IKRDC કિડની હોસ્પિટલ ભરતી પ્રકિયામાં વગર જાહેરાતે કરાઇ હતી ભરતી

અમદાવાદના સિવિલમાં આવેલી IKDRC કીડની હોસ્પિટલમાં વર્ષ 2004 થી 2023 દરમિયાન થયેલી 297 લોકોની ભરતીમાં ગોટાળો થયો હોવાનો કોંગ્રેસ ના પ્રવક્તા પાર્થિવરાજસિંહ કઠવાડિયાએ આક્ષેપ કર્યો છે. આ તમામ ભરતી કોઈપણ જાહેરાત આપ્યા વગર જ કીડની હોસ્પિટલે કરી હોવાનો કેગના અહેવાલમાં ખુલાસો થયો હોવાનો કોંગ્રેસે દાવો કર્યો છે.હોસ્પિટલમાં નિવૃત અધિકારીને નોકરી પર રાખવાના હોય તો સરકારની પૂર્વ મંજૂરી લેવી પડતી હોય છે. આ મંજૂરી વગર જ હોસ્પિટલમાં નિવૃત અધિકારીઓને નોકરી પર રાખી દેવાયા હોવાનો પણ આક્ષેપ કરાયો છે. આ અહેવાલ મામલે કોંગ્રેસ આરોગ્ય મંત્રીનો જવાબ માગ્યો છે અને વિધાનસભામાં ચર્ચાની માગ કરી છે.

IKDRC કીડની હોસ્પિટલમાં વર્ષ 2004થી 2023 દરમિયાન અલગ-અલગ પોસ્ટ કરવામાં આવેલી 297 લોકોની ભરતી માટે કોઈપણ જાહેરાત આપ્યા વગર જ કરવામાં આવી હોવાનો કેગના અહેવાલમાં ખુલાસો થયો હોવાનો કોંગ્રેસે દાવો કર્યો છે. આ સિવાય જે 58 અધ્યાપક અને ડોકટરની ભરતી કરવામાં આવી છે તે પૈકીના 34ને બારોબાર જ નોકરી આપી દેવાયો હોવાનો આક્ષેપ કરાયો છે. આ સિવાય 2012 થી 2023 દરમિયાન 192 લોકોને બરોબર નોકરી આપવામાં આવી છે.

વધુમાં કોંગ્રેસે કેગના અહેવાલનો હવાલો આપતા જણાવ્યું હતું કે, કોઈ નિવૃત અધિકારીને નોકરી પર રાખવાના હોય ત્યારે સરકારની પૂર્વ મંજૂરી લેવાની હોય છે. તેના બદલે હોસ્પિટલમાં 12 અધિકારીઓને કોઈપણ પ્રકારની પૂર્વ મંજૂરી વગર જ નોકરી પર રાખી દેવાયા હોવાનો આક્ષેપ કરાયો છે.

24 કલાકમાં RMO બનાવમાં આવ્યો

RMO વિરેન ત્રિવેદી બાબતે આક્ષેપ કરતા કહ્યું કે, 1978માં એમબીબીએસમાં પ્રવેશ આપવામાં આવે છે. 1993માં તેને ફરજીયાત RMO કરવામાં આવે છે. 2002 થી 2003 રજા લઈને તેણે પોતાનો અભ્યાસક્રમ પૂર્ણ કર્યો હતો. 20 વર્ષ સુધી વીરેન ત્રિવેદી એમબીબીએસનો અભ્યાસ જ કર્યા કરે છે. 24 કલાકમાં જ વીરેન ત્રિવેદીને RMO બનાવી દેવામાં આવ્યા હતા.પ્રોફેસર ના હોવા છતાં 9 લાખ રૂપિયા રિસર્ચના નામે આપવામાં આવ્યા હતા.

હોસ્પિટલમાં નોકરી માટે સેટિંગ હોવું જરૂરી 

ડાયરેક્ટરના પીએ અને RMOના સગાસંબધીઓ ત્યાં જ નોકરી કરે છે. ગુજરાતના યુવાઓને નોકરી મળે છે તે માટે મહેનત કરે છે અને આવા સેટિંગ વાળા લોકોને નોકરી મળે છે. ડાયરેક્ટર પ્રાંજલ મોદીનું નામ પણ ખોટી રીતે પ્રમોશન મેળવવાના નામમાં આવ્યું છે.આ જાહેરાત વગર ભરતી કેમ થઇ અને કોના કહેવાથી નોકરી મળી તે સરકાર જાહેરાત કરે.