સુરત પર મેઘરાજાનો મહાકહેર!

Gujarat Heavy Rain Alert Surat: દક્ષિણ ગુજરાતમાં મેઘરાજાએ એવો કહેર વરસાવ્યો કે સુરત શહેર અને આસપાસના વિસ્તારોમાં જાણે આભ ફાટી પડ્યું હોય તેવા દૃશ્યો સર્જાયા.સતત ધોધમાર વરસાદના કારણે શહેરના અનેક વિસ્તારો પાણીમાં ગરકાવ થઈ ગયા, માર્ગો નદીમાં ફેરવાઈ ગયા,વાહનવ્યવહાર સંપૂર્ણપણે ખોરવાઈ ગયો અને સામાન્ય જનજીવન ઠપ થઈ ગયું.ભારે વરસાદને કારણે અલગ-અલગ દુર્ઘટનાઓમાં કુલ 9 લોકોના મોત થયા હોવાના અહેવાલ સામે આવ્યા છે.

બીજી તરફ, છેલ્લા 85 વર્ષમાં સૌથી વધુ વરસાદ નોંધાતા શહેરમાં ઈતિહાસ સર્જાયો છે.વરસાદની ગંભીર સ્થિતિને ધ્યાનમાં રાખીને શાળા-કોલેજોમાં રજા જાહેર કરવામાં આવી છે, જ્યારે સુરતનું વિશ્વપ્રસિદ્ધ કાપડ બજાર પણ બંધ રાખવાનો નિર્ણય લેવામાં આવ્યો છે. રાજ્ય સરકાર અને હવામાન વિભાગે ગુજરાતના 11 જિલ્લાઓમાં હાઈ એલર્ટ જાહેર કરી લોકોને સાવચેત રહેવાની અપીલ કરી છે.જુલાઈ 1941નો 85 વર્ષ જૂનો રેકોર્ડ તોડીને આ વખતે સરથાણામાં 19 અને વરાછામાં 18.16 ઈંચ વરસાદ નોંધાયો છે.શહેરની પાંચમાંથી ચાર ખાડીઓ ઓવરફ્લો થતાં ઝૂંપડપટ્ટીથી લઈને પોશ વિસ્તારો સુધી સર્વત્ર જળબંબાકારની સ્થિતિ સર્જાઈ છે.

18 ઇંચ વરસાદથી સુરત શહેર પાણીમાં ગરકાવ
માત્ર થોડા કલાકોમાં જ સુરતમાં અંદાજે 18 ઇંચ જેટલો વરસાદ વરસતા શહેરના મોટા ભાગના વિસ્તારોમાં પાણી ભરાઈ ગયા. વરાછા,કતારગામ,અડાજણ,ઉધના,પાંડેસરા,લિંબાયત,વેસુ,પાલ અને ડુમસ રોડ સહિત અનેક વિસ્તારોમાં ઘૂંટણથી લઈને કમર સુધી પાણી ભરાયા હતા.રસ્તાઓ પર ઉભેલા પાણીના કારણે હજારો વાહનો ફસાઈ ગયા. અનેક સ્થળોએ કાર અને બાઈક પાણીમાં ડૂબી ગયા.લોકો પોતાના ઘરોમાં જ કેદ થઈ ગયા હતા.નીચાણવાળા વિસ્તારોમાં રહેતા લોકોને સુરક્ષિત સ્થળોએ ખસેડવાની કામગીરી હાથ ધરવામાં આવી.

સ્ટેટ ઇમરજન્સી ઓપરેશન સેન્ટરના આંકડા મુજબ સવારે 6 વાગ્યાથી રાત્રે 8 વાગ્યા સુધી સુરત જિલ્લાના પલસાણામાં 17.56 ઇંચ અને કામરેજમાં 15.87 ઇંચ વરસાદ નોંધાયો હતો. ઉપરાંત નવસારીમાં 14.17 ઇંચ, જલાલપોરમાં 10.08 ઇંચ, સુરત શહેરમાં 12.87 ઇંચ, મહુવામાં 8.27 ઇંચ, બારડોલીમાં 8.07 ઇંચ, અંબિકામાં 7.17 ઇંચ, વલસાડના કપરાડામાં 7.91 ઇંચ અને તાપીના ડોલવણમાં 6.65 ઇંચ વરસાદ નોંધાતા અનેક વિસ્તારોમાં પાણી ભરાવાની સ્થિતિ સર્જાઈ હતી.

