હર્ષદ રીબડિયાએ અરજી પરત ખેંચતા વિસાવદર વિધાનસભાની પેટાચૂંટણીનો માર્ગ મોકળો

પૂર્વ ધારાસભ્ય હર્ષદ રીબડિયાએ હાઈકોર્ટમાંથી અરજી પરત ખેંચી લેતાં વિસાવદર વિધાનસભાની પેટા ચૂંટણીનો માર્ગ મોકળો થયો છે. આમ આદમી પાર્ટીના ભૂપત ભાયાણીની જીતને હર્ષદ રીબડિયાએ પડકારી હતી. ત્યારબાદ ભૂપત ભાયાણીએ ધારાસભ્ય તરીકે રાજીનામું આપતા બેઠક ખાલી પડી હતી. હાઈકોર્ટમાં અરજી પેન્ડિંગ હોવાથી પેટા ચૂંટણી થઈ શકી ન હતી. હવે અરજી પરત ખેંચવામાં આવતા પેટાચૂંટણી યોજવાનો માર્ગ મોકળો થયો છે. વિસાવદર વિધાનસભાની સાથે આગામી જુલાઈ મહિનામાં કડી વિધાનસભાની પેટા ચૂંટણી થવાની સંભાવના છે.

વર્ષ 2022ની વિધાનસભા ચૂંટણીમાં વિસાવદર બેઠક પર ભાજપના ઉમેદવાર તરીકે ચૂંટણી લડી હર્ષદ રીબડિયાએ ચૂંટણી હારી ગયા હતા. પરિણામ બાદ ભૂપત ભાયાણીની જીતને રીબડિયાએ હાઈકોર્ટમાં પડકારી હતી. ત્યારબાદ ભૂપત ભાયાણીએ આપના ધારાસભ્ય તરીકે રાજીનામુ આપીને ભાજપમાં જોડાઈ જતાં વિસાવદર બેઠક ખાલી પડી હતી.

લોકસભાની ચૂંટણી વખતે વિસાવદર બેઠક ખાલી હોવા છતાં હર્ષદ રીબડિયાની ઇલેક્શન પિટિશનના પેટા ચૂંટણી થઈ શકી નહોતી. હર્ષદ રીબડિયાએ મંગળવારે હાઈકોર્ટમાંથી અરજી પરત ખેંચી લેતા વિસાવદર વિધાનસભા બેઠકની પેટાચૂંટણીનો માર્ગ મોકળો થયો છે. બે દિવસ પહેલાં પૂર્વ ધારાસભ્ય હર્ષદ રીબડિયાએ પિટિશન પરત ખેંચવા અરજી કરી હતી. મંગળવારે સુનાવણી પૂર્ણ થતા હાઇકોર્ટે ચૂંટણી પીટીશન પર અંતિમ નિર્ણય જાહેર કર્યો છે.

ભાજપના ઉમેદવાર તરીકે કોઈ એક પક્ષપલટુની પસંદગીની શક્યતા

વિસાવદર વિધાનસભા બેઠક પર વર્ષ 2012 અને 2017માં હર્ષદ રીબડિયા કોંગ્રેસના ઉમેદવાર તરીકે જીત્યા હતા. વર્ષ 2022ની ચૂંટણી પહેલાં હર્ષદ રીબડિયા કોંગ્રેસમાંથી રાજીનામુ આપી ભાજપમાં જોડાઈ ગયા હતા. વર્ષ 2022ની ચૂંટણીમાં કોંગ્રેસમાંથી આવેલા હર્ષદ રીબડિયાને ભાજપે ટિકિટ આપતા મતદારોએ ભાજપ અને કોંગ્રેસના ઉમેદવારોને નકારીને આમ આદમી પાર્ટીના ભૂપત ભાયાણીને જીતાડ્યા હતા. હવે ભૂપત ભાયાણી પણ આમ આદમી પાર્ટીના ધારાસભ્ય તરીકે રાજીનામુ આપી ભાજપમાં જોડાઈ ગયા છે. આગામી સમયમાં યોજાનારી વિસાવદર બેઠકની પેટાચૂંટણીમાં કોંગ્રેસમાંથી આવેલા હર્ષદ રીબડિયા કે આમ આદમી પાર્ટીમાંથી આવેલા ભૂપત ભાયાણીમાંથી કોની પસંદગી કરે જે જોવાનું રહે છે. વિસાવદરની બેઠક પર ભાજપના કાર્યકર નહી પણ કોંગ્રેસ અને આપમાંથી આવેલા પક્ષપલટુ નેતાની પસંદગી થાય તેવી શક્યતા છે.

