ગોપાલ નમકીનમાં લાગેલી આગ અને જીએસટીને કનેક્શન ?

રાજકોટની મટોડા જીઆઇડીસીમાં આવેલી ગોપાલ નમકીન ફેક્ટરીમાં બુધવારે ભીષણ આગ ફાટી નિકળી હતી. આગને કાબુમાં કરવા લાશ્કરોને ભારે પરસેવો પાડવો પડ્યો હતો. મોડી રાતે આગને કાબુમાં કરવામાં આવી છે. જો કે સમગ્ર મામલે એક ચોંકાવનારી માહિતી બહાર આવી છે જેમાં ગોપાલ નમકીનને 13.50 કરોડની જીએસટી ભરવા માટે 2 દિવસ પહેલાં જ સીજીએસટી વિભાગે કંપનીને નોટિસ ફટકારી હોવાની ચર્ચા છે.

રાજકોટની ગોપાલ નમકીન ફેકટરીમાં બુધવારે વિકરાળ આગ લાગી હતી. કંપનીના પ્રોડક્શન યુનિટમાં લાગેલી આ આગના કારણે કંપનીના કામદારોમાં દોડધામ મચી ગઇ હતી અને રાજકોટ સહિત આસપાસના સ્થળોએથી ફાયર બ્રિગેડને બોલાવાયું હતું. ફાયર બ્રિગેડે મોડી રાત સુધી કામગિરી કરીને આગ બુઝાવી હતી. જો કે કોઇ જાનહાનિ થઇ ન હતી. ફેક્ટરીમાં રહેલી વેફર, તેલ અને પ્લાસ્ટીકની ચીજોના કારણે આગ વિકરાળ બની હતી.

દરમિયાન , એવી પણ ચોંકાવનારી માહિતીની ચર્ચા થઇ રહી છે કે ગોપાલ નમકીને આવક અને નફા પ્રમાણે સરકારને ટેક્સ જ ચુકવ્યો ન હતો. સેન્ટ્રલ જીએસટી વિભાગે કંપનીને અગાઉ પણ તાકીદ કરી હતી અને 13.50 કરોડનો ટેક્સ ભરી દેવા 2 દિવસ પહેલાં જ નોટિસ ફટકારી હતી અને ટેક્સ નહીં ભરાય તો પેનલ્ટીની પણ ચીમકી આપી હતી. હવે એ પણ તપાસ કરાઇ રહી છે કે કંપનીમાં લાગેલી આગ અને જીએસટીની આ નોટિસ વચ્ચે કોઇ કનેક્શન તો નથી ને...?