ગુજરાતમાં 7700થી વધુ ખેડૂતોએ સિંચાઈ માટે સોલાર પંપ લગાવ્યા

પ્રધાનમંત્રી કુસુમ યોજના અંતર્ગત ખેડૂતોને સોલાર પંપ લગાવવા માટે આર્થિક સહાય આપવામાં આવે છે. ગુજરાતમાં ડિસેમ્બર 2024 સુધીમાં 7700થી વધુ ખેડૂતોએ ઓફગ્રીડ સોલાર પંપ લગાવ્યા છે. આ યોજના અંતર્ગત રાજ્ય સરકારે ખેડૂતોને ₹218 કરોડથી વધુની સબસિડી ચૂકવી છે. જેમાં અંદાજિત 70 ટકા રકમની સહાય આપવામાં આવે છે.

ખેતરોમાં સિંચાઈ માટે પાણી અને વીજળી નિયમિત મળી રહે અને સૂર્ય ઊર્જાનો ઉપયોગ થાય તે માટે વર્ષ 2019માં કેન્દ્ર સરકાર દ્વારા પ્રધાનમંત્રી કિસાન ઊર્જા સુરક્ષા અને ઉત્થાન મહાઅભિયાન (પી.એમ. કુસુમ) યોજના શરૂ કરવામાં આવી હતી. આ યોજનાનો લાભ લઈ અનેક ખેડૂતો પ્રદૂષણમુક્ત વીજળીનો ઉપયોગ કૃષિમાં કરી રહ્યા છે. કેન્દ્ર સરકાર દ્વારા માર્ચ 2026 સુધીમાં 12382 સ્ટેન્ડઅલોન ઓફ ગ્રીડ સોલાર પંપ સ્થાપિત કરવા ગુજરાત રાજ્યને મંજૂરી આપી હતી.  

સોલાર પંપ લગાવ્યા બાદ દિવસ દરમિયાન 8 થી 10 કલાક પંપ ચલાવવામાં આવે છે તેમાં કોઈ પણ જાતના વીજળીના સપ્લાયની જરૂર રહેતી નથી. આ પંપમાં પાંચ વર્ષ સુધી કોઈ નિભાવ ખર્ચ રહેતો નથી અને ખેતીમાં ઉપજ અને આવકમાં વધારો થાય છે. આ પંપ સૂર્ય ઊર્જાથી ચાલતો હોવાથી પ્રદૂષણ પણ થતું નથી.

આ યોજના અંતર્ગત નર્મદા જિલ્લામાં સૌથી વધારે 5100થી વધુ સોલાર પંપ સ્થાપિત લગાવવામાં આવ્યા છે. સોલાર પંપની સંખ્યાની દ્રષ્ટિએ ટોપ ટેન જિલ્લામાં નર્મદા બાદ વલસાડમાં 460થી વધુ, બનાસકાંઠામાં 450થી વધુ, ડાંગમાં 320થી વધુ, મહિસાગરમાં 260થી વધુ, ગીર સોમનાથમાં 220થી વધુ, છોટાઉદેપુરમાં 180થી વધુ, તાપીમાં 160થી વધુ, કચ્છમાં 130થી વધુ અને નવસારીમાં 100થી વધુ સોલાર પંપ લગાવવામાં આવ્યા છે.