ગુજરાતનું ગૌરવ : UPSC માં ડંકો વગાડ્યો, ટોપ-5 માં બે દીકરીઓએ મચાવી ધૂમ...

અમદાવાદ અને સમગ્ર ગુજરાત માટે આજનો દિવસ ગૌરવ અને આનંદથી છલકાઈ ઉઠ્યો છે. યુનિયન પબ્લિક સર્વિસ કમિશન (UPSC) દ્વારા જાહેર કરવામાં આવેલા સિવિલ સર્વિસીસ પરીક્ષા 2024 ના અંતિમ પરિણામમાં ગુજરાતે ફરી એકવાર પોતાની આગવી ઓળખ ઊભી કરી છે. દેશભરના લાખો ઉમેદવારોને પછાડીને ગુજરાતના ત્રણ તેજસ્વી તારલાઓએ ટોપ-30 માં સ્થાન મેળવ્યું છે, એટલું જ નહીં, ટોચના પાંચ ક્રમાંકમાં બે મહિલાઓએ બાજી મારીને સમગ્ર રાજ્યને ગર્વથી ફૂલાવી દીધું છે.

ગુજરાતની દીકરીઓ હર્ષિતા ગોયલે ઓલ ઇન્ડિયામાં બીજો ક્રમ હાંસલ કરીને ઇતિહાસ રચ્યો છે, જ્યારે માર્ગી શાહે ચોથું સ્થાન પ્રાપ્ત કરીને પોતાની કાબેલિયતનો પરચો બતાવ્યો છે. આ બંને યુવતીઓએ પોતાની અથાગ મહેનત અને દૃઢ સંકલ્પથી રાષ્ટ્રીય સ્તરે ગુજરાતનું નામ રોશન કર્યું છે.

યુનિયન પબ્લિક સર્વિસ કમિશને આજે સિવિલ સર્વિસીસ પરીક્ષા 2024 નું અંતિમ પરિણામ પોતાની સત્તાવાર વેબસાઇટ upsc.gov.in પર જાહેર કર્યું છે. આ પરિણામ અનુસાર, શક્તિ દુબેએ સમગ્ર દેશમાં પ્રથમ સ્થાન મેળવ્યું છે. કમિશન દ્વારા પરિણામ જાહેર થયાના લગભગ પંદર દિવસ બાદ ઉમેદવારોના ગુણ પણ જાહેર કરવામાં આવશે.

UPSC સિવિલ સર્વિસીસ પરીક્ષા માટેના અંતિમ તબક્કાના ઇન્ટરવ્યુ તાજેતરમાં 17 એપ્રિલ 2025 સુધી ચાલ્યા હતા. આ ઇન્ટરવ્યુ રાઉન્ડની શરૂઆત 7 જાન્યુઆરી 2025 ના રોજ થઈ હતી. મુખ્ય પરીક્ષામાં સફળ થયેલા આશરે 2845 જેટલા ઉમેદવારોને ઇન્ટરવ્યુ માટે બોલાવવામાં આવ્યા હતા. આ વર્ષે સિવિલ સર્વિસીસ પરીક્ષા 2024 હેઠળ, UPSC દ્વારા IAS, IPS સહિતની વિવિધ સેવાઓમાં કુલ 1132 જગ્યાઓ માટે ભરતી પ્રક્રિયા હાથ ધરવામાં આવી હતી. અગાઉ આ જગ્યાઓની સંખ્યા 1056 હતી, જેને બાદમાં વધારીને 1132 કરવામાં આવી હતી.

UPSC સિવિલ સર્વિસીસ પરીક્ષા દ્વારા ભારતીય વહીવટી સેવાઓ (IAS), ભારતીય પોલીસ સેવાઓ (IPS) અને ભારતીય વિદેશ સેવાઓ (IFS) જેવી પ્રતિષ્ઠિત સેવાઓ માટે અધિકારીઓની પસંદગી કરવામાં આવે છે. આ ઉપરાંત, રેલ્વે ગ્રુપ A (ભારતીય રેલ્વે એકાઉન્ટ્સ સેવા), ભારતીય ટપાલ સેવાઓ, ભારતીય ટ્રેડ સેવાઓ અને અન્ય ઘણી મહત્વપૂર્ણ સેવાઓ માટે પણ આ પરીક્ષા દ્વારા પસંદગી થાય છે.

સિવિલ સર્વિસીસની આ પ્રતિષ્ઠિત પરીક્ષા ત્રણ તબક્કામાં લેવામાં આવે છે - પ્રિલિમિનરી પરીક્ષા, મુખ્ય પરીક્ષા અને અંતિમ તબક્કામાં ઇન્ટરવ્યુ. ઉમેદવારોના મુખ્ય પરીક્ષા અને ઇન્ટરવ્યુમાં કરેલા પ્રદર્શનના આધારે જ અંતિમ મેરિટ યાદી તૈયાર કરવામાં આવે છે. આ વર્ષના પરિણામોએ ફરી એકવાર સાબિત કરી દીધું છે કે ગુજરાતમાં પ્રતિભાની કોઈ કમી નથી. હર્ષિતા ગોયલ અને માર્ગી શાહની આ ભવ્ય સફળતા યુવા પેઢી માટે પ્રેરણારૂપ છે અને આગામી સમયમાં વધુ ગુજરાતી યુવાનો દેશની સેવા કરવા માટે આગળ આવશે તેવી આશા જન્માવે છે.