રાજકોટ શહેરમાં ગેરકાયદેસર દબાણો સામે તંત્રએ લાલ આંખ કરી છે. જંગલેશ્વર વિસ્તારમાં 1500 થી વધુ બાંધકામો તોડ્યા બાદ, હવે રેલવે તંત્ર પણ એક્શન મોડમાં આવ્યું છે.
સોમવારે વહેલી સવારથી રેલવે વિભાગે સ્થાનિક પોલીસ અને ફાયર બ્રિગેડને સાથે રાખી લક્ષ્મીનગર વિસ્તારમાં વર્ષો જૂના 350 થી વધુ કાચા-પાકા ઝુંપડાઓ દૂર કરવાની કામગીરી હાથ ધરી હતી.
પોલીસનો લોખંડી બંદોબસ્ત
ડિમોલિશન દરમિયાન કોઈ અઘટિત ઘટના ન બને તે માટે પોલીસનો ચુસ્ત કાફલો ખડકી દેવામાં આવ્યો હતો. જોકે, કામગીરી ચાલુ હતી ત્યારે જ ત્રણ અલગ-અલગ સ્થળોએ અચાનક આગ લાગવાની ઘટનાઓ બની હતી.
ઝુંપડાઓમાં આગ લાગતા નાસભાગ મચી ગઈ હતી, પરંતુ ત્યાં હાજર ફાયર ફાઈટરોએ તુરંત જ આગ પર કાબૂ મેળવતા મોટી જાનહાનિ ટળી હતી.
પોતાના વર્ષો જૂના આશિયાના છીનવાતા જોઈ સ્થાનિક રહીશોની આંખો ભીની થઈ ગઈ હતી. 60 વર્ષથી ત્યાં રહેતા શાંતિબેન અને શંભુબેને રડતા અવાજે પોતાની વ્યથા ઠાલવતા કહ્યું કે, "ચૂંટણી સમયે મતો લેવા માટે બધા નેતાઓ દોડી આવે છે, પણ આજે જ્યારે અમે રસ્તા પર આવી ગયા છીએ ત્યારે કોઈ ડોકાતું પણ નથી. નાના બાળકોને લઈને અમે ક્યાં જઈએ?"
સ્થાનિકોએ આક્ષેપ કર્યો હતો કે તેઓ વર્ષોથી સુવિધા વગર અહીં રહેતા હતા, પરંતુ તંત્રએ તેમને રહેવા માટે કોઈ વૈકલ્પિક વ્યવસ્થા કરી આપી નથી.
રેલવે પ્રશાસનના જણાવ્યા મુજબ, લક્ષ્મીનગરની આ જમીન રેલવેના આગામી પ્રોજેક્ટ્સ અને સુરક્ષાની દ્રષ્ટિએ અત્યંત મહત્વની છે. રેલવે ટ્રેક પાસેના દબાણો મુસાફરોની સુરક્ષા માટે પણ જોખમી હતા.
તંત્રએ સ્પષ્ટ સંકેત આપ્યા છે કે આગામી દિવસોમાં અન્ય રેલવે જમીનો પરથી પણ દબાણો હટાવવામાં આવશે. હાલમાં આશરે 5000 થી વધુની વસ્તી ધરાવતા આ વિસ્તારના પરિવારો ખુલ્લા આકાશ નીચે આવી ગયા છે.
&nbsp;

લક્ષ્મીનગરમાં ડિમોલિશન

જંગલેશ્વર બાદ હવે લક્ષ્મીનગરમાં 'દાદાનું બુલડોઝર'; 350 ઝુંપડા તૂટતાં પરિવારો રસ્તા પર

March 9, 2026 | 14:39 IST