જંગલેશ્વરના ખર્ચ મુદ્દે મેયરનો 24 કલાકમાં યુ-ટર્ન

Mayor's U-turn on Jungleshwar expenditure issue: રાજકોટના જંગલેશ્વરમાં થયેલી ડિમોલિશન કામગીરી બાદ ખર્ચનો વિવાદ વધુ વકર્યો છે. ખાણીપીણી, મંડપ, વીડિયોગ્રાફી અને પાણીના સપ્લાય સહિતના ખર્ચ અંગે સવાલો ઉઠ્યા બાદ મનપાની કામગીરી અને રેટ કોન્ટ્રાક્ટ પ્રણાલી પર અનેક પ્રશ્નો ઉભા થયા છે. ત્યારબાદ મેયરના બે અલગ-અલગ નિવેદનોથી સમગ્ર મામલો વધુ ચર્ચામાં આવ્યો છે.

પહેલા રિકવરીની વાત, પછી બદલાયું વલણ
પ્રારંભિક નિવેદનમાં મેયર નેહલ શુક્લએ જણાવ્યું હતું કે, ડિમોલિશન કામગીરી દરમિયાન કોઈને નિયમ કરતાં વધુ ચુકવણી થઈ હશે તો તેની તપાસ કરીને કાયદેસરની પ્રક્રિયા મુજબ રકમ વસૂલ કરવામાં આવશે. મનપાના નાણાંનો દુરુપયોગ સહન નહીં કરવામાં આવે તેવી ખાતરી આપવામાં આવી હતી.

આ નિવેદનના 24 કલાક બાદ એટલે કે બીજા જ દિવસે મેયરે સ્પષ્ટતા કરતાં જણાવ્યું કે, રેટ કોન્ટ્રાક્ટ હેઠળ કાયદેસર રીતે કરવામાં આવેલી ચૂકવણી પરત મેળવવી શક્ય નથી. તેમના જણાવ્યા મુજબ આ પ્રકારની ચૂકવણી મંજૂર કરાયેલા કરારના આધારે કરવામાં આવી હોવાથી તેમાં ફેરફાર કરી શકાય નહીં.

કમિશનરનું નિવેદન અલગ દિશામાં
બીજી તરફ, રાજકોટ મહાનગરપાલિકાના કમિશનર તુષાર સુમેરાએ જણાવ્યું કે, ડિમોલિશન કામગીરી સાથે સંબંધિત તમામ બિલોની વિગતવાર ચકાસણી કરવામાં આવશે. તપાસ દરમિયાન કોઈ ગેરરીતિ અથવા વધારાનો ખર્ચ સામે આવશે તો તે મુજબ આગળની કાર્યવાહી અને જરૂરી હોય ત્યાં રિકવરી કરવામાં આવશે. મેયર અને કમિશનરના નિવેદનોમાં વિરોધાભાસના કારણે આ મામલે વધુ સ્પષ્ટતા કરવાની માંગ ઉઠી રહી છે.

શું છે સમગ્ર મામલો?
જંગલેશ્વર ડિમોલિશન સમયના પાણીના 12 લાખના બિલ જાહેર કરતાં સમગ્ર મામલો બહાર આવ્યો હતો. પાણીના કોન્ટ્રાક્ટર ઉમિયા મંડપ સાથે રેઈટ કોન્ટ્રાકટ વર્ષ 2023નાં ઓગષ્ટ માસમાં થયો હતો. ઓગષ્ટ-2025માં કોન્ટ્રાકટ પૂરો થયો હોવા છતાં આચારસંહિતને લઈ નવો કોન્ટ્રાકટ નહીં થતાં કોન્ટ્રાક્ટરે નિયમ મુજબ ડિમોલિશન દરમિયાન પાણી સપ્લાય કર્યું હતું. જો કે વર્ષ 2023માં રેઈટ કોન્ટ્રાકટ થયો ત્યારે હાલના મેયર ડો નેહલ શુક્લ સ્ટેન્ડિંગ કમિટીનાં સભ્ય હતા. તે સમયે તેમણે કોન્ટ્રાકટનો વિરોધ શા માટે ન કર્યો તેવા સવાલ પણ હાલ ઉઠી રહ્યા છે.

રેટ કોન્ટ્રાક્ટની સમીક્ષા કરવાનો નિર્ણય
વિવાદ બાદ મહાનગરપાલિકાએ હાલના તમામ રેટ કોન્ટ્રાક્ટની સમીક્ષા કરવાનો નિર્ણય લીધો છે. જો કોઈ નવી એજન્સી ઓછી કિંમતે સેવા આપવા તૈયાર હશે તો જૂનો કરાર સમાપ્ત કરીને નવી એજન્સી સાથે કરાર કરવાની પ્રક્રિયા હાથ ધરાશે. જો કે, જે કોન્ટ્રાક્ટ પૂર્ણ થઈ ચૂક્યા છે તેના નવા ટેન્ડર સમયસર બહાર પાડવા માટે પણ સંબંધિત વિભાગોને સૂચનાઓ આપવામાં આવી છે. જેથી ભવિષ્યમાં આવા વિવાદો ટાળી શકાય.