ગુજરાતમાં ચોમાસું પાછું ખેંચાયું

Gujarat Monsoon Delayed: ગુજરાતમાં સામાન્ય રીતે 15 જૂન સુધીમાં ચોમાસાનું સત્તાવાર આગમન થઈ જતું હોય છે અને 30 જૂન સુધીમાં મેઘરાજા સમગ્ર રાજ્યને આવરી લેતા હોય છે. જોકે, ચાલુ વર્ષે 15 જૂનની નક્કી મુદત વીતી ગઈ હોવા છતાં હજુ સુધી રાજ્યમાં ચોમાસાની સત્તાવાર એન્ટ્રી ન થતાં જગતના તાત સહિત નાગરિકોમાં ચિંતાના વાદળો ઘેરાયા છે. હવામાન એજન્સીના અહેવાલ અનુસાર, ચોમાસું ગત 8 જૂનથી પશ્ચિમી તટ પર લગભગ સ્થિર થઈ ગયું છે, જેના કારણે તેને મુંબઈ પહોંચવામાં જ હજુ 7 થી 8 દિવસ જેટલો સમય લાગી શકે છે. મુંબઈમાં વિલંબ થતાં ગુજરાતમાં પણ સત્તાવાર ચોમાસું મોડું બેસવાના એંધાણ વર્તાઈ રહ્યા છે.

દક્ષિણ ગુજરાતમાં બે દિવસ ગાજવીજ સાથે વરસાદની આગાહી
ચોમાસાની ધીમી ગતિ વચ્ચે હવામાન વિભાગે રાહતના સમાચાર આપતાં જણાવ્યું છે કે, આજથી (17 જૂન) બે દિવસ દરમિયાન દક્ષિણ ગુજરાતના વાતાવરણમાં પલટો આવશે. સુરત, નવસારી, વલસાડ, ડાંગ અને તાપી સહિત દમણ તેમજ દાદરા નગર હવેલીના છૂટાછવાયા વિસ્તારોમાં ગાજવીજ સાથે હળવોથી મધ્યમ વરસાદ પડી શકે છે. હવામાન વિભાગની આ આગાહી વચ્ચે આજે સવારે નવસારી શહેરના પૂર્વ વિસ્તારો જેવા કે સર્કિટ હાઉસ અને ડેપા રોડ આસપાસ પવન સાથે વરસાદી ઝાપટું પડતાં સ્થાનિક લોકોને ગરમીથી થોડી રાહત મળી હતી અને વાતાવરણમાં ઠંડક પ્રસરી હતી. જોકે, ખેડૂતો હજુ પણ વાવણીલાયક ભારે વરસાદની ચાતક નજરે રાહ જોઈ રહ્યા છે.

આગામી 7 દિવસનું પૂર્વાનુમાન: કોઈ મોટું એલર્ટ નહીં
હવામાન વિભાગના ડાયરેક્ટર એ. કે. દાસના જણાવ્યા અનુસાર, આગામી 7 દિવસ માટે ગુજરાત, દીવ, દમણ અને દાદરા નગર હવેલી માટે ભારે વરસાદનું કોઈ મોટું એલર્ટ આપવામાં આવ્યું નથી.
17 અને 18 જૂન: દક્ષિણ ગુજરાતના દરિયાકાંઠાના ભાગોમાં વરસાદી ઝાપટાં ચાલુ રહેશે, જ્યારે ઉત્તર ગુજરાત, મધ્ય ગુજરાત અને સૌરાષ્ટ્ર-કચ્છમાં હવામાન તદ્દન સૂકું રહેશે.
19 થી 22 જૂન: આ દિવસો દરમિયાન સમગ્ર રાજ્યમાં વરસાદની કોઈ શક્યતા નથી અને હવામાન સંપૂર્ણપણે સૂકું રહેવાનું અનુમાન છે.

18 જૂનની આસપાસ એક નવું વેસ્ટર્ન ડિસ્ટર્બન્સ ઉત્તર-પશ્ચિમ ભારત સક્રિય થઈ રહ્યું છે, જેની અસર હેઠળ આગામી દિવસોમાં ચોમાસું મધ્ય અરબ સાગર, બિહાર અને ઝારખંડ તરફ આગળ વધે તેવી સાનુકૂળ પરિસ્થિતિઓ નિર્માણ પામી રહી છે.

ગત વર્ષોની સરખામણી અને 'અલનીનો'નું સંકટ
હવામાન વિભાગના આંકડા અનુસાર, છેલ્લા બે વર્ષમાં ચોમાસાની સ્થિતિ ઘણી સારી હતી. વર્ષ 2025માં 16મી જૂને ચોમાસાનું સત્તાવાર આગમન થઈ ગયું હતું, જ્યારે વર્ષ 2024માં નિયત સમય કરતાં 3 દિવસ વહેલા એટલે કે 12મી જૂને જ મેઘરાજાએ પધરામણી કરી દીધી હતી. જોકે, આ વર્ષે 'અલનીનો' (El Nino) ઇફેક્ટ સક્રિય હોવાના કારણે સંકટ ઘેરાયું છે. ઇન્ડિયન મેટ્રોલોજીકલ ડિપાર્ટમેન્ટ (IMD)ના લોંગ રેન્જ પૂર્વાનુમાન મુજબ, આગામી દિવસોમાં અલનીનોની સ્થિતિ વધુ મજબૂત થવાને કારણે ચાલુ વર્ષે ગુજરાતમાં સામાન્ય કરતાં ઓછો વરસાદ નોંધાય તેવી આશંકા વ્યક્ત કરવામાં આવી છે.

40.6 ડિગ્રી સાથે અમદાવાદ સૌથી ગરમ, તાપમાન યથાવત રહેશે
રાજ્યમાં વરસાદના અભાવે ગરમીનો પારો ઊંચો નોંધાઈ રહ્યો છે. 16 જૂનના રોજ 40.60 ડિગ્રી સેલ્સિયસ તાપમાન સાથે અમદાવાદ રાજ્યનું સૌથી ગરમ શહેર રહ્યું હતું, જ્યારે ભાવનગરમાં 40.2 ડિગ્રી તાપમાન નોંધાયું હતું. આ સિવાય ગાંધીનગર, રાજકોટ અને સુરેન્દ્રનગરમાં પણ પારો 38 ડિગ્રીને પાર પહોંચી ગયો હતો. હવામાન વિભાગના જણાવ્યા અનુસાર, આગામી 7 દિવસ સુધી મહત્તમ તાપમાનમાં કોઈ મોટો ફેરફાર થવાની શક્યતા નથી. અમદાવાદમાં આગામી દિવસોમાં આકાશ મુખ્યત્વે વાદળછાયું રહેશે અને મહત્તમ તાપમાન 41 ડિગ્રીની આસપાસ જળવાઈ રહેશે.