રાજ્યમાં ફરી વરસાદી સિસ્ટમ સક્રિય

Gujarat rain : ગુજરાતમાં ચોમાસાની શરૂઆત સારી રહી હતી, પરંતુ ત્યારબાદ રાજ્યના મોટા ભાગના વિસ્તારોમાં વરસાદે લાંબો વિરામ લીધો હતો. આ વિરામને કારણે ખાસ કરીને ખેડૂતોની ચિંતામાં વધારો થયો હતો. ખેતરોમાં વાવેતર તો થઈ ગયું હતું, પરંતુ સમયસર વરસાદ ન મળતાં પાકના વિકાસ પર પ્રશ્નચિહ્ન ઊભું થયું હતું. હવે લાંબા વિરામ બાદ મેઘરાજાએ ફરી રાજ્યમાં જોરદાર એન્ટ્રી કરતાં સૌરાષ્ટ્ર, ઉત્તર ગુજરાત તેમજ મધ્ય ગુજરાતના અનેક વિસ્તારોમાં વરસાદી માહોલ જામ્યો છે. વરસાદના આગમનથી ખેડૂતોમાં ફરી આશા જાગી છે અને કૃષિ ક્ષેત્રમાં નવી ઊર્જાનો સંચાર થયો છે.

લાંબા વિરામ બાદ બદલાયું વાતાવરણ
છેલ્લા કેટલાક દિવસોથી રાજ્યના વિવિધ શહેરોમાં ગરમી અને બફારાથી લોકો પરેશાન હતા. દિવસ દરમિયાન ઊંચું તાપમાન અને ભેજને કારણે અસહ્ય ઉકળાટ અનુભવાતો હતો. જોકે અચાનક હવામાનમાં પલટો આવ્યો અને કાળા ડિબાંગ વાદળો છવાઈ જતાં અનેક વિસ્તારોમાં પવન સાથે વરસાદ શરૂ થયો.રાજકોટ, જામનગર, મોરબી, સુરેન્દ્રનગર, બનાસકાંઠા, પાટણ, મહેસાણા, સાબરકાંઠા, અરવલ્લી સહિત અનેક જિલ્લાઓમાં સારો વરસાદ નોંધાયો. કેટલાક સ્થળોએ ધોધમાર વરસાદ વરસ્યો તો કેટલાક વિસ્તારોમાં મધ્યમથી હળવો વરસાદ પડ્યો.

સૌરાષ્ટ્રમાં ધીમી ધારે વરસાદની શરૂઆત 
સૌરાષ્ટ્રના અનેક જિલ્લાઓમાં વરસાદે ફરી જોર પકડ્યું છે. રાજકોટ શહેરમાં યુનિવર્સિટી રોડ, કાલાવડ રોડ સહિતના વિસ્તારોમાં ભારે વરસાદ પડતાં રસ્તાઓ પર પાણી ભરાઈ ગયા હતા. જોરદાર પવન સાથે વરસાદને કારણે કેટલાક વિસ્તારોમાં વૃક્ષો પણ ધરાશાયી થયા હતા. અનેક વાહનોને નુકસાન પહોંચ્યું હતું.જામનગર, દ્વારકા, પોરબંદર, અમરેલી અને ભાવનગર જિલ્લામાં પણ વરસાદથી વાતાવરણ ખુશનુમા બન્યું છે. લાંબા વિરામ બાદ વરસાદ થતાં ખેડૂતોમાં ખુશી જોવા મળી રહી છે.

જૂનાગઢ અને જામજોધપુરમાં મેઘમહેર
સૌરાષ્ટ્રના જૂનાગઢ જિલ્લામાં સવારથી જ વરસાદી માહોલ સર્જાયો હતો. જિલ્લાના અનેક વિસ્તારોમાં મધ્યમથી ભારે વરસાદ નોંધાતા રસ્તાઓ ભીના બન્યા હતા અને લાંબા સમય બાદ ધરતીને વરસાદનો સ્પર્શ મળ્યો હતો. વરસાદ શરૂ થતાં જ લોકોમાં રાહતની લાગણી જોવા મળી હતી, જ્યારે ખેડૂતો માટે પણ આ વરસાદ આશાનું કિરણ બની રહ્યો છે.

જામજોધપુર પંથકમાં પણ વહેલી સવારથી આકાશમાં ઘેરા વાદળો છવાઈ ગયા હતા અને ત્યારબાદ જોરદાર વરસાદી ઝાપટાં પડ્યા હતા. વરસાદને કારણે વાતાવરણમાં ઠંડક પ્રસરી ગઈ હતી અને છેલ્લા ઘણા દિવસોથી અનુભવાતી અસહ્ય ગરમીમાંથી લોકોને રાહત મળી હતી. ગ્રામ્ય વિસ્તારોમાં વરસાદ પડતાં ખેડૂતોમાં ખુશીનો માહોલ જોવા મળ્યો હતો, કારણ કે ઉભા પાક માટે આ વરસાદ ઉપયોગી સાબિત થઈ શકે છે.

