હવે આ 21 ટાપુઓ પર નહીં જઈ શકો!

Devbhumi Dwarka : ગુજરાતના દરિયાકાંઠા વિસ્તાર દેવભૂમિ દ્વારકામાં રાષ્ટ્રીય સુરક્ષાને વધુ મજબૂત બનાવવા જિલ્લા વહીવટી તંત્રએ મહત્વપૂર્ણ નિર્ણય લીધો છે.જિલ્લા કલેક્ટરે જિલ્લાના દરિયાકાંઠે આવેલા 21 નિર્જન ટાપુઓ પર સામાન્ય લોકોના પ્રવેશ પર પ્રતિબંધ જાહેર કર્યો છે.આ નિર્ણયનો મુખ્ય હેતુ દેશની દરિયાઈ સુરક્ષા મજબૂત બનાવવાનો,સંવેદનશીલ વિસ્તારોમાં અનધિકૃત અવરજવર અટકાવવાનો અને કોઈપણ પ્રકારની ગેરકાયદે પ્રવૃત્તિઓને રોકવાનો છે.ભારતના પશ્ચિમ દરિયાકાંઠે આવેલા દેવભૂમિ દ્વારકા જિલ્લાનું ભૌગોલિક સ્થાન વ્યૂહાત્મક રીતે અત્યંત મહત્વપૂર્ણ માનવામાં આવે છે. અરબી સમુદ્રને અડીને આવેલા આ વિસ્તારની નજીક આંતરરાષ્ટ્રીય સમુદ્રી માર્ગો છે. આવા સંજોગોમાં સુરક્ષા એજન્સીઓ લાંબા સમયથી દરિયાકાંઠાના વિસ્તારોમાં સતત સતર્કતા જાળવી રહી છે.

21 નિર્જન ટાપુઓ કેમ બન્યા ચર્ચાનું કેન્દ્ર?
દેવભૂમિ દ્વારકાના દરિયામાં આવેલા અનેક નાના-મોટા ટાપુઓ વર્ષોથી નિર્જન છે.અહીં કોઈ કાયમી વસાહત નથી, પરંતુ માછીમારો, પ્રવાસીઓ અથવા અન્ય લોકો ક્યારેક આ વિસ્તારોમાં પહોંચી જતા હોવાના અહેવાલો સામે આવતા રહ્યા છે.સુરક્ષા એજન્સીઓના મત મુજબ આવા નિર્જન વિસ્તારોનો ઉપયોગ અસામાજિક તત્વો,દાણચોરી,ગેરકાયદે પ્રવેશ અથવા અન્ય દેશવિરોધી પ્રવૃત્તિઓ માટે થવાની શક્યતા નકારી શકાય નહીં. તેથી જ આ વિસ્તારોમાં અનધિકૃત પ્રવેશ રોકવો જરૂરી માનવામાં આવ્યો છે.

21 સપ્ટેમ્બર 2026 સુધી અમલમાં રહેશે પ્રતિબંધ
અગાઉ આ નિર્જન ટાપુઓનો ગેરકાયદેસર પ્રવૃત્તિઓ માટે ઉપયોગ થવાની આશંકાઓને કારણે તંત્ર દ્વારા ત્યાંથી ગેરકાયદેસર ધાર્મિક દબાણો પણ દૂર કરવામાં આવ્યા હતા. હવે સુરક્ષા એજન્સીઓની ભલામણને આધારે આ તમામ 21 નિર્જન ટાપુઓ પર સામાન્ય લોકો,માછીમારો કે અન્ય બિનઅધિકૃત વ્યક્તિઓના પ્રવેશ પર પ્રતિબંધ લગાવી દેવાયો છે.જિલ્લા કલેક્ટર દ્વારા બહાર પાડવામાં આવેલા આ જાહેરનામા મુજબ,ટાપુઓ પર લોકોની અવરજવર પરનો આ પ્રતિબંધ આગામી 21 સપ્ટેમ્બર 2026 સુધી કડકાઈથી અમલમાં રહેશે.આ સમયગાળા દરમિયાન કોઈપણ વ્યક્તિ પરવાનગી વગર આ ટાપુઓ પર જઈ શકશે નહીં. સંભવિત ખતરાઓને ટાળવા અને સરહદી તેમજ દરિયાઈ વિસ્તારોમાં ચાંપતો ચોકીપહેરો રાખવા માટે આ નિર્ણય લેવામાં આવ્યો છે.

