પાટીદાર અનામત આંદોલનના તમામ કેસ પરત ખેંચ્યા હોવાના દાવાની પોલ ખુલી

પાટીદાર અનામત આંદોલન સમયે નોંધાયેલા તમામ કેસ પરત ખેંચ્યા હોવાનો રાજ્ય સરકારના પ્રવક્તા મંત્રી ઋષિકેશ પટેલ અને ગૃહ રાજ્યમંત્રી હર્ષ સંઘવીએ શુક્રવારે દાવો કર્યો હતો. પાટીદાર અનામત આંદોલન સમિતિના પૂર્વ કન્વિનરો સતીષ પટેલ અને સુરેશ પટેલ ઉર્ફે ઠાકરેએ રાજ્ય સરકારના આ દાવાની પોલ ખોલી નાખી છે. પાટીદાર અનામત આંદોલનના એપી સેન્ટર અને ઋષિકેશ પટેલના માદરે વતન મહેસાણા જિલ્લામાં 7થી વધુ કેસ પરત નહી ખેંચાયા હોવાનો બંને કન્વિનરોએ દાવો કરી રાજ્ય સરકારની વ્હાલા દવલાની નીતિ સામે સવાલ ઉઠાવ્યા છે. 

પાટીદાર અનામત આંદોલનમાં સક્રિય આગેવાની કરનાર પાસના પૂર્વ કન્વિનર સતિષ પટેલે બેનિફિટ ન્યૂઝ સાથે વાતચીત કરતાં જણાવ્યું હતુ કે, અમે છેલ્લા 10 વર્ષથી સ્ટેટમેન્ટ સાંભળી રહ્યાં છીએ કે સરકારે કેસ પરત ખેંચ્યા છે. પરંતુ હજુ સુધી સુનાવણી ચાલુ છે અને કેટલાક કેસના ચુકાદા પણ આવી ગયા છે. ઘણા કેસોનો નિકાલ આવ્યો છે પણ હજુ સુધી સરકારે પરત ખેંચ્યો હોય તેવો એકપણ કેસ નથી. જો સાચા અર્થમાં કેસ પાછા ખેંચ્યાં હોય તો અમે સરકારને અભિનંદન પાઠવીએ છીએ. પરંતુ, મહેસાણામાં હજુ એકપણ કેસ પાછો ખેંચાયો નથી. અમે ગુરૂવારે જ મુદત ભરીને આવ્યા છીએ. 

પાટીદાર અનામત આંદોલન સમિતિના પૂર્વ કન્વિનર સુરેશ પટેલ ઉર્ફે ઠાકરેએ બેનિફિટ ન્યૂઝ સાથે વાત કરતાં જણાવ્યું કે, જે લોકો રાજકીય રીતે સરકાર સાથે જોડાયેલા છે તેવા લોકોના કેસ પાછા ખેંચવામાં આવ્યા છે. શુક્રવારે લેવાયેલા નિર્ણયમાં મહેસાણા જિલ્લાનો માત્ર એક કેસ પરત ખેંચાયો છે. હજુ 7થી વધુ કેસ બાકી છે. સરકારે કેસ પરત ખેંચવામાં ઘણું મોડું કર્યુ છે. છેલ્લાં 7 વર્ષથી તમામ કેસમાં કોર્ટની મુદતોથી હેરાન થઈ ગયા છીએ. અમારા લાખો રૂપિયા વકીલોની ફી પાછળ ખર્ચાઈ ચૂક્યા છે. 

પાટીદાર અનામત આંદોલનના એપી સેન્ટર અને પ્રવક્તા મંત્રી ઋષિકેશ પટેલના માદરે વતન મહેસાણા જિલ્લામાં અનેક કેસો નોંધાયા હતા. જેમાં 7 થી વધુ કેસો પરત નહી ખેંચાયા હોવાનો પૂર્વ પાસ કન્વિનરોએ દાવો કરતાં રાજ્ય સરકારના દાવાની પોલ ખુલી ગઈ છે. મહેસાણા જિલ્લાના 7 કેસ પૈકી રાજ્ય સરકાર દ્વારા કેસ પરત ખેંચવાની કરાયેલી જાહેરાતમાં એક માત્ર કડીના કેસને બાદ કરતાં અન્ય કેસ પરત ખેંચાયાં નથી અને તમામ કેસ મહેસાણા કોર્ટમાં ચાલવા ઉપર છે.

ઉલ્લેખનીય છે કે, અનામતની માંગણીને લઈ પાટીદાર સમાજે મહેસાણાથી જુલાઈ-2015માં આંદોલનની શરૂઆત કરી હતી. વિસનગરમાં ધારાસભ્ય ઋષિકેશ પટેલના કાર્યાલય ઉપર તોડફોડ બાદ કરેલી આગચંપીના કારણે આંદોલન રાજ્યમાં દાવાનળની માફક પ્રસર્યુ હતું. આંદોલન સમયે પાટીદાર નેતાઓ અને યુવાનો ઉપર પોલીસ દ્વારા વિવિધ કલમો હેઠળ કેસ કરવામાં આવ્યા હતા. આંદોલન સમયે પોલીસ સાથે ઘર્ષણમાં ઉતરેલા 14 યુવાનોએ જીવ પણ ખોયા હતા.