Mahisagar જિલ્લામાં દીકરીનો અંગ્રેજીમાં જાતિનો દાખલો નહી મળતાં પિતાનો આપઘાત 

સુરેશ વણોલ, અમદાવાદ

મહીસાગર (Mahisagar) જિલ્લાના કડાણા તાલુકાના રણકપુર ગામમાં દીકરીને જાતિનો અંગ્રેજીમાં દાખલો નહી મળતાં પિતાએ આપઘાત કર્યાનો કિસ્સો બન્યો છે. પુત્રીને નોકરીમાં જરૂરી જાતિનો દાખલો નહી મળવાથી ગળે ફાંસો ખાઈ આપઘાત કર્યો છે. મૃતક પાસેથી મળેલી સુસાઈડ નોટમાં મામલતદારના માનસિક ત્રાસથી આપઘાત કર્યાનો ઉલ્લેખ કરાતા પોલીસે ગુનો નોંધી વધુ તપાસ હાથ ધરી છે. નાયબ મામલતદારે પરિવારજનોના આક્ષેપને પાયાવિહોણો ગણાવ્યો છે. 

કડાણા તાલુકાના રણકપુર ગામે ઉદાભાઇ ડામોરે ગળે ફાંસો ખાઈ જીવન ટૂંકાવી લીધુ છે. ઉદાભાઈ ડામોરની દીકરી ધ્રવિશાને પોસ્ટની નોકરી માટે અંગ્રેજીમાં જાતિના દાખલાની જરૂરીયાત હતી. આ માટે તેઓ ઘણાં સમયથી કડાણા મામલતદાર કચેરીના ધક્કા ખાતા હતા. પરિવારજનોના જણાવ્યા પ્રમાણે મૃતકે તમામ આધાર પુરાવા રજૂ કર્યા હોવા થતાં દીકરીનો આદિજાતિનો દાખલો મળ્યો નહોતો. મામલતદાર કચેરીના ધક્કા ખાઈને થાકી ગયેલા પિતાએ સુસાઈડ નોટ લખીને આત્મહત્યા કરી હતી. સુસાઈડ નોટમાં મૃતકે મામલતદાર સામે ગંભીર આક્ષેપો કર્યા છે. કડાણા મામલતદારના ત્રાસથી તેઓએ આપઘાત કર્યાનો ઉલ્લેખ છે. પોલીસે ઘટના સ્થળે પહોંચી સુસાઈડ નોટ મેળવી આપઘાતના કારણો અંગે તપાસ હાથ ધરી છે. 

ઉલ્લેખનીય છે કે, મહીસાગર (Mahisagar)ના કડાણા તાલુકામાં આદિજાતિના દાખલાને લઈ અગાઉ પણ આંદોલન થયું હતું. ઉદાભાઈ ડામોર પોતે કડાણા પોલીસમાં જીઆરડી તરીકે ફરજ બજાવતા હતા. તેમની દીકરી ધ્રુવિશાને પોસ્ટમાં નોકરી માટે અંગ્રેજીમાં જાતિનો દાખલો જરૂરી હતો. પરંતુ જાતિનો દાખલો નહી મળતાં ઉદાભાઈ ડામોરે સુસાઈડ નોટ લખીને આત્મહત્યા કરી લીધી છે. મૃતક ઉદાભાઈના પરિવારજનોએ ન્યાયની માંગ કરતાં મામલો વધારે ગરમાય તેવી શક્યતા છે. 

સમગ્ર ઘટના ક્રમ મામલે કડાણા મામલતદાર કચેરીના નાયબ મામલતદાર સુરેશ સંગાડાને પૂછતાં તેઓએ મૃતકના પરિવારજનોના આક્ષેપને પાયાવિહોણો ગણાવ્યો હતો. મામલતદાર કચેરી તરફથી મૃતકને પુરાવાની પૂર્તતા કરવા કહેવાયુ હતુ. પૂરતા પુરાવાના અભાવે જાતિનો દાખલો અપાયો નહી હોવાનું જણાવ્યુ હતુ.