Gujarat સરકારના કર્મચારીઓને મોટો લાભ: મોંઘવારી ભથ્થામાં વધારો

ગુજરાત સરકારે રાજ્યના સરકારી કર્મચારીઓ અને પેન્શનર્સ માટે ખુશખબર આપી છે. મુખ્યમંત્રી ભૂપેન્દ્ર પટેલના અધ્યક્ષસ્થાને મળેલી રાજ્ય કેબિનેટની બેઠકમાં સરકારી કર્મચારીઓના મોંઘવારી ભથ્થામાં (Dearness Allowance - DA) વધારો કરવાનો મહત્ત્વપૂર્ણ નિર્ણય લેવાયો છે. આ નિર્ણયથી રાજ્યના 4.78 લાખ કર્મચારીઓ અને 4.81 લાખ પેન્શનર્સને સીધો લાભ થશે.   મોંઘવારી ભથ્થામાં કેટલો વધારો?

• સાતમા પગારપંચનો લાભ લેતા કર્મચારીઓ માટે મોંઘવારી ભથ્થામાં 2 ટકાનો વધારો કરવામાં આવ્યો છે. હાલના 53 ટકા DAને બદલે હવે 55 ટકા DA મળશે.
• છઠ્ઠા પગારપંચનો લાભ લેતા કર્મચારીઓ માટે 6 ટકાનો વધારો જાહેર કરાયો છે.
• આ વધારો 1 જાન્યુઆરી, 2025થી લાગુ થશે, અને 1 જાન્યુઆરીથી 31 માર્ચ, 2025 સુધીની તફાવતની રકમ (એરિયર્સ) એપ્રિલ-2025ના પગાર સાથે ચૂકવાશે.

આ પહેલાં ડિસેમ્બર 2024માં રાજ્ય સરકારે 1 જુલાઈ, 2024થી 3 ટકાનો વધારો કરીને 53 ટકા DA મંજૂર કર્યું હતું. હવે આ નવો વધારો કેન્દ્ર સરકારના ધોરણોને અનુરૂપ છે, જેમણે જાન્યુઆરી 2025માં પોતાના કર્મચારીઓ માટે DAમાં વધારો જાહેર કર્યો હતો.   કોને મળશે લાભ?

• રાજ્ય સરકારના તમામ કર્મચારીઓ, જેમના પ્રોવિડન્ટ ફંડ ખાતા રાજ્ય સરકાર હસ્તક છે.
• પંચાયત કર્મચારીઓ, માધ્યમિક અને ઉચ્ચતર માધ્યમિક શાળાઓના શૈક્ષણિક-બિનશૈક્ષણિક કર્મચારીઓ.
• સહાયક અનુદાન મેળવતી બિનસરકારી શાળાઓ/સંસ્થાઓના કર્મચારીઓ, જેમને સાતમા પગારપંચ મુજબ પગાર સુધારણા મળેલી છે.
• પ્રાથમિક શિક્ષકો, પંચાયતમાં પ્રતિનિયુક્તિ/બદલી પામેલા કર્મચારીઓ, અને કામ પૂરતા મહેકમ પરના કર્મચારીઓ, જેમને સાતમા પગારપંચનો લાભ મળે છે.
• અખિલ ભારતીય સેવા (AIS) અધિકારીઓને પણ આ લાભ મળશે.

આર્થિક અસર

• એરિયર્સની ચુકવણી: રાજ્ય સરકાર આ નિર્ણય હેઠળ કર્મચારીઓને રૂ. 235 કરોડની એરિયર્સની ચુકવણી કરશે.
• વાર્ષિક ખર્ચ: મોંઘવારી ભથ્થા અને પેન્શનની ચુકવણી માટે વધારાના રૂ. 946 કરોડનો વાર્ષિક ખર્ચ થશે.
• નાણાં વિભાગને આ માટે જરૂરી આદેશો જારી કરવા સૂચના આપવામાં આવી છે.

મોંઘવારી ભથ્થું શું છે? મોંઘવારી ભથ્થું એ સરકારી કર્મચારીઓ, જાહેર ક્ષેત્રના કર્મચારીઓ અને પેન્શનર્સને મોંઘવારીની અસરથી તેમનું જીવનધોરણ જાળવવા માટે આપવામાં આવતી રકમ છે. તેની ગણતરી દર 6 મહિને દેશના મોંઘવારી દરના આધારે થાય છે અને કર્મચારીના મૂળ પગાર પ્રમાણે નક્કી થાય છે. શહેરી, અર્ધશહેરી અને ગ્રામીણ વિસ્તારોમાં આ ભથ્થું અલગ-અલગ હોઈ શકે છે.   ગુજરાત સરકારનો આ નિર્ણય રાજ્યના લાખો કર્મચારીઓ અને પેન્શનર્સ માટે નાણાકીય રાહત લાવશે. આ પગલું સરકારની કર્મચારી હિતલક્ષી નીતિઓનું પ્રતિબિંબ છે, જે મોંઘવારીના સમયમાં તેમની આર્થિક સ્થિતિને મજબૂત કરશે.   આ પણ વાંચો : Ahmedabad માં ગુનેગારોની ગેરકાયદે મિલકતો પર Bulldozer નો કહેર   આપ અમારી WhatsApp ચેનલ સાથે પણ જોડાઇ શકો છો