ગુજરાતમાં કાતિલ ઠંડી: તાપમાનમાં 7 ડિગ્રી ઘટાડો

ગુજરાતમાં હાડ ધ્રુજાવતી ઠંડીનો રાઉન્ડ: અમદાવાદ સહિત અનેક શહેરોમાં કોલ્ડવેવની અસર

ગુજરાતમાં ગત શુક્રવારની સાંજથી વાતાવરણમાં આવેલા પલટાએ સમગ્ર રાજ્યને ઠંડીમાં ઠુંઠવી દીધું છે. ખાસ કરીને અમદાવાદ, વડોદરા અને રાજકોટ જેવા મોટા શહેરોમાં તાપમાનનો પારો અચાનક ગગડતા જનજીવન પર તેની વ્યાપક અસર જોવા મળી રહી છે.

તાપમાનમાં મોટો ઘટાડો : 

છેલ્લા ૨૪ કલાકના આંકડા જોઈએ તો અમદાવાદમાં લઘુતમ તાપમાન 5.3 ડિગ્રી, વડોદરામાં 5 ડિગ્રી અને રાજકોટમાં 8.4 ડિગ્રી જેટલું નીચે ઉતરી ગયું છે. આ તીવ્ર ઘટાડાને કારણે રાત્રિના સમયે માર્ગો સૂમસામ બની રહ્યા છે અને લોકો ઠંડીથી બચવા વહેલા ઘરોમાં પુરાઈ રહ્યા છે.

ઠંડી વધવાના મુખ્ય કારણો : 

હવામાન નિષ્ણાતોના મતે ઉત્તર ભારતમાં થયેલા સ્નોફોલ અને વેસ્ટર્ન ડિસ્ટર્બન્સની અસરને કારણે ઠંડા પવનો ફૂંકાઈ રહ્યા છે. અગાઉ વરસાદી માહોલ બાદ હવે સૂસવાટા મારતા પવનોએ ઠંડીની તીવ્રતામાં વધારો કર્યો છે.

હવામાન વિભાગની આગામી આગાહી : 

હજી પણ રાજ્યના નાગરિકોએ કાતિલ ઠંડી માટે તૈયાર રહેવું પડશે. હવામાન વિભાગના જણાવ્યા મુજબ, આગામી ત્રણ દિવસ સુધી શીતલહેર યથાવત રહેશે. જોકે, વચ્ચે તાપમાનમાં સામાન્ય વધારો થઈ શકે છે, પરંતુ ત્યારબાદ ફરી એકવાર પારો 3 થી 5 ડિગ્રી નીચે જવાની સંભાવના છે, જે ઠંડીના વધુ એક રાઉન્ડનો સંકેત આપે છે.