મેઘરાજાનું જોર યથાવત: 155 તાલુકામાં વરસાદ

Gujarat Weather Forecast: ગુજરાતમાં છેલ્લા 24 કલાક દરમિયાન મેઘરાજાનું જોર યથાવત રહ્યું છે, જેમાં કુલ 155 તાલુકામાં નોંધપાત્ર વરસાદ વરસ્યો છે. સૌથી વધુ વરસાદ છોટાઉદેપુરના જેતપુર પાવીમાં પોણા ત્રણ ઈંચ અને દાહોદના લીમખેડામાં 2 ઈંચ જેટલો નોંધાયો છે, જ્યારે રાજ્યના 24 તાલુકાઓમાં 1 ઈંચથી વધુ વરસાદ ખાબક્યો છે. હાલમાં રાજ્ય પર અપર એર સર્ક્યુલેશન, બે મોન્સૂન ટ્રફ, સાયક્લોનિક સર્ક્યુલેશન અને ડીપ ડિપ્રેશન એમ એકસાથે કુલ 5 સિસ્ટમ સક્રિય હોવાના કારણે વરસાદી માહોલ જામ્યો છે. હવામાન વિભાગના જણાવ્યા અનુસાર, આ સિસ્ટમોની અસરથી આગામી 2 ઓગસ્ટ સુધી રાજ્યમાં ભારે વરસાદની સંભાવના છે, જેને લઈને તંત્ર દ્વારા સાવચેતીના પગલાં લેવામાં આવી રહ્યા છે.

પંચમહાલ અને અમદાવાદમાં આફત બન્યો વરસાદ
વરસાદી માહોલ વચ્ચે રાજ્યમાં દુર્ઘટનાઓની પણ નોંધ થઈ છે. પંચમહાલ જિલ્લાના શહેરા તાલુકાના નાદરવા ગામે 27 જુલાઈના રોજ બપોરે ખેતરમાં ડાંગરની રોપણી કરી રહેલા એક જ પરિવારની ત્રણ મહિલાઓ અચાનક આકાશી વીજળીની ઝપેટમાં આવી ગઈ હતી. આ ગોઝારી હોનારતમાં 65 વર્ષીય સંતોકબેન બામણીયાનું ઘટનાસ્થળે જ કમકમાટીભર્યું મોત નીપજ્યું હતું, જ્યારે અન્ય બે મહિલાઓ ગંભીર રીતે દાઝી જતાં તેમને ગોધરા સિવિલ હોસ્પિટલમાં ખસેડવામાં આવી છે. આ ઉપરાંત, અમદાવાદના દરિયાપુર વિસ્તારના ડગરવાડમાં મન્સૂરી મોહલ્લામાં 27 જુલાઈની મોડીરાત્રે ભારે વરસાદના કારણે એક જર્જરીત મકાન ધરાશાયી થતાં કાટમાળ નીચે દબાઈ જવાથી એક વૃદ્ધાનું મોત થયું છે અને અન્ય એક વ્યક્તિ ઈજાગ્રસ્ત થયા છે.

અમદાવાદમાં જળબંબાકારની સ્થિતિ અને ધોલેરામાં NDRFનું રેસ્ક્યૂ ઓપરેશન
અમદાવાદ શહેરમાં દોઢ ઈંચ જેટલા સામાન્ય વરસાદમાં જ અનેક વિસ્તારોમાં જળબંબાકાર જેવી ગંભીર સ્થિતિ સર્જાઈ હતી. એસ.જી. હાઇવે, થલતેજ, ચાણક્યપુરી, ચાંદલોડિયા અને બોપલ જેવા મુખ્ય માર્ગો પર ઘૂંટણસમાથી લઈને કમર સુધી પાણી ભરાઈ જવાથી વાહનચાલકો ભારે મુશ્કેલીમાં મુકાયા હતા અનેક વાહનો બંધ પડી ગયા હતા. આ તરફ ધંધુકા અને ધોલેરા પંથકમાં વહેલી સવારથી ભારે વરસાદના કારણે જનજીવન અસ્તવ્યસ્ત બન્યું છે. ધોલેરા તાલુકાનું વણી તળાવ ગામ ચારેય તરફ પાણીથી ઘેરાઈને બેટમાં ફેરવાઈ જતાં સંપર્કવિહોણું બન્યું છે, જ્યાં પરિસ્થિતિની ગંભીરતાને ધ્યાનમાં રાખીને NDRFની ટીમ દ્વારા બોટની મદદથી ગ્રામજનોને સલામત સ્થળે ખસેડવાની રેસ્ક્યૂ કામગીરી યુદ્ધના ધોરણે ચલાવવામાં આવી રહી છે.

