આખરે રાજ્યમાં ઠંડીનું જોર ઘટશે,તાપમાનમાં થશે વધારો

ગુજરાતવાસીઓ છેલ્લા કેટલાક દિવસથી બેવડી ઋતુનો અનુભવ કરી રહ્યાં છે. કેટલાક દિવસ તાપમાનનો પારો વધી જતાં ગરમીનો અનુભવ થાય છે. તો કેટલાક દિવસ તાપમાન ઘટી જતાં ઠંડીનો અનુભવ થાય છે. ત્યારે હવે આગામી 24 કલાક બાદ તાપમાનમાં 2થી 3 ડિગ્રીનો વધારો થતા ઠંડીનું જોર ઘટશે. ત્યાર બાદ તાપમાન યથાવત્ રહેશે. રાજ્યમાં છેલ્લા બે દિવસથી વાતાવરણમાં પલ્ટો જોવા મળી રહ્યો છે. છેલ્લા બે દિવસથી વાદળછાયા વાતાવરણને પગલે ખેડૂતો ચિંતામાં મૂકાયા છે. ત્યારે જો રાજ્યમાં માવઠું થાય તો ખેડૂતોને ભારે નુકસાન સહન કરવાનો વારો આવી શકે છે. હવામાન વિભાગ દ્વારા હવામાનને લઈ આગાહી કરવામાં આવી છે.

હવામાન વિભાગના જણાવ્યા અનુસાર, આગામી સાત દિવસ વાતાવરણ સૂકુ રહેશે. તેમજ 24 કલાક દરમ્યાન તાપમાનમાં બે થી ત્રણ ડિગ્રીનો ઘટાડો થશે. તેમજ ત્યાર બાદ તાપમાનમાં બે થી ત્રણ ડિગ્રીનો વધારો પણ થશે.તેમજ ઉત્તર તરફથી પવનો ફૂંકાતા તાપમાન નીચું જશે. તેમજ દક્ષિણ રાજસ્થાન બાજુથી સાઈક્લોનિક સર્ક્યુલેશનનાં કારણે પવનની દિશા બદલાતા તાપમાન નીચું જવાની શક્યતાઓ છે.