ઉ.ગુજરાત યુનિવર્સિટી સંલગ્ન 17 કોલેજોનું જોડાણ રદ

Patan: ઉત્તર ગુજરાતના ઉચ્ચ શિક્ષણ ક્ષેત્રમાં એક મહત્વપૂર્ણ નિર્ણય સામે આવ્યો છે.હેમચંદ્રાચાર્ય ઉત્તર ગુજરાત યુનિવર્સિટી (HNGU)એ નિયમોનું પાલન ન કરતી પાટણ અને મહેસાણા જિલ્લાની કુલ 17 કોલેજો સામે કડક કાર્યવાહી હાથ ધરી છે.યુનિવર્સિટીએ આ કોલેજોનું જોડાણ સમાપ્ત કરવાનો નિર્ણય લીધો છે અને આગામી શૈક્ષણિક વર્ષથી નવા વિદ્યાર્થીઓને પ્રવેશ આપવાની મંજૂરી પણ રદ કરી છે.આ નિર્ણયથી હજારો વિદ્યાર્થીઓ, વાલીઓ તેમજ સંચાલકોમાં ચર્ચાનો માહોલ સર્જાયો છે. યુનિવર્સિટીનું કહેવું છે કે લાંબા સમયથી નિયમોના ભંગ, માળખાકીય સુવિધાઓનો અભાવ, લાયકાત ધરાવતા શિક્ષકોની અછત અને યુજીસી તથા યુનિવર્સિટીના ધોરણોનું પાલન ન થવાને કારણે આ કાર્યવાહી અનિવાર્ય બની હતી.

લાંબા સમયથી મળતી હતી ફરિયાદો
યુનિવર્સિટીને છેલ્લા કેટલાક સમયથી અનેક કોલેજો અંગે સતત ફરિયાદો મળી રહી હતી. વિદ્યાર્થીઓ અને વાલીઓએ અભ્યાસની ગુણવત્તા, પ્રેક્ટિકલ સુવિધાઓનો અભાવ, પુસ્તકાલય, લેબોરેટરી, કાયમી શિક્ષકોની અછત અને અન્ય વહીવટી ખામીઓ અંગે રજૂઆતો કરી હતી.
આ ફરિયાદોને ધ્યાનમાં રાખીને યુનિવર્સિટીએ વિવિધ નિરીક્ષણ સમિતિઓની રચના કરી હતી. સમિતિઓએ સ્થળ પર જઈ તપાસ કરી હતી અને પોતાના અહેવાલમાં અનેક ગંભીર ખામીઓ દર્શાવી હતી.

ઉચ્ચ કક્ષાની સમિતિના અહેવાલ બાદ કાર્યવાહી
યુનિવર્સિટી પ્રશાસનના જણાવ્યા મુજબ, સંબંધિત કોલેજોમાં થયેલી અનિયમિતતાઓની તપાસ માટે ઉચ્ચ કક્ષાની સમિતિની રચના કરવામાં આવી હતી. સમિતિના અહેવાલના આધારે યુનિવર્સિટી એક્ટ, સ્ટેચ્યુટ અને ઓર્ડિનન્સ મુજબની સંપૂર્ણ કાનૂની પ્રક્રિયા હાથ ધરવામાં આવી હતી.આ નિર્ણય પહેલાં બોર્ડ ઓફ મેનેજમેન્ટ, એકેડેમિક કાઉન્સિલ અને એક્ઝિક્યુટિવ કાઉન્સિલની મંજૂરી લેવામાં આવી હતી. ઉપરાંત, સંબંધિત સંસ્થાઓને પોતાનો પક્ષ રજૂ કરવાની પૂરતી તક પણ આપવામાં આવી હતી. તમામ પ્રક્રિયા પૂર્ણ થયા બાદ અંતિમ નિર્ણય જાહેર કરવામાં આવ્યો હોવાનું યુનિવર્સિટીએ જણાવ્યું છે.

કઈ  કોલેજો પર સંપૂર્ણ પ્રતિબંધ લાગ્યો 
યુનિવર્સિટી દ્વારા જાહેર કરાયેલી યાદી મુજબ,ચાણસ્માના મીઠાઘરવા સ્થિત આવેલી પ્રતિષ્ઠિત ઉમિયા કોલેજ ઓફ એજ્યુકેશનના બી.એડ. (B.Ed.) અભ્યાસક્રમનું જોડાણ રદ કરી દેવાયું છે. આ ઉપરાંત મહેસાણાના જોટાણાની સંસ્કાર બી.એડ. કોલેજ તેમજ કડીના કલ્યાણપુરામાં ધમધમતી બી.એડ., એમ.એડ. (M.Ed.), બી.બી.એ. (BBA) અને બી.સી.એ. (BCA) કોલેજોની માન્યતા પણ છીનવી લેવામાં આવી છે. આ યાદીમાં શ્રી હરિ એમ.એસસી. (M.Sc.) અને ડી.એચ.એસ.આઈ. કોલેજ સહિત અન્ય ઘણી ખાનગી ગ્રાન્ટ-ઇન-એઇડ અને સેલ્ફ-ફાઇનાન્સ કોલેજોનો સમાવેશ થાય છે. આ તમામ સંસ્થાઓમાં આગામી નવું શૈક્ષણિક સત્ર 2026-27 શરૂ થાય ત્યારથી નવા વિદ્યાર્થીઓની પ્રવેશ પ્રક્રિયા પર સંપૂર્ણ પ્રતિબંધ લાદી દેવામાં આવ્યો છે.

