ઈન્ડિગો સામે સરકારનું એક્શન, ફ્લાઈટ શેડ્યૂલમાં કાપ

ભારતની સૌથી મોટી ખાનગી એરલાઈન ઈન્ડિગો સામે હવે કેન્દ્ર સરકાર કડક વલણ અપનાવવાના મૂડમાં દેખાઈ રહી છે. છેલ્લા કેટલાક દિવસો(લગભગ એક અઠવાડિયા)થી સતત ફ્લાઈટ રદ થવાને કારણે દેશભરના એરપોર્ટ પર મુસાફરો ભારે મુશ્કેલીમાં મુકાયા છે. હજારો મુસાફરોને રઝળાયા , બેગેજ વિલંબ અને ટિકિટ રિફંડની સમસ્યાનો સામનો કરવો પડી રહ્યો છે.

શરૂઆતમાં નોટિસ સુધી સીમિત રહેલી કાર્યવાહી બાદ હવે કેન્દ્ર સરકારે ઈન્ડિગો સામે હકીકતમાં પગલાં ભરવાની તૈયારીઓ શરૂ કરી છે. કેન્દ્રીય નાગરિક ઉડ્ડયન મંત્રી રામ મોહન નાયડુએ સ્પષ્ટ સંકેત આપ્યો છે કે ઈન્ડિગોની દૈનિક ફ્લાઈટ સંખ્યા ઘટાડવામાં આવશે. હાલ ઈન્ડિગો અંદાજે 2200 ફ્લાઈટ રોજ સંચાલિત કરે છે, જેમાં નોંધપાત્ર કાપ મૂકવાની તૈયારી છે.

સરકારનું કહેવું છે કે ફ્લાઈટ શેડ્યૂલમાં ઘટાડો કરવાથી બાકી રહેલી ફ્લાઈટ્સનું સંચાલન વધુ સારી રીતે થઈ શકશે અને મુસાફરોની તકલીફ ઓછી થશે. સાથે જ અન્ય એરલાઈન્સને સ્લોટ ફાળવવાની પ્રક્રિયા પણ હાથ ધરાય તેવી શક્યતા છે, જેથી ઉડ્ડયન વ્યવસ્થામાં સંતુલન જળવાઈ રહે.

સરકારી આંકડાઓ મુજબ, 1 ડિસેમ્બરથી 8 ડિસેમ્બર દરમિયાન આશરે 7.30 લાખ ટિકિટ માટે લગભગ ₹745 કરોડનું રિફંડ આપવામાં આવ્યું છે. ઉપરાંત, રદ થયેલી ફ્લાઈટ્સના કારણે અટવાયેલા 9 હજાર બેગમાંથી આશરે 6 હજાર બેગ પ્રવાસીઓને પરત સોંપી દેવાઈ છે.

બીજી તરફ, DGCA દ્વારા આપવામાં આવેલી શો-કોઝ નોટિસના જવાબમાં ઈન્ડિગોએ ટેક્નિકલ ખામીઓ, શિયાળાનું એર ટ્રાફિક શીડ્યુલ (ATC), ખરાબ હવામાન, એરપોર્ટ પર વધતી ભીડ અને નવા ક્રૂ નિયમો જેવા કારણો રજૂ કર્યા છે.

આ સમગ્ર સંકટની અસર શેર માર્કેટ પર પણ જોવા મળી છે. છેલ્લા એક અઠવાડિયામાં ઈન્ડિગોના શેરમાં લગભગ 17 ટકાનો ઘટાડો નોંધાયો છે, જેના કારણે કંપનીની માર્કેટ વેલ્યૂ અંદાજે 4.3 અબજ ડોલર ઘટી છે. હવે સરકારના આગામી પગલાં ઉડ્ડયન ક્ષેત્ર માટે નિર્ણાયક સાબિત થઈ શકે છે.