મોરબીના જેતપરથી ખેડૂત આંદોલન પાર્ટ-3 નો પ્રારંભ!

Farmers protest strongly against new compensation policy: ખાનગી કંપનીના વીજપોલ અને ટ્રાન્સમિશન કોરિડોર માટે જાહેર કરાયેલી નવી વળતર નીતિના વિરોધમાં મોરબી જિલ્લાના ખેડૂતો ફરીથી રસ્તા પર ઉતર્યા છે. 'આંદોલન પાર્ટ-3' અંતર્ગત મહેન્દ્રનગર ચોકડીથી કલેક્ટર કચેરી સુધી ખેડૂતોની વિશાળ રેલી યોજાઈ હતી. જેમાં મહિલાઓ, ખેડૂતો અને વિવિધ ગામોના પ્રતિનિધિઓ જોડાયા હતા. ખેડૂતોનો દાવો છે કે, હાલની વળતર નીતિ જમીન ધારક ખેડૂતોના હિતમાં નથી અને તેમાં તાત્કાલિક સુધારો થવો જોઈએ.

365 ગ્રામ પંચાયતોના સમર્થન સાથે આવેદન
મોરબીમાં રેલી પૂર્ણ થયા બાદ ખેડૂતોના પ્રતિનિધિમંડળે કલેક્ટરને આવેદનપત્ર સુપરત કર્યું. આવેદન સાથે 365 ગ્રામ પંચાયતોના સમર્થનપત્રો પણ જોડવામાં આવ્યા હતા. ખેડૂતોનું કહેવું છે કે, વીજપોલ અને કોરિડોર માટેની વળતર વ્યવસ્થા વધુ ન્યાયસંગત અને પારદર્શક બનાવવી જરૂરી છે.

સરકાર સમક્ષ ત્રણ વિકલ્પોની રજૂઆત
ખેડૂત આગેવાનોના જણાવ્યા અનુસાર રાજ્ય સરકાર દ્વારા જાહેર કરાયેલા 4 જુલાઈ, 2026ના પરિપત્રમાં સુધારા માટે ત્રણ વિકલ્પ રજૂ કરવામાં આવ્યા છે.

પ્રથમ વિકલ્પ મુજબ વીજપોલના ટાવર બેઝ માટે બજાર કિંમતના 400 ટકા અને કોરિડોર માટે ગ્રામ્ય તેમજ શહેરી તમામ વિસ્તારોમાં સમાન રીતે 260 ટકા વળતર ચૂકવવાની માંગ કરવામાં આવી છે.

બીજા વિકલ્પમાં વર્ષ 2013ના જમીન સંપાદન કાયદા મુજબ વીજપોલ અને કોરિડોર માટે બજાર કિંમતના ચાર ગણા વળતરની માંગણી કરવામાં આવી છે.

ત્રીજા વિકલ્પમાં વર્ષ 2006ના લાયસન્સી નિયમો પ્રમાણે ખેડૂત અને કંપની વચ્ચે ભાડું નક્કી કરી દર મહિને અથવા દર વર્ષે ચૂકવણી કરવાની વ્યવસ્થા અમલમાં મૂકવાની રજૂઆત કરવામાં આવી છે.

સરકાર નિર્ણય નહીં લે તો આંદોલન વધુ ઉગ્ર બનશે
ખેડૂત આગેવાનોનું કહેવું છે કે, જો સરકાર રજૂ કરાયેલા વિકલ્પો સ્વીકારશે નહીં તો ગુજરાતના ખેડૂતો સાથે ચર્ચા કરીને આગામી આંદોલનની વ્યૂહરચના નક્કી કરવામાં આવશે. તેમના જણાવ્યા મુજબ આ મુદ્દો માત્ર મોરબીનો નહીં પરંતુ સમગ્ર રાજ્યના ખેડૂતોના હિત સાથે જોડાયેલો છે.

ખેડૂત આગેવાનોએ શું કહ્યું?
નેહુલ અમૃતિયા (સભ્ય, ખેડૂત સમિતિ): અમે છેલ્લા 2 દિવસથી મીટિંગો કરીને તમામ જિલ્લાના ખેડૂતોના પ્રશ્નો સાંભળ્યા છે અને તે મુજબ માંગણીઓ તૈયાર કરી છે. 365 ગ્રામ પંચાયતોએ પોતાના લેટરપેડ પર લખીને આપ્યું છે કે આ પરિપત્ર તેમને અમાન્ય છે. જો સરકાર અમારી માંગ નહીં સ્વીકારે તો આગામી સમયમાં ખેડૂતો સાથે મળીને જલદ રણનીતિ ઘડવામાં આવશે.

