Surat : અનુરાગ કશ્યપ ફરી વિવાદમાં, બ્રાહ્મણ સમાજની લાગણી દુભાવવાનો આક્ષેપ; પોલીસ ફરિયાદની તજવીજ!

સુરત (Surat) નગરી ફરી એકવાર વિવાદના વમળમાં સપડાઈ છે, આ વખતે કેન્દ્રસ્થાને છે જાણીતા ફિલ્મ સર્જક અનુરાગ કશ્યપ. તેમના પર બ્રાહ્મણ સમાજને લક્ષ્ય બનાવીને નિંદાજનક ટિપ્પણી કરવાનો ગંભીર આરોપ મૂકવામાં આવ્યો છે. શહેરના એક જાગૃત નાગરિક અને વેપારી ભગવતીપ્રસાદ દુબેએ સુરત (Surat) પોલીસ કમિશનર તેમજ સલાબતપુરા પોલીસ મથકમાં લેખિત અરજી કરીને કશ્યપ વિરુદ્ધ કાયદેસરની કાર્યવાહી કરવાની પ્રબળ માંગણી કરી છે.

સોશિયલ મીડિયાના માધ્યમથી ભડકેલી આગ...

અરજદારના નિવેદન અનુસાર, અનુરાગ કશ્યપે પોતાની ઇન્સ્ટાગ્રામ પોસ્ટમાં બ્રાહ્મણ સમુદાય માટે અત્યંત તિરસ્કારપૂર્ણ ભાષાનો પ્રયોગ કર્યો હતો. દુબેએ આ ઘટનાની ગંભીરતા વર્ણવતા કહ્યું કે, "આ પોસ્ટમાં વપરાયેલા અભદ્ર શબ્દો ફક્ત અશોભનીય નથી, પરંતુ તે બ્રાહ્મણ સમાજના હૃદયને ઊંડી વેદના પહોંચાડે છે. આવાં નિવેદનો સમાજમાં વેરભાવ અને જાતિગત દુશ્મનાવટને ઉત્તેજન આપવાનું દુષ્કૃત્ય કરે છે."

નવા કાયદા હેઠળ કડક કાર્યવાહીની અપેક્ષા...

દુબેએ પોતાની ફરિયાદમાં અનુરાગ કશ્યપ સામે ભારતીય ન્યાય સંહિતા (IPC 2023) ની કલમ 196 (ખોટી માહિતી ફેલાવી), 197 (બદનક્ષી), અને 351 થી 356 (આક્ષેપજનક કૃત્યો, દુર્ભાવનાપૂર્ણ પ્રવૃત્તિઓ) હેઠળ ગુનો દાખલ કરવાની જોરદાર અપીલ કરી છે. આ સિવાય ગાંધીનગરમાં પણ ફરિયાદ કરવામાં આવી છે. 

પૂર્વના વિવાદાસ્પદ ઇતિહાસનો પડઘો...

અરજદારે કશ્યપના ભૂતકાળના વિવાદાસ્પદ નિવેદનો અને તેમની ફિલ્મોમાં અમુક ચોક્કસ સમુદાયોને નિશાન બનાવવાની વૃત્તિનો પણ ઉલ્લેખ કર્યો છે. તેમનું માનવું છે કે, કશ્યપ વારંવાર સમાનતા અને અભિવ્યક્તિની સ્વતંત્રતાના નામે સમાજના સંવેદનશીલ વર્ગોને બદનામ કરવાનું કાવતરું ઘડી રહ્યા છે.