જાણો નવા વર્ષે કેટલુ વધ્યું TRB જવાનોનું વેતન!

ગુજરાત સરકારના ગૃહ વિભાગ દ્વારા રાજ્યમાં ટ્રાફિક નિયમનની કામગીરીમાં મહત્વનું યોગદાન આપી રહેલા ટ્રાફિક બ્રિગેડ (TRB)ના જવાનોના હિતમાં એક સંવેદનશીલ નિર્ણય લેવામાં આવ્યો છે.

છેલ્લા 9 વર્ષના લાંબા સમય બાદ, રાજ્ય સરકારે TRB જવાનોના દૈનિક માનદ વેતનમાં ₹150નો વધારો કરવાની જાહેરાત કરી છે. આ નિર્ણય સાથે હવે જવાનોને પ્રતિદિન ₹300ને બદલે ₹450 ચૂકવવામાં આવશે, જેનો સીધો લાભ રાજ્યના અંદાજે 10,000થી વધુ જવાનો અને તેમના પરિવારોને મળશે.

ગૃહ રાજ્ય મંત્રી હર્ષ સંઘવીએ સોશિયલ મીડિયા પર આ અંગેની સત્તાવાર જાણકારી આપતા જણાવ્યું હતું કે, મુખ્યમંત્રી ભૂપેન્દ્ર પટેલના દિશાનિર્દેશ હેઠળ લેવાયેલો આ નિર્ણય આજથી જ અમલી બનશે. ઉલ્લેખનીય છે કે, વર્ષ 2018 થી TRB જવાનોના વેતનમાં કોઈ ફેરફાર થયો નહોતો.

કાળઝાળ ગરમી, કકડતી ઠંડી કે ધોધમાર વરસાદમાં રસ્તા પર ઉભા રહીને ટ્રાફિક પોલીસને પૂરક બનતા આ જવાનોની મહેનતની કદર રૂપે સરકારે આ આર્થિક પ્રોત્સાહન પૂરું પાડ્યું છે. રાજ્યના મોટા શહેરોમાં ટ્રાફિક એજ્યુકેશન ટ્રસ્ટ દ્વારા શરૂ થયેલી આ વ્યવસ્થા આજે સમગ્ર ગુજરાતમાં કાર્યરત છે.

સરકારી સૂત્રોના જણાવ્યા અનુસાર, મોંઘવારીના સમયમાં જવાનોની આર્થિક સ્થિતિને મજબૂત કરવા માટે આ પગલું ભરવામાં આવ્યું છે. આ જાહેરાત બાદ રાજ્યભરના TRB જવાનોમાં ખુશીની લહેર જોવા મળી રહી છે, કારણ કે લાંબા સમયથી પડતર આ માંગણી સંતોષાતા હવે તેમના માસિક આવકમાં અંદાજે ₹4,500 સુધીનો વધારો થશે.