પીપળી-વટામણ હાઇવે બંધ: વાહનચાલકો માટે વૈકલ્પિક માર્ગો જાહેર
ભારે વરસાદ અને પાણીની આવકને કારણે અમદાવાદ જિલ્લાના પીપળી-વટામણ હાઇવે પર પીપળી ગામ નજીક વરસાદી નાળું તૂટી જવાથી વાહનવ્યવહાર સંપૂર્ણપણે ઠપ થઈ ગયો છે અને હાઈવે બંધ કરવામાં આવ્યો છે. વહીવટી તંત્ર દ્વારા વાહનચાલકોની સુવિધા માટે વૈકલ્પિક માર્ગો જાહેર કરવામાં આવ્યા છે. સુરત તરફ જતા તેમજ વટામણથી પીપળી આવતા વાહનચાલકોએ ધોલેરા એક્સપ્રેસવેનો ઉપયોગ કરવા સૂચના અપાઈ છે, જ્યારે વટામણથી ધંધુકા તરફ જતા વાહનચાલકોએ ધોલેરા થઈને પોતાના ગંતવ્ય સ્થાને પહોંચવા માટે જણાવાયું છે.

ડેમ અને જળાશયોમાં પાણીની આવક વધતા સુરક્ષા માટે હાઇ એલર્ટ પર જળાશયો
મેઘરાજાની સક્રિયતાને કારણે રાજ્યના ડેમો અને જળાશયોમાં પાણીની સારી એવી આવક થઈ રહી છે. સરદાર સરોવર નર્મદા ડેમમાં હાલ તેની કુલ સંગ્રહ ક્ષમતાના 69.25% (2,31,342 mcft) પાણીનો જથ્થો ઉપલબ્ધ છે. રાજ્યના અન્ય 206 જળાશયોમાં કુલ ક્ષમતાના 45.41% પાણી સંગ્રહાયેલું છે. આ ઉપરાંત, રાજ્યના કુલ 13 ડેમ 100% ભરાઈ ગયા છે, 26 ડેમ 70% થી 100% વચ્ચે અને 28 ડેમ 50% થી 70% સુધી ભરાયા છે. સુરક્ષા અને સલામતીના ભાગરૂપે તંત્ર દ્વારા હાલ 21 ડેમને હાઈ એલર્ટ પર, 5 ડેમને એલર્ટ પર અને 13 ડેમને વોર્નિંગ લેવલ પર રાખવામાં આવ્યા છે.

રસ્તાઓ બંધ અને એસ.ટી. બસ સેવાઓ પ્રભાવિત
ભારે વરસાદ અને પુરની સ્થિતિને કારણે માર્ગ અને મકાન વિભાગના હસ્તકના કુલ 208 રસ્તાઓ વાહનવ્યવહાર માટે બંધ કરવાની ફરજ પડી છે, જેમાં 137 પંચાયત હસ્તકના રસ્તા, 23 અન્ય માર્ગો, 12 સ્ટેટ હાઈવે અને 2 નેશનલ હાઈવે સામેલ છે. રસ્તાઓ બંધ થવાથી અમદાવાદમાં 42, વલસાડમાં 40, સુરેન્દ્રનગરમાં 23 અને નવસારીમાં 18 રસ્તાઓ સૌથી વધુ પ્રભાવિત થયા છે. આ ઉપરાંત, GSRTC ની એસ.ટી. બસ સેવાઓને પણ અસર પહોંચતા 164 રૂટની 616 ટ્રીપો રદ કરવી પડી છે. નાગરિકોની સુરક્ષા માટે સમગ્ર રાજ્યમાં NDRFની 17 ટીમો અને SDRFની 33 પ્લાટુન તૈનાત કરવામાં આવી છે, જ્યારે અત્યાર સુધીમાં કુલ 53,117 લોકોનું સુરક્ષિત સ્થળે સ્થળાંતર અને 8,080 લોકોને સફળતાપૂર્વક રેસ્ક્યૂ કરવામાં આવ્યા છે.

આગામી દિવસોમાં વરસાદની ચેતવણી
હવામાન વિભાગના જણાવ્યા અનુસાર, 30 અને 31 જુલાઈના રોજ માછીમારોએ દરિયો ન ખેડવા માટે ખાસ સૂચના જારી કરવામાં આવી છે. રાજ્યમાં સક્રિય બનેલી પાંચ વરસાદી સિસ્ટમોના પ્રભાવ હેઠળ આગામી 2 ઓગસ્ટ સુધી અતિભારે વરસાદની સંભાવના વ્યક્ત કરવામાં આવી છે. આજે અને આગામી દિવસોમાં સુરત, તાપી, નવસારી, ડાંગ, વલસાડ, દમણ, દાદરા નગર હવેલી સહિતના વિવિધ જિલ્લાઓમાં ભારે વરસાદને લઈને યલો એલર્ટ જાહેર કરાયું છે. વહીવટી તંત્ર દ્વારા નાગરિકોને બિનજરૂરી બહાર ન નીકળવા અને સાવચેતીના તમામ પગલાં લેવા માટે અપીલ કરવામાં આવી છે.