જિલ્લા કલેક્ટરની જાહેર સૂચના
જિલ્લા કલેક્ટર દ્વારા જાહેર કરાયેલા આદેશ મુજબ નિર્ધારિત 21 નિર્જન ટાપુઓ પર કોઈપણ વ્યક્તિને પરવાનગી વિના જવાની મંજૂરી રહેશે નહીં.આ નિર્ણયનો અમલ તાત્કાલિક અસરથી કરવામાં આવ્યો છે. સંબંધિત વિભાગો, પોલીસ, મરીન પોલીસ, કોસ્ટ ગાર્ડ તથા અન્ય સુરક્ષા એજન્સીઓને આ આદેશના કડક અમલ માટે સૂચનાઓ આપવામાં આવી છે.જિલ્લા વહીવટી તંત્રએ સ્પષ્ટ કર્યું છે કે આ પ્રતિબંધ સામાન્ય લોકોની સુરક્ષા તેમજ દેશના વ્યૂહાત્મક હિતોને ધ્યાનમાં રાખીને લાગુ કરવામાં આવ્યો છે.

સુરક્ષા એજન્સીઓ રહેશે વધુ સતર્ક
આ નિર્ણય બાદ મરીન પોલીસ, કોસ્ટ ગાર્ડ, સ્થાનિક પોલીસ અને અન્ય સુરક્ષા દળો દ્વારા ટાપુઓની આસપાસ નિયમિત પેટ્રોલિંગ કરવામાં આવશે.ડ્રોન સર્વેલન્સ, બોટ પેટ્રોલિંગ અને આધુનિક દેખરેખ પ્રણાલીઓનો ઉપયોગ કરીને સમગ્ર વિસ્તાર પર સતત નજર રાખવામાં આવશે. શંકાસ્પદ હિલચાલ જણાય તો તાત્કાલિક કાર્યવાહી કરવામાં આવશે.સ્થાનિક માછીમારોને પણ સૂચના આપવામાં આવી છે કે પ્રતિબંધિત ટાપુઓની આસપાસ બિનજરૂરી રીતે ન જાય અને કોઈ શંકાસ્પદ વ્યક્તિ અથવા હલચલ દેખાય તો તરત જ મરીન પોલીસ અથવા સ્થાનિક પોલીસને જાણ કરે.માછીમારો દરિયામાં લાંબો સમય વિતાવતા હોવાથી તેઓ સુરક્ષા વ્યવસ્થામાં મહત્વની ભૂમિકા ભજવી શકે છે.

ગેરકાયદે પ્રવૃત્તિઓ પર લાગશે અંકુશ
સુરક્ષા નિષ્ણાતોના જણાવ્યા મુજબ આવા ટાપુઓનો ઉપયોગ ક્યારેક દાણચોરી, ગેરકાયદે માછીમારી, નશીલા પદાર્થોના હેરફેર અથવા અન્ય ગેરકાયદે પ્રવૃત્તિઓ માટે થઈ શકે છે.પ્રતિબંધ લાગુ થતાં આવી પ્રવૃત્તિઓ પર અસરકારક નિયંત્રણ મેળવવામાં મદદ મળશે.જિલ્લા વહીવટી તંત્રએ પ્રવાસીઓને પણ સૂચના આપી છે કે પ્રતિબંધિત વિસ્તારોમાં જવાનો પ્રયાસ ન કરે. નિયમોના ભંગ બદલ કાયદેસરની કાર્યવાહી થઈ શકે છે.પ્રવાસન માટે ખુલ્લા અને મંજૂર કરાયેલા સ્થળોની મુલાકાત લેવાની સલાહ આપવામાં આવી છે.

નિયમ ભંગ કરનારાઓ સામે કાયદેસરની કાર્યવાહી
તંત્ર દ્વારા સ્પષ્ટ ચેતવણી આપવામાં આવી છે કે આ જાહેરનામાનો ભંગ કરનાર કે આદેશની અવગણના કરનાર કોઈપણ ઇસમ સામે કાયદાકીય કડક કાર્યવાહી કરવામાં આવશે.દેશની આંતરિક સુરક્ષા અને અખંડિતતા જાળવી રાખવા માટે સુરક્ષા એજન્સીઓ અને પોલીસ વિભાગ પણ સતર્ક બન્યા છે.દરિયાઈ માર્ગે થતી શંકાસ્પદ હિલચાલ પર બારીકાઈથી નજર રાખવામાં આવી રહી છે, જેથી રાષ્ટ્રીય સુરક્ષા સાથે કોઈ પણ પ્રકારનો ચેડા ન થઈ શકે.