Rajkot- Bhavnagar હાઈવે પર મોતનું તાંડવ, બે કાર અથડાતા ચાર ભડથું!

રાજકોટ-ભાવનગર હાઈવે પર સરધાર-ભાડલા રોડ પર આજે એક ભયાનક અકસ્માત સર્જાયો હતો. બે કાર, એક અલ્ટો અને એક હોન્ડા સિટી, વચ્ચે જોરદાર અથડામણ થઈ હતી. અથડામણ એટલી ભીષણ હતી કે બંને કારમાં તરત જ આગ લાગી ગઈ હતી. આ દુર્ઘટનામાં ચાર લોકોના મોત થયા હોવાની આશંકા સેવાઈ રહી છે.

અકસ્માતના પગલે ઘટનાસ્થળે ભારે અફરાતફરીનો માહોલ સર્જાયો હતો. આગની જ્વાળાઓ અને ધુમાડાના ગોટેગોટા દૂરથી દેખાતા હતા. આગ એટલી વિકરાળ હતી કે મૃતકોની ઓળખ કરવી પણ મુશ્કેલ બની ગઈ છે. આ ઘટનાની જાણ થતાં જ આજીડેમ પોલીસ તાત્કાલિક ઘટનાસ્થળે પહોંચી ગઈ હતી અને તપાસ શરૂ કરી દીધી છે.

પોલીસના જણાવ્યા અનુસાર, અકસ્માત કયા કારણોસર થયો તે હજુ સુધી જાણી શકાયું નથી. જો કે, પ્રાથમિક તપાસમાં સામસામેની ટક્કર હોવાનું જણાય છે. આગને કારણે બંને કાર સંપૂર્ણપણે બળીને ખાખ થઈ ગઈ છે, જેના કારણે અંદર રહેલા લોકો બહાર નીકળી શક્યા નહોતા. આ ગોઝારી ઘટનાને પગલે સમગ્ર વિસ્તારમાં શોકની લાગણી છવાઈ ગઈ છે. પોલીસ વધુ તપાસ કરી રહી છે અને મૃતકોની ઓળખ કરવાનો પ્રયાસ કરી રહી છે. આ અકસ્માતે ફરી એકવાર હાઈવે પર સલામતીના મુદ્દાને ચર્ચામાં લાવી દીધો છે.