Ahmedabad : દીકરીઓની સુરક્ષા માટે રિવોલ્વર!: સરદારધામના પ્રમુખનું ભડકાઉ નિવેદન...!

ગુજરાતમાં ફરી એકવાર મહિલાઓની સલામતીનો પ્રશ્ન ગરમાયો છે, ત્યારે અમદાવાદના સરદારધામના પ્રભાવશાળી પાટીદાર નેતા ગગજી સુતરિયાએ દીકરીઓની સુરક્ષા અંગે અત્યંત વિવાદાસ્પદ નિવેદન આપ્યું છે. ગગજી સુતરિયાના વિચિત્ર મત અનુસાર, દરેક દીકરીએ પોતાની જાતને બચાવવા માટે કમરમાં રિવોલ્વર ભરાવીને ફરવું જોઈએ. તેમણે એટલું જ નહીં, પરંતુ એવો પણ દાવો કર્યો કે સમાજની જ નહીં, દેશની દરેક દીકરીના કમરે રિવોલ્વર હોવી જોઈએ. આ સાથે જ તેમણે એક સનસનાટીભર્યો દાવો કરતાં કહ્યું કે સરદારધામમાં દીકરીઓને લાઠી અને તલવારની તાલીમ પણ આપવામાં આવે છે.

સરદારધામ ખાતે તાજેતરમાં UPSC અને GPSC જેવી પ્રતિષ્ઠિત પરીક્ષાઓમાં સફળ થયેલા વિદ્યાર્થીઓ માટે એક સન્માન સમારોહનું આયોજન કરવામાં આવ્યું હતું. આ સમારોહમાં ગગજી સુતરિયાએ આ પ્રકારનું ભડકાઉ નિવેદન કરીને ભારે ખળભળાટ મચાવી દીધો છે. તેમના આ નિવેદનથી ઉપસ્થિત લોકો પણ આશ્ચર્યચકિત થઈ ગયા હતા.

જો કે, પોતાના આ નિવેદનનો બચાવ કરતાં ગગજી સુતરિયાએ વધુમાં ઉમેર્યું હતું કે ભારતમાં હવે દરેક વ્યક્તિને આત્મરક્ષણની તાલીમ આપવી એ સમયની માંગ છે અને આ માટે તેઓ દેશના PM સમક્ષ પણ રજૂઆત કરશે. CM ની હાજરીમાં એક જવાબદાર વ્યક્તિ દ્વારા દીકરીઓને રિવોલ્વર રાખવાની સલાહ અને સરદારધામમાં અપાતી લાઠી-તલવારની તાલીમના દાવાએ સમગ્ર રાજ્યમાં તીવ્ર પ્રતિક્રિયાઓ જન્માવી છે અને આ મુદ્દો રાષ્ટ્રીય સ્તરે પણ ચર્ચાનું કેન્દ્ર બન્યો છે. સમાજના આગેવાનનું આ પ્રકારનું નિવેદન કેટલું યોગ્ય છે તે અંગે અનેક સવાલો ઊભા થઈ રહ્યા છે.