પતંગ હોટેલના માલિક ઉમંગ ઠક્કરની સુરતમાં ધરપકડ

Kamrej Land Scam: સુરત જિલ્લાના કામરેજ વિસ્તારમાં જમીન અને પ્લોટના વેચાણના નામે નાગરિકો સાથે લાખો-કરોડો રૂપિયાની છેતરપિંડી આચરવાના પ્રકરણમાં કામરેજ પોલીસે એક મોટી કાર્યવાહી હાથ ધરી છે. અમદાવાદની પ્રખ્યાત પતંગ હોટેલના માલિક ઉમંગ હરીભાઈ ઠક્કરની ધરપકડ કરીને તેને જેલના હવાલે કરવામાં આવ્યો છે. આરોપી દ્વારા કોઈ પણ પ્રકારની સત્તાવાર મંજૂરી કે ટાઇટલ ક્લિયર વગર ખોટા પ્રોજેક્ટના બહાને સામાન્ય નાગરિકોને વિશ્વાસમાં લઈને આ વિશાળ કૌભાંડ આચરવામાં આવ્યું હોવાનું પોલીસ તપાસમાં સ્પષ્ટ થયું છે.

ટાઇટલ ક્લિયર ન હોવા છતાં શરૂ કર્યો 'સહજાનંદ નિર્વાણા' પ્રોજેક્ટ
કામરેજ પોલીસ સ્ટેશનમાં એપ્રિલ 2026 માં નોંધાયેલા ગુના અનુસાર, આરોપી ઉમંગ ઠક્કરે કામરેજના ખોલવડ ગામમાં 'સહજાનંદ નિર્વાણા' નામથી એક પ્લોટિંગ પ્રોજેક્ટ શરૂ કર્યો હતો. હકીકતમાં, જે જમીન પર આ પ્રોજેક્ટનું માર્કેટિંગ કરવામાં આવી રહ્યું હતું, તે જમીન વર્ષ 2018 માં જ અન્ય વ્યક્તિને વેચાઈ ચૂકી હતી. જમીનનું ટાઇટલ બિલકુલ ક્લિયર ન હોવા છતાં આરોપીએ ખુલ્લા પ્લોટના વેચાણ અને બુકિંગના નામે ભોળા નાગરિકોને ગેરમાર્ગે દોરવાનું શરૂ કર્યું હતું.

15 થી વધુ લોકો પાસેથી ₹1.56 કરોડની મસમોટી ઉઘરાણી
પોલીસ તપાસમાં બહાર આવ્યું છે કે આરોપીએ 15 થી વધુ રોકાણકારો અને ફરિયાદીઓને સસ્તા પ્લોટ આપવાના મોટા વાયદા કરીને તેમની પાસેથી કુલ ₹1 કરોડ 56 લાખ જેટલી માતબર રકમ વસૂલી લીધી હતી. નાણાં પડાવ્યા બાદ ન તો ફરિયાદીઓને પ્લોટની ફાળવણી કરવામાં આવી અને ન તો તેમના નાણાં પરત આપવામાં આવ્યા. લાંબા સમય સુધી વચનોની આશામાં બેઠા રહ્યા બાદ આખરે ભોગ બનનારાઓએ પોલીસ સ્ટેશનનો આશરો લઈ ન્યાયની ગુહાર લગાવી હતી.

RERA મંજૂરીનો અભાવ, પહેલેથી જ કોર્ટમાં ચાલતો વિવાદ
કામરેજ તાલુકાના ખોલવડ વિસ્તારમાં વર્ષ 2025 માં આ પ્રોજેક્ટનું આક્રમક માર્કેટિંગ શરૂ કરવામાં આવ્યું હતું. આકર્ષક બેનરો, અખબારી જાહેરાતો અને સેલ્સ ટીમ મારફતે લોકોને આકર્ષવામાં આવ્યા હતા. આ પ્રોજેક્ટ પાસે કોઈ પણ પ્રકારની RERA ની મંજૂરી નહોતી અને જમીનનો વિવાદ અગાઉથી જ કોર્ટમાં પેન્ડિંગ હતો. આમ છતાં, ખરીદદારો પાસેથી હપ્તા અને રોકડ સ્વરૂપે નાણાં સ્વીકારવામાં આવ્યા હતા.

ઉમંગ ઠક્કર સહિત 3 આરોપીઓ સામે એફઆઈઆર
આ કેસમાં કડક પગલાં લેતા કામરેજ પોલીસ સ્ટેશનમાં 2 મે 2026 ના રોજ છેતરપિંડી, વિશ્વાસઘાત અને ફોજદારી કાવતરાની કલમો હેઠળ એફઆઈઆર (FIR) નોંધવામાં આવી હતી. આ ગુનામાં ઉમંગ ઠક્કર ઉપરાંત નીલ ઠક્કર અને કાંતા ઠક્કર સહિત કુલ ૩ આરોપીઓના નામ સામેલ કરવામાં આવ્યા હતા.

પોલીસની કડક કાર્યવાહી
કામરેજ પોલીસ સ્ટેશનના પી.આઈ. આર.બી. ગોજિયાના જણાવ્યા અનુસાર, આરોપી લાંબા સમયથી પોતાની પહોંચનો ઉપયોગ કરીને બચવાનો પ્રયાસ કરી રહ્યો હતો, પરંતુ પોલીસે તેને આખરે ઝડપી લીધો છે. બી.એન.એસ. (BNS) ની કલમ 316 અને 318 હેઠળ નોંધાયેલા આ ગુનામાં આરોપીની ધરપકડ કરી વધુ પૂછપરછ શરૂ કરવામાં આવી છે. પોલીસ તપાસમાં આગામી દિવસોમાં આ કૌભાંડ અંગે વધુ ચોંકાવનારા ખુલાસા થવાની પૂરી સંભાવના છે.