Gandhinagar : ગુજરાતમાં સ્ટેમ્પ ડ્યુટીના નિયમોમાં મોટો ફેરફાર, પ્રજાને મળશે રાહત...

ગુજરાતના CM ભૂપેન્દ્ર પટેલે રાજ્યમાં સ્ટેમ્પ ડ્યુટી એક્ટના અમલમાં વધુ સરળતા લાવવા માટે કેટલાક મહત્વપૂર્ણ નિર્ણયો લીધા છે. આ નિર્ણયોનો મુખ્ય ઉદ્દેશ સામાન્ય નાગરિકો અને મિલકતધારકોને રાહત આપવાનો છે. રાજ્ય સરકારના મહેસૂલ વિભાગે ગુજરાત સ્ટેમ્પ અધિનિયમની ઘણી જોગવાઈઓમાં સુધારા કર્યા છે, જે આગામી તા. 10 મી એપ્રિલ, 2025 થી અમલમાં આવશે. આ સુધારાઓમાં મુખ્યત્વે પ્રજાલક્ષી દરોમાં ઘટાડો, વહીવટી સરળતા અને સુગમતા વધારવા પર ધ્યાન કેન્દ્રિત કરવામાં આવ્યું છે. 

મહેસૂલ વિભાગ દ્વારા કરવામાં આવેલા મુખ્ય સુધારાઓ નીચે મુજબ છે...

વડીલોપાર્જિત મિલકતમાં હક્ક કમી...

હવેથી વડીલોપાર્જિત મિલકતના કિસ્સામાં અવસાન પામેલ પુત્રીના વારસદારો દ્વારા કરવામાં આવતા હક્ક કમીના ડોક્યુમેન્ટ માત્ર રૂ. 200 ની સ્ટેમ્પ ડ્યુટી ભરીને કરી શકાશે. આ નિર્ણયથી અનેક પરિવારોને આર્થિક રાહત મળશે.

લોન પર સ્ટેમ્પ ડ્યુટી...

રૂ. 1 કરોડ સુધીની લોનની રકમ પર હવે મહત્તમ રૂ. 5,000 ની મર્યાદામાં જ સ્ટેમ્પ ડ્યુટી ભરવાની રહેશે. આનાથી નાના લોન લેનારાઓને ફાયદો થશે.

વધારાની જામીનગીરી...

જો કોઈ લોન માટે વધારાની જામીનગીરી આપવામાં આવે તો તેના પર હવે ફિક્સ રૂ. 5,000 ની સ્ટેમ્પ ડ્યુટી લાગશે.

મોટી લોન પર ડ્યુટીમાં વધારો...

રૂ. 10 કરોડથી વધુની લોન પરના ગીરોખત/હાઇપોથીકેશન ડોક્યુમેન્ટ પરની મહત્તમ ડ્યુટી રૂ. 8,00,000 થી વધારીને રૂ. 15,00,000 કરવામાં આવી છે. જો કે, એકથી વધુ બેંકો પાસેથી લોન લેવામાં આવે તો સરચાર્જ સિવાય મહત્તમ રૂ. 75,00,000 સુધીની ડ્યુટી ભરવાની રહેશે.

ઓછી સ્ટેમ્પ ડ્યુટી ભરવા પર દંડ...

જો કોઈ અરજદાર સામેથી ઓછી સ્ટેમ્પ ડ્યુટી ભરવા આવે તો ડોક્યુમેન્ટની તારીખથી માસિક 2 ટકાના દરે, પરંતુ ખૂટતી ડ્યુટીના ચાર ગણા સુધી દંડ વસૂલવામાં આવશે. જો તંત્ર દ્વારા ચોરી પકડાય તો માસિક 3 ટકાના દરે, પરંતુ મહત્તમ 6 ગણી સુધી દંડ વસૂલ કરાશે.

આ પણ વાંચો : Vadodara : સત્તાના મદમાં મતદારો પર દાદાગીરી!, Video Viral

ભાડાપટ્ટા પર ડ્યુટી...

એક વર્ષથી ઓછા સમયના ભાડાપટ્ટા પર હવે રહેણાંક માટે ફિક્સ રૂ. 500 અને વાણિજ્ય માટે રૂ. 1,000 ની ડ્યુટી ભરવાની રહેશે, જે પહેલાં સરેરાશ વાર્ષિક ભાડાના 1% હતી.

બેંકોની જવાબદારી...

ગીરોખતના કિસ્સામાં જો બેંકો/નાણાંકીય સંસ્થાઓ સ્ટેમ્પ ડ્યુટી નહીં ભરે તો તેની જવાબદારી તેમની રહેશે.

આ પણ વાંચો : Gandhinagar : જમીન સંબંધિત વહીવટી પ્રક્રિયા હવે વધુ સરળ, જાણો નવા સુધારા શું છે?

નકલ પર ડ્યુટી...

અસલ ડોક્યુમેન્ટની ગેરહાજરીમાં ઓછી સ્ટેમ્પ ડ્યુટી ભરાઈ હોય તો તેની નકલ પર પણ ડ્યુટી વસૂલ કરી શકાશે.

આ સુધારાઓથી ઉદ્યોગકારો અને હોમ લોન લેનારાઓને નાણાકીય બોજમાં ઘટાડો થશે. વડીલોપાર્જિત મિલકતના હક્ક કમીના પ્રશ્નોનું નિવારણ થશે અને કાયદાકીય કાર્યવાહીમાં પણ ઘટાડો આવશે. CM ના આ પ્રજાલક્ષી નિર્ણયોથી સામાન્ય નાગરિકોને ઘણી રાહત મળશે અને સ્ટેમ્પ ડ્યુટીની પ્રક્રિયા વધુ સરળ બનશે. આ નવા નિયમો આગામી 10 મી એપ્રિલથી સમગ્ર રાજ્યમાં અમલમાં આવશે.

આપ અમારી WhatsApp ચેનલ સાથે પણ જોડાઇ શકો છો