85 વર્ષનો વરસાદનો રેકોર્ડ તૂટ્યો
હવામાન વિભાગના પ્રાથમિક આંકડા મુજબ સુરતમાં છેલ્લા 85 વર્ષમાં એક દિવસમાં નોંધાયેલા વરસાદનો રેકોર્ડ તૂટી ગયો છે. આટલા ઓછા સમયમાં આટલો ભારે વરસાદ પડવો અત્યંત અસામાન્ય માનવામાં આવે છે.હવામાન નિષ્ણાતોના જણાવ્યા મુજબ અરબી સમુદ્રમાંથી સતત ભેજ મળતા અને સક્રિય લો-પ્રેશર સિસ્ટમના કારણે ભારે વરસાદની સ્થિતિ સર્જાઈ હતી.વિદ્યાર્થીઓની સુરક્ષાને ધ્યાનમાં રાખીને જિલ્લા વહીવટીતંત્રે તમામ સરકારી તેમજ ખાનગી શાળા-કોલેજોમાં રજા જાહેર કરી છે. અનેક પરીક્ષાઓ પણ મોકૂફ રાખવામાં આવી છે.વાલીઓને પણ અનાવશ્યક રીતે બાળકોને બહાર ન મોકલવાની અપીલ કરવામાં આવી છે.

24 કલાકમાં કુલ 195 તાલુકાઓમાં સાર્વત્રિક વરસાદ 
સમગ્ર રાજ્યની વાત કરીએ તો, છેલ્લા 24 કલાકમાં કુલ 195 તાલુકાઓમાં સાર્વત્રિક વરસાદ નોંધાયો છે. જોકે, સૌથી વધુ તારાજી દક્ષિણ ગુજરાતમાં જોવા મળી છે. સુરત જિલ્લાનું પલસાણા 18.19 ઇંચ વરસાદ સાથે રાજ્યમાં ટોપ પર રહ્યું છે. આ ઉપરાંત કામરેજમાં 14.4 ઇંચ, નવસારીમાં 15.2 ઇંચ, કપરાડામાં 12 ઇંચ અને જલાલપોરમાં 11 ઇંચ જેટલો ભારે વરસાદ નોંધાયો છે.

NDRF, SDRF અને ફાયર વિભાગ મેદાને
પરિસ્થિતિને પહોંચી વળવા માટે NDRF, SDRF, ફાયર બ્રિગેડ, પોલીસ અને સ્થાનિક વહીવટી તંત્રની ટીમો સતત બચાવ અને રાહત કામગીરીમાં જોડાઈ ગઈ.નીચાણવાળા વિસ્તારોમાંથી લોકોને બોટ મારફતે બહાર કાઢવામાં આવ્યા. વૃદ્ધો, મહિલાઓ અને બાળકોને સુરક્ષિત સ્થળોએ પહોંચાડવામાં આવ્યા.

11 જિલ્લાઓમાં હાઈ એલર્ટ
હવામાન વિભાગે સુરત ઉપરાંત નવસારી, વલસાડ, તાપી, ડાંગ, ભરૂચ, નર્મદા, છોટાઉદેપુર, વડોદરા, ભાવનગર અને અમરેલી સહિત 11 જિલ્લાઓમાં ભારે વરસાદની આગાહી સાથે હાઈ એલર્ટ જાહેર કર્યું છે.લોકોને નદી-નાળા નજીક ન જવા, અનાવશ્યક મુસાફરી ટાળવા અને સ્થાનિક તંત્રની સૂચનાઓનું પાલન કરવાની અપીલ કરવામાં આવી છે.સતત વરસાદના કારણે અનેક નદીઓમાં જળસ્તર ઝડપથી વધી રહ્યું છે.કેટલાક ડેમોમાં પણ પાણીની આવકમાં નોંધપાત્ર વધારો થયો છે.
જરૂરિયાત મુજબ ડેમના દરવાજા ખોલવાની સ્થિતિ સર્જાઈ શકે છે, જેના કારણે નીચાણવાળા વિસ્તારોમાં રહેતા લોકોને પહેલેથી જ ચેતવણી આપવામાં આવી છે.

