J&K માં ફસાયેલા ગુજરાતઓની વહારે આવી સરકાર

જમ્મુ-કાશ્મીરના રામબન વિસ્તારમાં લેન્ડસ્લાઇડિંગની ઘટનામાં ફસાયેલા ગુજરાતના તમામ 50 યાત્રિકો સુરક્ષિત અને સલામત હોવાની માહિતી રાહત કમિશનર શ્રી આલોક કુમાર પાંડેએ આપી છે. આ ઘટનામાં ગુજરાતના યાત્રિકોની ટ્રાવેલ્સ બસ લેન્ડસ્લાઇડિંગથી દૂર સુરક્ષિત ઝોનમાં છે, અને તમામ મુસાફરોને કોઈ જોખમ નથી.   મુખ્યમંત્રીની તાત્કાલિક કાર્યવાહી
  આ ઘટનાની જાણ થતાં જ ગુજરાતના મુખ્યમંત્રી શ્રી ભૂપેન્દ્ર પટેલે રાહત કમિશનર તંત્રને જમ્મુ-કાશ્મીર સરકારના સંબંધિત વિભાગો સાથે સંપર્ક સાધી યાત્રિકોની સુરક્ષા સુનિશ્ચિત કરવા સૂચના આપી હતી. મુખ્યમંત્રીના નિર્દેશોને પગલે ગુજરાત સ્ટેટ ઇમરજન્સી ઓપરેશન સેન્ટરે તાત્કાલિક જમ્મુ-કાશ્મીરના અધિકારીઓ સાથે સંકલન કરીને યાત્રિકોની સલામતીની ખાતરી કરી. આર્મીની મદદ અને વ્યવસ્થા
  રાહત કમિશનર શ્રી પાંડેના જણાવ્યા અનુસાર, આર્મીના જવાનોએ ગુજરાતના યાત્રિકોને ભોજન, પાણી અને અન્ય જરૂરી સુવિધાઓ પૂરી પાડી છે. આ ઉપરાંત, તમામ 50 યાત્રિકો માટે રહેવા અને જમવાની વ્યવસ્થા આર્મી કેમ્પ ખાતે કરવામાં આવી છે. હાલ કોઈ યાત્રિકને મેડિકલ ઇમરજન્સી નથી, અને તેઓ સંપૂર્ણ સુરક્ષિત છે.
જમ્મુ-કાશ્મીર પ્રશાસન દ્વારા લેન્ડસ્લાઇડિંગમાં ફસાયેલી ટ્રાવેલ્સ બસને સુરક્ષિત રીતે બહાર કાઢવાની કામગીરી ઝડપથી ચાલી રહી છે. આ કામગીરી પૂર્ણ થતાં યાત્રિકોને વધુ સુરક્ષિત સ્થળે ખસેડવામાં આવશે.
આ ઘટના અંગે વધુ માહિતી મેળવવા માટે ગુજરાત સ્ટેટ ઇમરજન્સી ઓપરેશન સેન્ટર, ગાંધીનગરનો સંપર્ક નંબર 079-23251900 પર સંપર્ક કરી શકાય છે.   આ ઘટનામાં ગુજરાત સરકાર, જમ્મુ-કાશ્મીર પ્રશાસન અને ભારતીય સેનાના સંકલિત પ્રયાસોથી યાત્રિકોની સુરક્ષા સુનિશ્ચિત થઈ છે, જે એક ઉત્તમ ઉદાહરણ છે.