ભારે ઉકળાટ બાદ ગુજરાતમાં મેઘરાજાની એન્ટ્રી

Gujarat Rain : દક્ષિણ ગુજરાતમાં મોડી રાત્રે મેઘરાજાએ ધમાકેદાર એન્ટ્રી કરી છે. સુરત, નવસારી, વલસાડ, તાપી અને ડાંગ સહિતના વિસ્તારોમાં સારો વરસાદ નોંધાયો છે. બીજી તરફ સૌરાષ્ટ્રના અનેક જિલ્લાઓમાં પણ વરસાદી માહોલ જામ્યો છે. હવામાન વિભાગે આગામી ચાર દિવસ રાજ્યના અનેક જિલ્લાઓમાં ભારે વરસાદની આગાહી કરતા વહીવટી તંત્રને એલર્ટ રહેવા સૂચના આપવામાં આવી છે.ગુજરાતમાં છેલ્લા 24 કલાકમાં 33 તાલુકાઓમાં સાર્વત્રિક મેઘમહેર થઈ છે.સુરત શહેરમાં સૌથી વધુ 2.5 ઈંચ વરસાદ નોંધાયો છે, જ્યારે અમરેલીના ખાંભા-જાફરાબાદ અને ગીરના ઉના પંથકમાં વાવણી લાયક વરસાદથી ખેડૂતોમાં આનંદ જોવા મળ્યો.રાજ્યમાં ચોમાસું સંપૂર્ણપણે સક્રિય થઈ ગયું છે.સ્ટેટ ડિઝાસ્ટર કંટ્રોલ રૂમના સત્તાવાર આંકડા મુજબ છેલ્લા 24 કલાકમાં ગુજરાતના તમામ ઝોનમાં મેઘરાજાએ પોતાની હાજરી પુરાવી છે.લાંબા સમયના આકરા તાપ અને અસહ્ય ઉકળાટ બાદ મોસમનો પ્રથમ સાર્વત્રિક વરસાદ પડતાં લોકોએ હાશકારો અનુભવ્યો છે.

ગુજરાતમાં ફરી સક્રિય બન્યું ચોમાસું
લાંબા વિરામ બાદ આખરે ગુજરાતમાં ચોમાસાએ ફરી જોર પકડ્યું છે. છેલ્લા કેટલાક દિવસોથી રાજ્યના અનેક વિસ્તારોમાં અસહ્ય ગરમી અને ઉકળાટનો અનુભવ થઈ રહ્યો હતો. જોકે હવે દક્ષિણ ગુજરાતમાં મેઘરાજાની ધમાકેદાર એન્ટ્રી થતાં લોકોને ગરમીમાંથી મોટી રાહત મળી છે.મોડી રાત્રે સુરત સહિત અનેક શહેરોમાં વરસાદ શરૂ થતાં રસ્તાઓ પર પાણી ફરી વળ્યા હતા.વહેલી સવારે પણ અનેક વિસ્તારોમાં ઝરમરથી મધ્યમ વરસાદ ચાલુ રહ્યો હતો.સુરત શહેરમાં રાત્રિના સમયે અચાનક કાળા ડિબાંગ વાદળો છવાઈ ગયા હતા. ત્યારબાદ ગાજવીજ સાથે વરસાદ શરૂ થયો હતો.વરાછા, કતારગામ, અડાજણ, પાલ, અમરોલી, ઉધના, વેસુ, પાંડેસરા સહિત શહેરના અનેક વિસ્તારોમાં સારો વરસાદ વરસ્યો હતો.વરસાદના કારણે રસ્તાઓ પર પાણી ભરાઈ જતાં વાહનચાલકોને થોડી મુશ્કેલીનો સામનો કરવો પડ્યો હતો, પરંતુ ગરમીમાંથી રાહત મળતાં લોકોમાં ખુશી જોવા મળી હતી.

