કાયદાના સકંજામાં IAS Pradeep Sharma, કચ્છ જમીન ફાળવણીમાં પાંચ વર્ષની સજા

કચ્છ જિલ્લાના પૂર્વ કલેક્ટર અને IAS અધિકારી પ્રદીપ શર્મા (Pradeep Sharma)ને પાંચ વર્ષની સજા અને દસ હજાર રૂપિયાનો દંડ ફટકારવામાં આવ્યો છે. આ કેસમાં અન્ય ત્રણ આરોપીઓ - નટુભાઈ મોતીભાઈ દેસાઈ, નરેશ પોપટલાલ પટેલ અને અતિસિંહ મહિપતસિંહ ઝાલાને પણ સજા થઈ છે.

શું છે સમગ્ર મામલો?

ફરિયાદી કંપની શ્રી સોલ પાઈપ્સ લિમિટેડે મોસમાઘોઘા, તાલુકો જેતપુરની સીમમાં આવેલી સરકારી જમીનને ઔદ્યોગિક ઉપયોગ માટે ફાળવવા માટે અરજી કરી હતી. તત્કાલીન જિલ્લા કલેક્ટરે સરકારના તારીખ 06/06/2003 અને 27/11/2000 ના આદેશ અનુસાર 15,00,000 રૂપિયા સુધીની કિંમતની જમીનને મંજૂરી આપવાની સત્તા ધરાવતા હતા.

પરંતુ, તેમ છતાં આરોપી નંબર 1 (તત્કાલીન જિલ્લા કલેક્ટર) પ્રદીપ શર્માએ ફાઈલમાં દર્શાવેલી માંગણીથી વિપરીત 47,173 ચોરસ મીટર જમીન ફાળવી દીધી, જે મંજૂર કરેલી મર્યાદા કરતાં ઘણી વધારે હતી. માત્ર એક જ માંગણી અને એક જ દિવસે, એક જ કંપનીને એક જ ઉપયોગ માટે આટલી મોટી જમીન ફાળવી દેવામાં આવી.

ગાંધીનગર સચિવાલયના આદેશ અનુસાર, જો એક જ ગામમાં એક જ હેતુ માટે અલગ-અલગ સર્વે નંબર હેઠળ જમીનની માંગણી કરવામાં આવે તો તમામ માંગણીઓને એકત્રિત કરીને એકસાથે નિર્ણય લેવાનો હોય છે. પરંતુ અહીં જાણીજોઈને નિયમોની અવગણના કરીને એક જ સર્વે નંબરમાં 20,000 ચોરસ મીટરથી વધુ (27,173 ચોરસ મીટર વધારાની) જમીન ફાલતુ ફાળવી દેવામાં આવી.

સરકારી આદેશો અને નિયમોની અવહેલના કરીને આરોપીઓએ કંપનીને આર્થિક લાભ પહોંચાડ્યો અને સરકારને આર્થિક નુકસાન કર્યું. આ કૃત્ય પાછળ તમામ આરોપીઓની પરસ્પર સાંઠગાંઠ હતી અને જિલ્લા જમીન મૂલ્યાંકન સમિતિની બેઠકમાં આ કાવતરું ઘડવામાં આવ્યું હતું. આ સંબંધમાં સી.આઈ.ડી. ક્રાઈમ શાખા, રાજકોટ ઝોન દ્વારા એફ.આઈ.આર. નંબર 1/11, IPC ની કલમ 120(બી), 409, 420 હેઠળ ગુનો નોંધવામાં આવ્યો હતો.

આ કેસની ગંભીરતાને ધ્યાનમાં લઈને કોર્ટે પૂર્વ કલેક્ટરને પાંચ વર્ષની સજા અને દંડ ફટકાર્યો છે, જે ભ્રષ્ટાચાર અને સરકારી નિયમોના ઉલ્લંઘન સામે એક મજબૂત સંદેશ આપે છે. અન્ય આરોપીઓની સંડોવણી પણ આ કેસને વધુ જટિલ બનાવે છે, જેમાં સરકારી અધિકારીઓ અને ખાનગી કંપનીઓની મિલીભગતથી સરકારને મોટું નુકસાન થયું હોવાનું સ્પષ્ટ થાય છે.