દક્ષિણ ગુજરાતમાં મેઘતાંડવ યથાવત
હવામાન વિભાગના અનુમાન મુજબ જુલાઈની સવારે 8:30 વાગ્યા સુધી સુરત, તાપી, નવસારી, વલસાડ, ડાંગ, દમણ, દાદરા અને નગર હવેલી તેમજ ભાવનગર જિલ્લામાં ભારેથી અતિભારે વરસાદની સંભાવના છે. ઉપરાંત ભરૂચ, નર્મદા, ખેડા, અમરેલી, ગીર સોમનાથ અને દીવ જિલ્લામાં પણ ભારે વરસાદ પડી શકે છે. 8 જુલાઈથી 9 જુલાઈ દરમિયાન સુરત, નવસારી, વલસાડ, ડાંગ, દમણ અને દાદરા-નગર હવેલીમાં ભારેથી અતિભારે વરસાદની શક્યતા વ્યક્ત કરવામાં આવી છે. જ્યારે દાહોદ, નર્મદા, તાપી, છોટાઉદેપુર, અમરેલી અને ભાવનગર જિલ્લામાં ભારે વરસાદની સંભાવના છે. 9થી 10 જુલાઈ દરમિયાન પણ દક્ષિણ ગુજરાતના સુરત, નવસારી, વલસાડ, તાપી, ડાંગ અને દાદરા-નગર હવેલીમાં છૂટાછવાયા સ્થળોએ ભારે વરસાદ ચાલુ રહેવાની આગાહી કરવામાં આવી છે. જોકે બાકીના વિસ્તારોમાં વરસાદનું પ્રમાણ ધીમે ધીમે ઘટવાની શક્યતા છે.વહીવટી તંત્રે તમામ વિભાગોને એલર્ટ મોડ પર રાખ્યા છે અને જરૂરી સાધનો તથા માનવબળ તૈયાર રાખવામાં આવ્યું છે.

આજે ક્યાં જિલ્લાઓમાં કયું એલર્ટ ?
ગુજરાતમાં ચોમાસું ફરી સક્રિય બનતાં હવામાન વિભાગે રાજ્યના અનેક વિસ્તારો માટે ભારે વરસાદની આગાહી કરી છે. ખાસ કરીને દક્ષિણ ગુજરાત અને સૌરાષ્ટ્રના કેટલાક જિલ્લાઓમાં આગામી કલાકોમાં ભારે વરસાદ પડી શકે છે.આ સ્થિતિને ધ્યાનમાં રાખીને ભારતીય હવામાન વિભાગ (IMD)એ નવસારી અને ડાંગ જિલ્લામાં ઓરેન્જ એલર્ટ જાહેર કર્યું છે.IMDએ ભાવનગર, ભરૂચ, છોટાઉદેપુર, દાહોદ, સુરત, તાપી અને અમરેલી જિલ્લામાં યલો એલર્ટ જાહેર કર્યું છે.આ વિસ્તારોમાં મધ્યમથી ભારે વરસાદ પડવાની સંભાવના છે.

અમદાવાદમાં પણ વરસાદની સંભાવના
અમદાવાદ શહેરમાં પણ દિવસ દરમિયાન વાદળછાયું વાતાવરણ રહેવાની શક્યતા છે. હવામાન વિભાગે ગાજવીજ સાથે વરસાદની આગાહી કરી છે. કેટલાક વિસ્તારોમાં અચાનક ભારે ઝાપટાં પડી શકે છે.સાથે જ 40થી 50 કિલોમીટર પ્રતિ કલાકની ઝડપે પવન ફૂંકાવાની શક્યતા હોવાથી ખુલ્લી જગ્યાઓ પર ખાસ સાવચેતી રાખવા જણાવાયું છે.