દક્ષિણ ગુજરાતના જિલ્લાઓમાં મેઘમહેર
સુરત ઉપરાંત દક્ષિણ ગુજરાતના અનેક જિલ્લાઓમાં પણ વરસાદ નોંધાયો છે.વલસાડ, નવસારી, ડાંગ અને તાપી જિલ્લામાં મધ્યમથી ભારે વરસાદ વરસતા ખેડૂતોમાં ખુશીનો માહોલ જોવા મળ્યો હતો.ખેતરોમાં લાંબા સમયથી વરસાદની રાહ જોતા ખેડૂતો માટે આ વરસાદ આશીર્વાદ સમાન સાબિત થયો છે.દક્ષિણ ગુજરાતમાં મેઘરાજા મન મૂકીને વરસી રહ્યા છે. સુરત શહેરમાં ધોધમાર 2.5 ઈંચ વરસાદ ખાબકતા સ્માર્ટ સિટીના અનેક નીચાણવાળા વિસ્તારો અને અંડરપાસમાં પાણી ભરાઈ ગયા હતા, જેના કારણે સવારના સમયે નોકરીયાત વર્ગને થોડી મુશ્કેલી પડી હતી. સુરત ગ્રામ્યના કામરેજ અને માંગરોળ હાઇવે પર ભારે વરસાદના કારણે વાહનોની ગતિ ધીમી પડી હતી.બીજી તરફ તાપીના વાલોડમાં 2 ઈંચ અને વલસાડના ઉમરગામમાં 1 ઈંચ વરસાદ થતાં નદી-નાળાઓમાં નવા પાણીની આવક થઈ છે.

સૌરાષ્ટ્રમાં પણ વરસાદી માહોલ,ખેડૂતોમાં ખુશીની લાગણી
દક્ષિણ ગુજરાત બાદ સૌરાષ્ટ્રમાં પણ વરસાદી સિસ્ટમ સક્રિય બની છે.બીજી તરફ સૌરાષ્ટ્રના અમરેલી જિલ્લામાં પણ લાંબા વિરામ બાદ મેઘરાજાએ ધમાકેદાર બેટિંગ કરી છે. જાફરાબાદ તાલુકામાં વહેલી સવારથી જ વરસાદી માહોલ જામ્યો હતો. જાફરાબાદના ગ્રામ્ય વિસ્તારો જેવા કે બાબરકોટ, મીતીયાળા, કડિયાળી અને દુધાળામાં સારો વરસાદ પડતાં સ્થાનિક નદીઓમાં પૂર જેવા દ્રશ્યો સર્જાયા હતા અને રસ્તાઓ પાણી-પાણી થઈ ગયા હતા. ઉના શહેરમાં આકાશ કાળા ડિબાંગ વાદળોથી ઘેરાઈ ગયું હતું અને પવનના સુસવાટા સાથે વરસાદ તૂટી પડ્યો હતો.હવામાન વિભાગના જણાવ્યા અનુસાર આગામી 48 કલાકમાં રાજ્યમાં હજુ પણ ભારે વરસાદની સંભાવના છે.કેટલાક વિસ્તારોમાં ઝાપટાં તો કેટલાક વિસ્તારોમાં ધીમીધારે વરસાદ વરસ્યો હતો.

નવસારીમાં  પ્રથમ જ ઝાપટામાં ખુલ્લી પડી વ્યવસ્થાની ખામીઓ
નવસારી શહેર અને આસપાસના ગ્રામ્ય વિસ્તારોમાં સીઝનનો સારો વરસાદ શરૂ થતાં લોકોને ગરમીમાંથી રાહત મળી છે. લુંસીકુઈ, ટાવર, જુનાથાણા અને જલાલપોર સહિતના વિસ્તારોમાં વરસાદી માહોલ સર્જાયો હતો. બાળકો વરસાદમાં રમતા જોવા મળ્યા જ્યારે ખેડૂતો માટે પણ વરસાદ આશીર્વાદ સમાન બન્યો. પરંતુ પ્રથમ જ વરસાદમાં અનેક માર્ગો પર પાણી ભરાતા અને વરસાદી પાણીના નિકાલમાં વિલંબ થતા મહાનગરપાલિકાની કામગીરી પર સવાલો ઊભા થયા છે.આગામી દિવસોમાં જો ભારે વરસાદ ચાલુ રહે તો નવસારીમાં નીચાણવાળા વિસ્તારોમાં પાણી ભરાવાની સમસ્યા વધુ ગંભીર બની શકે છે. તંત્ર માટે આ સમય કામગીરીની વાસ્તવિક કસોટી સમાન છે.

