિલકતને તોડવાનો નિર્ણય લેવામાં આવ્યો નથી. ડી-માર્ટ બાદ આવેલા કેટલાક કોમર્શિયલ તેમજ રહેણાંક બિલ્ડિંગોને લઈને મામલો હાલમાં ગુજરાત હાઇકોર્ટમાં વિચારાધીન હોવાથી તે વિસ્તારમાં કોઈ ડિમોલિશન કરવામાં આવશે નહીં.આ ઉપરાંત રોડની સામે આવેલી ONGCની કચેરીને સ્થળાંતર કરવાની પ્રક્રિયા બાકી હોવાથી હાલ ત્યાં પણ કોઈ તોડફોડ કરવામાં આવશે નહીં. પરિણામે હાલ અંદાજે 500 મીટરના રોડ સ્ટ્રેચમાં આવતી મિલકતો પર જ કાર્યવાહી મર્યાદિત રાખવામાં આવી છે.

કોમનવેલ્થ, ઓલમ્પિકની તૈયારી માટે રોડ પહોળો કરાશે
કોમનવેલ્થ અને ઓલમ્પિકને ધ્યાનમાં રાખીને સાબરમતી જનપથ ત્રણ રસ્તાથી આથી નરેન્દ્ર મોદી સ્ટેડિયમ તરફ જતા રોડને પહોળો કરવાનો નિર્ણય લેવામાં આવ્યો છે. હયાત 18 મીટર રોડ છે જેને 61 મીટરનો કરવાનો છે.2030 ની કોમનવેલ્થ ગેમ્સને ધ્યાનમાં રાખીને મોટેરા વિસ્તારમાં રોડ અને ઈન્ફ્રાસ્ટ્રક્ચર વિકાસની કામગીરી પહેલેથી જ શરૂ થઈ ચૂકી છે. 

સ્થાનિકોને સૂચના
AMC દ્વારા લોકોને અપીલ કરવામાં આવી છે કે ડિમોલિશન અને રોડ વિસ્તરણની કામગીરી દરમિયાન શક્ય હોય ત્યાં સુધી વૈકલ્પિક માર્ગોનો ઉપયોગ કરે.ઉપરાંત કામગીરી વિસ્તારમાં અનાવશ્યક ભીડ ન કરવા પણ અપીલ કરવામાં આવી છે.શહેરના નિષ્ણાતોનું માનવું છે કે શરૂઆતમાં ડિમોલિશન અને બાંધકામને કારણે થોડી અસુવિધા થઈ શકે,પરંતુ લાંબા ગાળે આ પ્રોજેક્ટ અમદાવાદ માટે ખૂબ જ લાભદાયી સાબિત થશે.વિસ્તૃત માર્ગો માત્ર ટ્રાફિક સમસ્યાનો ઉકેલ જ નહીં આપે,પરંતુ ભવિષ્યના વાહનવ્યવહારને ધ્યાનમાં રાખીને શહેરને વધુ સુવ્યવસ્થિત બનાવવામાં પણ મદદરૂપ થશે.