વિદ્યાર્થીઓ અને તેમના વાલીઓમાં ચિંતાનો માહોલ જોવા મળ્યો
યુનિવર્સિટીના આ આકરા પગલાના કારણે આ કોલેજોમાં અભ્યાસ કરતા અથવા પ્રવેશ મેળવવા ઈચ્છતા હજારો વિદ્યાર્થીઓ અને તેમના વાલીઓમાં ચિંતાનો માહોલ જોવા મળ્યો હતો.જોકે,કુલપતિ કે.સી.પોરિયાએ વાલીઓને આશ્વાસન આપતા જણાવ્યું છે કે,જે પણ વિદ્યાર્થીઓ હાલ આ 17 કોલેજોમાં અભ્યાસ કરી રહ્યા છે અથવા નવા સત્રમાં આવવાના હતા, તેમના શિક્ષણને કોઈ પણ પ્રકારનું નુકસાન થવા દેવામાં નહીં આવે. આ તમામ અસરગ્રસ્ત વિદ્યાર્થીઓને તેમની જ સોસાયટી કે ગામની નજીક આવેલી અન્ય સરકારી અથવા માન્યતા પ્રાપ્ત સંલગ્ન કોલેજોમાં સમાવી લેવામાં આવશે.આ માટે અન્ય કોલેજોમાં વિશેષ મંજૂરી આપીને વધારાની બેઠકો ફાળવવામાં આવશે, જેથી ચાલુ વર્ષે વિદ્યાર્થીઓનું શૈક્ષણિક સત્ર બગડે નહીં.

તમામ સંસ્થાઓમાં નવા એડમિશન મેળવવા પર પણ સંપૂર્ણ પ્રતિબંધ
કોલેજોના સંચાલનમાં લાંબા સમયથી ચાલી આવતી ગંભીર અનિયમિતતાઓ અને નિયમોના ઉલ્લંઘનને પગલે શૈક્ષણિક વર્ષ 2026-27 માટે આ તમામ સંસ્થાઓમાં નવા એડમિશન મેળવવા પર પણ સંપૂર્ણ પ્રતિબંધ લાદી દેવામાં આવ્યો છે. યુનિવર્સિટીના આ આકરા વલણને કારણે સમગ્ર ઉત્તર ગુજરાતના શિક્ષણ જગતમાં ભારે ખળભળાટ મચી ગયો છે.સમગ્ર મામલાની વિગતવાર વાત કરીએ તો, યુનિવર્સિટી દ્વારા નિયુક્ત કરવામાં આવેલી તપાસ સમિતિને આ 17 કોલેજોના વહીવટ, ઈન્ફ્રાસ્ટ્રક્ચર અને શૈક્ષણિક ધોરણોમાં ભારે ખામીઓ અને અનિયમિતતાઓ જોવા મળી હતી. વારંવાર નોટિસ આપવા છતાં શરતોનું પાલન ન કરાતા યુનિવર્સિટીએ આ જોડાણ રદ કરવાનો નિર્ણય લીધો છે. જોકે, આ આકરી કાર્યવાહી વચ્ચે વર્તમાન વિદ્યાર્થીઓનું શૈક્ષણિક વર્ષ કે ભવિષ્ય ન બગડે તેની ખાસ તકેદારી રાખવામાં આવી છે. યુનિવર્સિટી સત્તાધીશોએ જણાવ્યું છે કે અસરગ્રસ્ત વિદ્યાર્થીઓને નજીકની અન્ય માન્યતા પ્રાપ્ત કોલેજોમાં પ્રવેશ ફાળવીને તેમના અભ્યાસની વૈકલ્પિક વ્યવસ્થા ગોઠવી દેવામાં આવી છે.

સંચાલનમાં અનિયમિતતાના અહેવાલ બાદ નિર્ણય
આ કોલેજોનું જોડાણ આગામી શૈક્ષણિક વર્ષથી રદ કરવામાં આવ્યું છે. જોકે વાલમની બી.એડ. કોલેજ અંગેનો નિર્ણય ગુજરાત હાઈકોર્ટમાં ચાલી રહેલી અરજીના અંતિમ ચુકાદાને આધીન રહેશે. યુનિવર્સિટી પ્રશાસન દ્વારા કોલેજોના સંચાલનમાં થયેલી અનિયમિતતાઓની તપાસ માટે ઉચ્ચ કક્ષાની સમિતિની રચના કરવામાં આવી હતી. સમિતિના અહેવાલના આધારે સ્ટેચ્યુટ અને ઓર્ડિનન્સ એક્ટ મુજબ સંપૂર્ણ પ્રક્રિયા હાથ ધરવામાં આવી હતી. બોર્ડ ઓફ મેનેજમેન્ટ, એકેડેમિક કાઉન્સિલ અને એક્ઝિક્યુટિવ કાઉન્સિલમાં મંજૂરી મળ્યા બાદ સંબંધિત સંસ્થાઓને પોતાનો પક્ષ રજૂ કરવાની તક પણ આપવામાં આવી હતી. ત્યારબાદ આખરી નિર્ણય જાહેર કરવામાં આવ્યો હતો.