વલસાડ દરિયાકાંઠાના વિસ્તારોમાં એલર્ટ
વલસાડ જિલ્લામાં આગામી 24 કલાક દરમિયાન ભારે વરસાદની શક્યતા વ્યક્ત કરવામાં આવી છે. દરિયાકાંઠાના વિસ્તારોમાં તેજ પવન અને ઊંચા મોજાંની શક્યતાને ધ્યાનમાં રાખીને માછીમારોને દરિયો ન ખેડવા સૂચના આપવામાં આવી છે.દરિયાકાંઠાના જિલ્લાઓમાં ભારે વરસાદ સાથે પવનની અસર પણ વધુ રહેતી હોવાથી વીજ પુરવઠો અને વાહનવ્યવહાર પર અસર પડી શકે છે.

અમરેલી લાંબા વિરામ બાદ મેઘમહેરથી ખેતીને નવજીવન
અમરેલી જિલ્લામાં વહેલી સવારથી ધોધમાર વરસાદ પડતા નીચાણવાળા વિસ્તારોમાં પાણી ભરાયા હતા.તેમ છતાં ખેડૂતો માટે આ વરસાદ ખૂબ લાભદાયી સાબિત થયો છે.અમરેલી જેવા વરસાદ આધારિત કૃષિ વિસ્તારમાં સમયસર વરસાદ આવવાથી ભૂગર્ભ જળસ્તર સુધરે છે અને ખરીફ સિઝન માટે સકારાત્મક સ્થિતિ સર્જાય છે.ઉના સહિતના ગીર પંથકમાં સવારથી સતત વરસાદ વરસ્યો હતો. કેટલાક વિસ્તારોમાં રસ્તાઓ પર પાણી ફરી વળ્યા છતાં ખેતી માટે વરસાદ અત્યંત લાભદાયી માનવામાં આવી રહ્યો છે.

જૂનાગઢમાં ધીમીધારે વરસાદની શરૂઆત 
જૂનાગઢમાં મેઘરાજાની પધરામણી સાથે ગિરનાર પર્વત પર વાદળોની ચાદર છવાઈ ગઈ હતી. હળવાથી મધ્યમ વરસાદને કારણે સમગ્ર વિસ્તારમાં ઠંડક પ્રસરી ગઈ.આગામી દિવસોમાં જો વરસાદનું પ્રમાણ વધશે તો ગિરનાર અને આસપાસના કુદરતી સ્થળોનું સૌંદર્ય વધુ ખીલી ઊઠશે. જોકે ભારે વરસાદ દરમિયાન પ્રવાસીઓએ સાવચેતી રાખવી જરૂરી રહેશે.

હાલ રાજ્યની સ્થિતિ શું કહે છે?
રાજ્યમાં છેલ્લા 24 કલાક દરમિયાન 33 તાલુકામાં વરસાદ નોંધાયો છે. સુરતમાં સૌથી વધુ અંદાજે 2.60 ઇંચ વરસાદ નોંધાયો જ્યારે કેટલાક વિસ્તારોમાં હળવો વરસાદ નોંધાયો છે. સવારના ચાર કલાકમાં જ 28 તાલુકામાં વરસાદ નોંધાતા સ્પષ્ટ થઈ ગયું છે કે ચોમાસું હવે રાજ્યમાં મજબૂત રીતે સક્રિય થઈ રહ્યું છે.હવામાન વિભાગના અનુમાન મુજબ 3થી 6 જુલાઈ વચ્ચે દક્ષિણ ગુજરાત, મધ્ય ગુજરાત અને સૌરાષ્ટ્રના અનેક જિલ્લાઓમાં ભારેથી અતિભારે વરસાદ પડી શકે છે.નીચાણવાળા વિસ્તારોમાં રહેતા લોકોએ સાવચેતી રાખવી, અનાવશ્યક મુસાફરી ટાળવી અને સ્થાનિક તંત્રની સૂચનાઓનું પાલન કરવું જરૂરી રહેશે. ખેડૂતો માટે આ વરસાદ આશીર્વાદ સમાન બની શકે છે, પરંતુ શહેરી વિસ્તારોમાં વરસાદી પાણીના નિકાલની વ્યવસ્થા ફરી એકવાર સૌથી મોટો પડકાર બનશે.