રાજકોટ શહેરમાં ભારે ઉકળાટ બાદ મેઘરાજાની તોફાની એન્ટ્રી 
રાજકોટ શહેરમાં ભારે બફારા અને ઉકળાટ બાદ મેઘરાજાની તોફાની એન્ટ્રી થઈ છે. મવડી, રેસકોર્સ, યાજ્ઞિક રોડ, નાના મવા અને રિંગ રોડ પર ધોધમાર વરસાદ ખાબક્યો હતો, જ્યારે મેટોડા, રેલનગર અને જામનગર રોડ પર પણ જોરદાર વરસાદ નોંધાયો છે. આ વરસાદથી રસ્તાઓ પાણી-પાણી થયા છે અને શહેરમાં આહલાદક ઠંડક પ્રસરી ગઈ છે.

ઉત્તર ગુજરાતમાં પણ વરસાદી માહોલ
ઉત્તર ગુજરાતમાં પણ મેઘરાજાએ સારી હાજરી નોંધાવી છે. બનાસકાંઠા, પાટણ, મહેસાણા અને સાબરકાંઠામાં વરસાદ પડતાં સૂકાઈ રહેલા ખેતરોમાં ફરી જીવ આવ્યો છે.ખેડૂતોના જણાવ્યા અનુસાર, જો આગામી દિવસોમાં પણ નિયમિત વરસાદ ચાલુ રહેશે તો મગફળી, કપાસ, મકાઈ, બાજરી, તલ અને એરંડા જેવા પાકને મોટો ફાયદો થશે.

અરવલ્લી જિલ્લામાં પણ લાંબા વિરામ બાદ મેઘરાજાની મહેર
બીજી તરફ, ઉત્તર ગુજરાતના અરવલ્લી જિલ્લામાં પણ લાંબા વિરામ બાદ મેઘરાજાની મહેર જોવા મળી છે. યાત્રાધામ શામળાજી અને મેઘરજના ગ્રામ્ય વિસ્તારોમાં સવારથી ધીમો વરસાદ શરૂ થયો છે. જો કે, અહીં હજુ સુધી પૂરતો વરસાદ ન પડવાને કારણે ખેડૂતો ભારે ચિંતામાં મુકાયા છે. ખેતરોમાં અગાઉ કરેલી વાવણીના પાક પર સુકાઈ જવાનું સંકટ મંડરાઈ રહ્યું છે, જેથી ધરતીપુત્રો હવે આકાશ તરફ મીટ માંડીને બેઠા છે અને મેઘરાજાના મુશળધાર વરસાદની આતુરતાથી રાહ જોઈ રહ્યા છે. 

ખેડૂતોમાં ફરી આશાનું કિરણ
ગુજરાતના મોટા ભાગના ખેડૂતો માટે આ વરસાદ અત્યંત મહત્વનો માનવામાં આવી રહ્યો છે. રાજ્યમાં ચોમાસા દરમિયાન મુખ્યત્વે કપાસ, મગફળી, સોયાબીન, તલ, મકાઈ, બાજરી, ડાંગર સહિતના પાકનું વાવેતર થાય છે.વાવેતર બાદ સતત વરસાદ ન મળતાં ઘણા વિસ્તારોમાં પાક સુકાવા લાગ્યો હતો. કેટલાક ખેડૂતોને તો ફરી વાવેતર કરવાની ચિંતા પણ સતાવી રહી હતી. હવે વરસાદ થતાં પાકને નવું જીવન મળવાની આશા વ્યક્ત થઈ રહી છે.ખેડૂતોનું કહેવું છે કે વરસાદનો આ રાઉન્ડ ખૂબ જ મહત્વપૂર્ણ છે. જો આગામી સપ્તાહ દરમિયાન પણ વરસાદ ચાલુ રહેશે તો ઉત્પાદન પર સકારાત્મક અસર જોવા મળશે.

રાજ્યમાં હાલ પડેલો વરસાદ ગરમીમાંથી રાહત આપનારો સાબિત થયો છે, પરંતુ કૃષિ નિષ્ણાતોના મત મુજબ માત્ર છૂટાછવાયા વરસાદથી પૂરતો લાભ મળવો મુશ્કેલ છે. ખાસ કરીને કપાસ, મગફળી, સોયાબીન અને અન્ય ખરીફ પાક માટે આગામી દિવસોમાં સતત અને વ્યાપક વરસાદ જરૂરી રહેશે. જો આગામી દિવસોમાં પણ વરસાદનું પ્રમાણ વધશે તો પાકના વિકાસને વેગ મળશે અને ખેડૂતોની ચિંતા નોંધપાત્ર રીતે ઓછી થઈ શકે છે.હવામાનમાં આવેલા આ બદલાવને કારણે રાજ્યના અનેક વિસ્તારોમાં વાદળછાયું વાતાવરણ યથાવત રહ્યું છે. લોકો હવે આગામી દિવસોમાં વધુ વરસાદની આશા રાખી રહ્યા છે. જો મેઘરાજાની મહેર સતત ચાલુ રહેશે તો જળાશયોમાં પાણીની આવક વધશે, ખેતીને મોટો ફાયદો થશે અને રાજ્યના અનેક વિસ્તારોમાં પાણીની સમસ્યામાં પણ રાહત મળી શકે છે.