વિસાવદર બેઠક પર ત્રિપાંખિયો જંગ ખેલાવાની સંભાવના

લોકસભા ચૂંટણી બાદ હરિયાણા અને મહારાષ્ટ્રની ચૂંટણીમાં ઈન્ડિયા ગઠબંધન વિખેરાઈ ગયુ છે. જ્યારે સ્થાનિક સ્વરાજની ચૂંટણીમાં કોંગ્રેસ અને આમ આદમી પાર્ટીનું ગઠબંધન થયું નહોતું. વર્ષ 2022ની વિધાનસભા ચૂંટણીમાં આ બેઠક આમ આદમી પાર્ટી જીતી ગઈ હતી. તેથી આમ આદમી પાર્ટી પોતાનો ઉમેદવાર ઉભો રાખે તેવી શક્યતા છે. બીજી તરફ કોંગ્રેસ પરંપરાગત બેઠકને ફરી એક વખત જીતવા માટે ચૂંટણી મેદાનમાં ચોક્કસ જોવા મળશે. તેથી વિસાવદર બેઠક પર ભાજપ, કોંગ્રેસ અને આમ આદમી પાર્ટી વચ્ચે ત્રિપાંખિયો જંગ ખેલાય તેવી શક્યતા છે.

વિસાવદર સાથે કડી વિધાનસભા બેઠકની પેટા ચૂંટણી યોજાશે

કડીના ભાજપના ધારાસભ્ય કરશન સોલંકીનું તાજેતરમાં અવસાન થતાં બેઠક ખાલી પડી છે. તેથી વિસાવદર સાથે કડી વિધાનસભાની પેટા ચૂંટણી યોજાશે. કડી વિધાનસભા બેઠક ભાજપ માટે મહત્વપૂર્ણ છે. અનુસૂચિત જાતિના ઉમેદવાર માટે અનામત કડી વિધાનસભા બેઠક પર વર્ષ 2017 અને 2022ની વિધાનસભા ચૂંટણીમાં ભાજપના કરશન સોલંકી વિજયી બન્યા હતા.

પૂર્વ નાયબ મુખ્યમંત્રી નીતિન પટેલનું કદ નક્કી કરશે પેટા ચૂંટણી

કડી બેઠક સામાન્ય હતી તે સમયે 1990 થી 2007(2002 સિવાય) સુધી તમામ ચૂંટણી નીતિન પટેલ જીત્યા હતા. વર્ષ 2012ના નવા સીમાંકન બાદ કડી બેઠક અનુસૂચિત જાતિના ઉમેદવાર માટે અનામત જાહેર કરાઈ છે. જો કે, કડી બેઠક પર નીતિન પટેલનો દબદબો રહ્યો છે. વર્ષ 2022ની વિધાનસભા ચૂંટણી સમયે નીતિન પટેલને સાઈડલાઈન કરી કદ પ્રમાણે વેતરી નાખવામાં આવ્યા હતા. ત્યારબાદ દરેક ચૂંટણીમાં નીતિન પટેલે પોતાનો દબદબો યથાવત રાખવા પ્રયાસ કર્યા હતા. પરંતુ પ્રદેશ ભાજપના નેતાઓએ કરશન સોલંકી જૂથને મહત્વ આપ્યુ હતુ. તેથી નીતિન પટેલ અને કરશન સોલંકીના જૂથ આમને સામને આવી ગયા હતા. હવે કરશન સોલંકી રહ્યા નથી તેવા સમયે આગામી પેટા ચૂંટણી નીતિન પટેલનું કદ નક્કી કરે તેવી કાર્યકરોમાં ચર્ચા થઈ રહી છે.

રાજકીય રીતે કડી અને વિસાવદરની મહત્વપૂર્ણ પેટા ચૂંટણી

કડી અને વિસાવદરની પેટાચૂંટણીઓ ગુજરાતના રાજકીય માહોલને પ્રભાવિત કરી શકે છે. વિસાવદરમાં ભાજપે પોતાનું પ્રભુત્વ પાછું મેળવવા અત્યારથી પ્રયાસો હાથ ધર્યા છે. જ્યારે ‘આપ’ અને કોંગ્રેસ પોતાની ગોઠવણી કરવામાં વ્યસ્ત રહેશે. ત્યારે સ્થાનિક સ્વરાજની ચૂંટણી બાદ હવે બંને બેઠકની પેટાચૂંટણી ત્રણેય રાજકીય પક્ષો માટે મહત્વપૂર્ણ સાબિત થશે.