ચાંદખેડાના પેલેડિયમ બિઝનેસ હબમાં આગ

અમદાવાદ શહેરના ચાંદખેડા વિસ્તારમાં ન્યૂ સી. જી. રોડ પર સ્થિત પેલેડિયમ બિઝનેસ હબમાં આગ લાગવાની મોટી ઘટના બની હતી. વિસત ગાંધીનગર હાઈવે પર 4D મોલની સામે આવેલા આ કોમ્પ્લેક્સના બીજા માળે આ બનાવ બન્યો હતો, જેના પગલે ચારેય તરફ આગના ગોટેગોટા દેખાતા આસપાસના લોકોમાં ભયનો માહોલ સર્જાયો હતો. આ ઘટનાની જાણ થતાં જ તાત્કાલિક ફાયર વિભાગને માહિતી આપવામાં આવી હતી અને સદનસીબે, કોઈ મોટી જાનહાનિ ન થાય તે માટે તકેદારીના ભાગરૂપે આખી બિલ્ડિંગને તાત્કાલિક ખાલી કરાવી દેવામાં આવી હતી.

ફાયર વિભાગની 5 ગાડીઓ દ્વારા રેસ્ક્યુ

પેલેડિયમ બિઝનેસ હબના બીજા માળ પર આગ લાગવાની માહિતી મળતા જ ફાયર વિભાગની કુલ 5 ગાડીઓ તાત્કાલિક ઘટના સ્થળે પહોંચી હતી. ફાયર વિભાગના જવાનોએ યુદ્ધના ધોરણે આગ બૂઝાવવાની અને રેસ્ક્યુની કામગીરી હાથ ધરી હતી. લગભગ 2 કલાકની ભારે જહેમત અને પાણીનો મારો ચલાવ્યા બાદ આ ભીષણ આગ પર કાબૂ મેળવી લેવાયો હતો. રાહતની વાત એ છે કે, આ ઘટનામાં કોઈ જાનહાનિ થઈ હોવાના કે કોઈ વ્યક્તિ અંદર ફસાયું હોવાના કોઈ અહેવાલ નથી, જેનાથી મોટી દુર્ઘટના ટળી છે.

આ પણ વાંચો: કારની ટક્કર બાદ કારમાં આગ લાગતા 5ના થયા મોત

વેપારીને મોટું નુકસાન, માલ-સામાન બળીને ખાક

આગ લાગવાની આ ઘટના પેલેડિયમ બિઝનેસ હબના બીજા માળે આવેલા એક શોરૂમમાં બની હતી. આગ લાગવાથી શોરૂમમાં રહેલો માલ-સામાન સંપૂર્ણપણે બળીને ખાક થઈ ગયો હતો. જેના કારણે શોરૂમના વેપારીને મોટું નુકસાન વેઠવાનો વારો આવ્યો છે. જોકે, આગનું ચોક્કસ કારણ હજી જાણી શકાયું નથી, પરંતુ શોર્ટ સર્કિટ જેવા કારણોની આશંકા સેવાઈ રહી છે. આ ઘટનાએ ફરી એકવાર વ્યાપારી ઈમારતોમાં ફાયર સેફ્ટીની યોગ્ય વ્યવસ્થા અને સમયાંતરે ચેકિંગની જરૂરિયાત પર ભાર મૂક્યો છે.