નિકેત પંચાસરા (સભ્ય, ખેડૂત સમિતિ): ગત રાત સુધીમાં 365 પંચાયતોના લેટરપેડ મળી ચૂક્યા છે અને હજુ પણ આવી રહ્યા છે જેને આગામી રજૂઆતમાં જોડી દેવાશે. આ પદયાત્રામાં 25,000 થી વધુ ખેડૂતો અને મહિલાઓએ જોડાઈને આવેદન આપ્યું છે.

મિત્તલ કંડિયા (સભ્ય, મહિલા સમિતિ): આજે ગણી ન શકાય તેટલી મોટી જનમેદની રસ્તા પર ઉતરી છે. ખેડૂતોને થતા અન્યાયના બેનરો સાથે મહિલાઓ પણ મોટી સંખ્યામાં જોડાઈ છે. હવે જોવાનું એ રહે છે કે તંત્ર અમારી માંગણીઓ સ્વીકારે છે કે નહીં.

પરિપત્ર ખેડૂતોના હિતમાં હોવાનો કલેક્ટરનો દાવો
કલેક્ટરે ખેડૂતોને આશ્વાસન આપતા જણાવ્યું કે, સરકારે ખેડૂતોની માંગણીઓ પ્રત્યે સંવેદના દાખવીને જ  વિસ્તૃત પરિપત્ર બહાર પાડ્યો છે અને તે ખેડૂતોના હિતમાં જ છે. તેમણે સ્પષ્ટતા કરી કે, માર્કેટ રેટ કમિટીની રચના કરી તેમાં ખેડૂત પ્રતિનિધિઓનો સમાવેશ કરવામાં આવ્યો છે. વળતરના ભાવ 200 ટકા અને ગ્રામ્યમાં 30 ટકાની જોગવાઈ પણ કરાઈ છે. ખેડૂતો ઝડપથી પોતાના પ્રતિનિધિઓની નિમણૂક કરે જેથી સમયસર વળતર મળી શકે. અગાઉ જેને વળતર મળી ગયું હોય તેને પણ વધારાનું વળતર આપવાની જોગવાઈ છે. કંપનીઓ સાથે બેઠક કરી વેલ્યુઅર નિમવા સૂચના આપી દેવાઈ છે. ખેડૂતોને 100 ટકા વળતર મળ્યા બાદ જ ખેતરોમાં થાંભલા નાખવાની કામગીરી શરૂ કરવામાં આવશે તેવી સ્પષ્ટ સૂચના આપવામાં આવી છે. આજે ખેડૂતોએ જે નવી માંગણીઓ મૂકી છે, તેને પણ યોગ્ય માધ્યમથી સરકાર સુધી પહોંચાડવામાં આવશે.

જેતપરથી શરૂ થયેલી લડતનો ત્રીજો તબક્કો
સમગ્ર આંદોલનની શરૂઆત મોરબીના જેતપર ગામેથી થઈ હતી. શરૂઆતમાં પ્રતિક ઉપવાસ અને ત્યારબાદ 19 દિવસ સુધી આમરણાંત ઉપવાસ યોજાયા હતા. ત્યારબાદ સરકારે નવી વળતર નીતિ જાહેર કરી હતી. પરંતુ ખેડૂતોને તે સંતોષકારક લાગી નથી. પરિણામે હવે આંદોલનનો ત્રીજો તબક્કો શરૂ કરવામાં આવ્યો છે. ખેડૂતોનું માનવું છે કે, હાલની વળતર વ્યવસ્થા જમીનના વાસ્તવિક મૂલ્ય અને લાંબાગાળાના નુકસાનને પૂરતું પ્રતિબિંબિત કરતી નથી. તેથી સરકાર ખેડૂતો સાથે ચર્ચા કરી વ્યવહારિક અને સર્વસંમતિ આધારિત ઉકેલ લાવે તેવી માંગ ઉઠી છે.

આગામી દિવસોમાં સરકારના નિર્ણય પર નજર
ખેડૂતો દ્વારા રજૂ કરાયેલા ત્રણ વિકલ્પો અંગે સરકાર શું નિર્ણય લે છે તેના પર સૌ કોઈની નજર છે. રજૂઆતને યોગ્ય પ્રતિસાદ નહીં મળે તો રાજ્યવ્યાપી આંદોલનની સંભાવના વ્યક્ત કરવામાં આવી છે.

રાજ્ય સરકારે વીજ પોલ વળતર મુદ્દે જાહેર કરેલો પરિપત્ર