ગુજરાતના આ શહેરમાં બની સૌથી મોટી ગર્લ્સ હોસ્ટેલ, મળશે ફાઈવ સ્ટાર જેવી સુવિધાઓ...

ગુજરાતનો પાટીદાર સમાજ હંમેશા પોતાના લોકોની પ્રગતિ માટે કટિબદ્ધ રહે છે અને અવારનવાર નવી પહેલ કરતો રહે છે. અમદાવાદ શહેરમાં, સમાજની દીકરીઓ માટે એક ભવ્ય અને આધુનિક છાત્રાલયનું નિર્માણ કરવામાં આવ્યું છે, જે ફાઈવ સ્ટાર હોટલ જેવી આરામદાયક સુવિધાઓથી સજ્જ છે.

સરદારધામ સંસ્થાએ પાટીદાર સમાજની લાડકીઓ માટે અમદાવાદના વૈષ્ણોદેવી વિસ્તારમાં 14 માળનું એક વિશાળ છાત્રાલય ઊભું કર્યું છે. આ ગર્લ્સ હોસ્ટેલમાં 650 જેટલા સુસજ્જ રૂમો છે. ચાર ભવ્ય ટાવરમાં પથરાયેલા આ છાત્રાલયમાં વિદ્યાર્થિનીઓને ઉચ્ચ કક્ષાની આતિથ્ય સુવિધાઓ પ્રાપ્ત થશે, જે તેમને ઘર જેવો જ અનુભવ કરાવશે. અહીં એક સાથે 1400 થી વધુ છોકરીઓ રહીને પોતાના અભ્યાસને નવી ઊંચાઈઓ આપી શકશે. આ ઉપરાંત, અહીં વિદ્યાર્થિનીઓના સર્વાંગી વિકાસ માટે આત્મરક્ષાથી લઈને અત્યાધુનિક કોર્સ સુધીની તાલીમની વ્યવસ્થા પણ કરવામાં આવી છે.

આ નવા છાત્રાલયની આવશ્યકતા શા માટે ઊભી થઈ? 

સરદારધામના અગ્રણીઓએ જણાવ્યું કે અગાઉ, વૈષ્ણોદેવી સર્કલ પર આવેલા સરદારધામના મુખ્ય કાર્યાલયમાં પ્રથમ બાલિકા છાત્રાલય બનાવવામાં આવ્યું હતું. જેમાં પ્રવેશ મેળવવા માટે 4500 જેટલી દીકરીઓએ અરજી કરી હતી, પરંતુ જગ્યા મર્યાદિત હોવાથી માત્ર 250 બાલિકાઓને જ પ્રવેશ મળી શક્યો હતો. આથી, પ્રવેશ માટેની વધતી જતી માંગને પહોંચી વળવા માટે નવા ગર્લ્સ હોસ્ટેલનું નિર્માણ કરવાનો નિર્ણય લેવામાં આવ્યો.

આ છાત્રાલયમાં જરૂરિયાતમંદ દીકરીઓને વિના મૂલ્યે પ્રવેશ આપવામાં આવશે. સરદારધામના પ્રથમ છાત્રાલયમાં નજીવી રકમ લઈને પ્રવેશ અપાતો હતો, પરંતુ આ નવા છાત્રાલયમાં વિશેષ જોગવાઈ કરવામાં આવી છે. જે દીકરીઓ આર્થિક રીતે સક્ષમ છે, તેઓ પોતાની યથાશક્તિ પ્રમાણે ફી ભરી શકશે, જ્યારે જે દીકરીઓની આર્થિક પરિસ્થિતિ નબળી છે, તેમને કોઈપણ ફી વિના પ્રવેશ આપવામાં આવશે, જેથી કોઈ પણ તેજસ્વી વિદ્યાર્થિની શિક્ષણથી વંચિત ન રહે.