ગુજરાતમાં મિલકતોના દસ્તાવેજ બાબતે રાજ્ય સરકારનો મહત્વપૂર્ણ નિર્ણય

ગુજરાતમાં મિલકતોના દસ્તાવેજને લઈ રાજ્ય સરકારે મહત્વપૂર્ણ નિર્ણય કર્યો છે. 1 એપ્રિલથી ખુલ્લા પ્લોટના દસ્તાવેજમાં અક્ષાંશ-રેખાંશની વિગતો નોંધવી ફરજિયાત કરવામાં આવી છે. રાજ્ય સરકારે તમામ સબ રજિસ્ટ્રાર કચેરીઓને પરિપત્ર કરીને અક્ષાંશ-રેખાંશની વિગતો વગર નોંધણી નહી કરવા સ્પષ્ટ સૂચના આપી છે. સરકારના આ નિર્ણયના કારણે મિલકતની ખરીદ-વેચાણ પ્રક્રિયામાં પારદર્શિતા આવવાની અને સ્ટેમ્પ ડ્યુટી આવકમાં થતાં નુકસાનને અટકવાનો દાવો કરાયો છે.

રાજ્ય સરકારના સૂત્રોના જણાવ્યા મુજબ ઘણી વખત મિલકતના દસ્તાવેજોમાં બાંધકામ હોવા છતાં દસ્તાવેજમાં ખુલ્લા પ્લોટના ફોટા રજૂ કરવામાં આવે છે. જેના કારણે સ્ટેમ્પ ડ્યૂટીની ગણતરીમાં ગેરરીતિ થાય છે અને સરકારને આર્થિક નુકસાન થાય છે. સરકારના ધ્યાને આ પ્રકારના કિસ્સાઓ સતત વધતાં હોવાનું ધ્યાને આવ્યુ હોવાથી ઉપરોક્ત નિર્ણય કરાયો છે.  

મિલકતોના દસ્તાવેજમાં થતી છેતરપિંડી અટકાવવા સંબંધિત કચેરીના અધિકારીઓને સ્પષ્ટ સૂચના આપવામાં આવી છે. પરિપત્રમાં જણાવાયુ છે કે, ખુલ્લા પ્લોટની મિલકતોની તબદીલીના કિસ્સામાં, ફોટોગ્રાફવાળા પૃષ્ઠ પર અક્ષાંશ અને રેખાંશની વિગતો ફરજિયાત દર્શાવેલી હોવી જોઇએ. દસ્તાવેજમાં મિલકતના 5*7 સાઇઝના કલર ફોટોગ્રાફ્સમાં એક સાઇડ વ્યૂ અને ફ્રન્ટ વ્યૂ દેખાવવો જોઇએ. મિલકતના વર્ણનવાળા પૃષ્ઠ પછી તરત જ ચોંટાડવાના રહેશે.

ફોટાની નીચે મિલકતનું પૂરૂ પોસ્ટલ સરનામું લખવાનું રહેશે. તેની પર દસ્તાવેજ લખનાર તેમજ લેનાર બંને પક્ષકારોએ સહી કરવી પડશે. આ પ્રકારની નોંધ દસ્તાવેજમાં નહીં હોય તો સબ-રજિસ્ટ્રાર કચેરી નોંધણી માટે ગ્રાહ્ય નહીં ગણે.

સરકારના આ નિર્ણયથી મિલકતની ખરીદી-વેચાણમાં પારદર્શિતા વધશે અને છેતરપિંડીની સંભાવનાઓ ઘટશે. 1 એપ્રિલ 2025થી શરૂ થતા નિયમોનો કડક અમલ કરવા સબ-રજિસ્ટ્રાર કચેરીઓને પણ સૂચના આપવામાં આવી છે.