ફિશરીઝ કૌભાંડમાં ઈફકોના ચેરમેન દિલીપ સંઘાણીને સુપ્રીમકોર્ટમાંથી રાહત

ગુજરાતના પૂર્વ મંત્રી અને ઈફકોના ચેરમેન દિલીપ સંઘાણીને રૂપિયા 400 કરોડના ફિશરીઝ કૌભાંડના આરોપોમાંથી સુપ્રીમકોર્ટે રાહત આપી છે. વર્ષ 2007માં દિલીપ સંઘાણી કૃષિ, સહકાર અને ફિશરીઝ વિભાગના કેબિનેટ મંત્રી હતા તે સમયે ફિશરીઝ કૌભાંડ થયુ હોવાનો આરોપ લાગ્યો હતો. 20214માં એસીબીની તપાસ બાદ ફિશરીઝ કૌભાંડમાં દિલીપ સંઘાણીને આરોપી બનાવાતા સંઘાણીએ હાઈકોર્ટ અને બાદમાં સુપ્રીમકોર્ટમાં દાદ માંગી હતી. 

વર્ષ 2007 માં અમરેલીના ધારાસભ્ય તરીકે ચૂંટાઈ આવ્યા બાદ સંઘાણી કૃષિ, સહકાર અને ફિશરીઝ વિભાગના કેબિનેટ મંત્રી બન્યા હતા. જ્યારે પરસોત્તમ સોલંકી રાજ્યકક્ષાના ફિશરીઝ મંત્રી હતા. ફિશરીઝ કૌભાંડનો આરોપ લાગ્યો ત્યારે પરસોત્તમ સોલંકી પર 30 લાખ રૂપિયાનો ભ્રષ્ટાચાર કર્યાના આક્ષેપો થયા હતા. 

ગુજરાત સરકારે કેબિનેટ મીટિંગમાં આરોપોની તપાસને મંજૂરી આપી નહોતી. પરંતુ 2012માં રાજ્યપાલ કમલા બેનીવાલે દિલીપ સંઘાણી સામે ફરિયાદ દાખલ કરવાની મંજૂરી આપી હતી. ત્યારબાદ કોર્ટ કેસ શરૂ થયો હતો. વર્ષ 2014માં એસીબીની તપાસ બાદ ફિશરીઝ કૌભાંડમાં સંઘાણીને આરોપી તરીકે સામેલ કરવામાં આવ્યા હતા. 

વર્ષ 2015માં ગાંધીનગરની કોર્ટે સમન્સ ઈસ્યૂ કર્યા બાદ સંઘાણીએ હાઈકોર્ટ અને પછી સુપ્રીમકોર્ટમાં દાદ માંગી હતી. વર્ષ 2024માં ગુજરાત હાઈકોર્ટે દિલીપ સંઘાણી વિરુદ્ધ ચુકાદો આપ્યો હતો. તેથી સંઘાણીએ સુપ્રીમકોર્ટમાં દાદ માંગી હતી. 

સુપ્રીમકોર્ટના જસ્ટિસ સુધાંશુ પુલિયા અને જસ્ટિસ વિનોદ ચંદ્રનની ખંડપીઠે તમામ દલીલો સાંભળ્યા બાદ સંઘાણીને ફિશરીઝ કૌભાંડના આરોપોમાંથી મુક્તિ આપતો હુકમ કર્યો છે. વિપક્ષે આ ચૂકાદા સામે આકરી પ્રતિક્રિયાઓ આપી છે. સંઘાણીને મૂળભૂત આરોપો માટે જવાબદાર માન્યા છે. જો કે, 18 વર્ષ બાદ સુપ્રીમકોર્ટે આપેલા ચુકાદાના પગલે રાજકીય વર્તુળોમાં ખાસ્સી ચર્ચા જાગી છે.