ગુજરાતનો દરિયા કિનારો ડ્રગ્સની હેરાફેરી માટે હોટ ફેવરિટ બન્યો

ગુજરાતના દરિયા કિનારેથી છેલ્લા 5 વર્ષમાં અંદાજે 70 હજાર કરોડ રુપિયાનું ડ્રગ્સ ઝઢપાયું છે.ય આ વર્ષના જાન્યુઆરી મહિનાથી ડિસેમ્બર મહિના સુધીના આંકડા જોઇએ તો કચ્છ પોલીસે 113.56 કરોડનું ડ્રગ્સ પકડીને 61 આરોપીને ઝડપી પાડ્યા છે. કચ્છના બોર્ડર એરિયા અને દરિયાઇ સીમા પર પોલીસ અને કોસ્ટ ગાર્ડ એલર્ટ હોવાના કારણે સતત ડ્રગ્સ પકડાઇ રહ્યું છે. ગુજરાત એટીએસ પણ આ ઓપરેશનમાં સામેલ છે અને પાકિસ્તાન અને ઇરાનના ડ્રગ પેડલર પકડાઇ રહ્યા છે. 

મળેલી માહિતી મુજબ 2020માં ગુજરાતમાં 5956 કરોડ રુપિયાની એક ખેપ અને 20 હજાર કરોડ રુપિયાની અન્ય ખેપ પકડાઇ હતી જ્યારે 2021માં 21 હજાર કરોડ અને 3 હજાર કરોડની ખેપ પકડાઇ હતી. 2022ની વાત કરીએ તો ત્રણ અલગ અલગ દરોડામાં તબક્કાવાર 500 કરોડ, 700 કરોડ અને 1 હજાર કરોડ રુપિયાનું ડ્રગ્સ પકડાયું હતું તો એક સાથે 2 હજાર કરોડ રુપિયાનું પણ ડ્રગ્સ પકડાયું હતું. 

ગયા વર્ષની એટલે કે 2023ના વર્ષની વાત કરીએ તો 2023માં 5 હજાર કરોડ રુપિયાનું ડ્રગ્સ પકડાયું હતું અને 2024માં 200 કરોડનું ડ્રગ્સ ઝડપાયું હતું. કોસ્ટગાર્ડ તથા ગુજરાત એટીએસ અને એનસીબીએ 700 કરોડનું ડ્રગ્સ પણ પકડ્યું હતું. બીજી તરફ અંકલેશ્વરની કંપનીમાંથી પણ 5 હજાર કરોડનું ડ્રગ્સ ઝડપાયું હતું.

હવે ઇન્ટરનેશનલ ડ્રગ્સ માફિયાઓ ગુજરાતના દરિયા કિનારેથી ભારતમાં ડ્રગ્સ ઘુસાડવાનો પ્રયાસ કરી રહ્યા છે પણ સુરક્ષા એજન્સીઓની સતર્કતાના કારણે ડ્રગ્સ અને પેડલર્સ મોટી સંખ્યામાં પકડાઇ રહ્યા છે. ગુજરાતમાં ડ્રગ્સ ઉતારીને ભારતમાં અન્ય સ્થળોએ ડિલીવરી કરવામાં આવે છે અને ડ્રગ્સની હેરાફેરી કરાય છે.