ગીરનાર અંબાજી મંદિરમાં માસ-મદિરા પાર્ટીથી વિવાદ

જૂનાગઢના ગીરનાર પર્વત પર અંબાજી મંદિરમાં માસ મદિરાની પાર્ટીનો વીડિયો વાયરલ થયો છે. વીડિયો વાયરલ થયા બાદ જૂનાગઢ કલેક્ટરે તપાસના આદેશ આપ્યા છે. સોશિયલ મીડિયા પર વાયરલ થયેલા વીડિયોમાં કેટલાક લોકો મંદિરના ગર્ભગૃહમાં ભંડારાની જગ્યા પર માસ અને મદિરાની પાર્ટી કરતા હોવાનું જોવા મળ્યું છે. આ વીડિયો કેટલો જૂનો છે અને વીડિયોમાં દેખાતા વ્યક્તિઓ કોણ છે તેને લઇને કોઇ ખુલાસો થયો નથી.

ગીરનાર પર્વત પર અંબાજી મંદિરના ગર્ભ ગૃહમાં માસ અને મદિરાની પાર્ટીનો એક વીડિયો સોશિયલ મીડિયામાં વાયરલ થયો છે. જેના કારણે જૂનાગઢ પંથકમાં ચકચાર મચી ગઈ છે. ધર્મ સાથે જોડાયેલી તમામ સંસ્થાઓએ વીડિયોની નિંદા કરી છે. આ મામલે લોકોમાં વિરોધનો માહોલ ઊભો થતાં જૂનાગઢ કલેકટર અનિલ રાણાવસિયાએ પ્રાંત અધિકારી ચરણસિંહ ગોહિલને તપાસ કરવા આદેશ આપ્યો છે.

આ ઉપરાંત વીડિયોમાં દેખાઈ રહેલાં 11 લોકોને ગિરનાર જવા પર કલેક્ટર દ્વારા પ્રતિબંધ ફરમાવી દેવામાં આવ્યો છે. મંદિરમાં સેવા પૂજાનું કામ કરતાં લોકોને દૂર કરીને સેવા પૂજા માટે બે પુજારીની તાત્કાલિક નિમણૂક કરી દેવામાં આવી છે.

અંબાજી મંદિરના મોટા પીરબાવા તનસુખગીરી બાપુના દેહ વિલય બાદ અંબાજી મંદિરના મહંત અને મોટા પીરબાવાને લઈને વિરોધ જોવા મળ્યો છે. અંબાજી મંદિર જૂના અખાડા નીચે આવતી ધાર્મિક જગ્યા છે. તનસુખગીરી બાપુને સમાધિ આપ્યા બાદ જે તે સમયે જૂના અખાડાના અધ્યક્ષ હરિગીરીએ પ્રેમગીરીબાપુને તનસુખ ગીરી બાપુના સમાધિ શિષ્ય બનાવી મહંત તરીકે નિમણૂક કરી હતી.

અખાડાની પરંપરા અનુસાર થયેલી નિમણૂકને જે તે સમયે તનસુખગીરી બાપુ અને તેના પરિવાર સાથે જોડાયેલા કેટલાક લોકોએ વિરોધ કરતાં સમગ્ર મામલો જૂનાગઢ જિલ્લા વહીવટી તંત્ર સંભાળી રહ્યું છે. હાલમાં મંદિરનો તમામ કારભાર મામલતદાર ચલાવી રહ્યા છે. જે તે સમયે તનસુખગીરી બાપુના નિધન બાદ જૂના લોકો જ મંદિરની સેવા પૂજા કરી રહ્યા છે.

જૂનાગઢ કલેકટર તંત્ર દ્વારા અંબાજી મંદિરના મહંત નીમવાને લઈને વિધિવત રીતે અખબારોમાં નિવિદા પણ આપવામાં આવી છે. સન્યાસી પરંપરા અને જૂના અખાડા સાથે જોડાયેલા સંતોએ અંબાજી મંદિરના મહંત બનવાને લઈને આવેદન પણ આપ્યું છે.

ત્રણ મહિનાથી અંબાજી મંદિરના મહંત નીમવાની પ્રક્રિયા કોઈ કારણોસર મંદગતિએ ચાલી રહી છે. તેની વચ્ચે મંદિરના ગર્ભગૃહમાં માસ અને મદિરાની પાર્ટીનો વીડિયો સનાતન ધર્મની આસ્થાને ઠેસ પહોંચાડનારો છે. મોટાભાગના સાધુ સંતો કોઈ નિવેદન આપવા તૈયાર નથી. 

જૂનાગઢ કલેકટર અનિલ રાણાવસિયાએ જણાવ્યું કે, સોશિયલ મીડિયામાં વાયરલ થયેલા વીડિયોની સત્યતા ચકાસવા માટે તેમજ મંદિરમાં અપકૃત્ય કોણે કર્યું છે, ક્યારે કર્યું છે અને કેવા ઈરાદા સાથે કર્યું છે તેને લઈને પ્રાંત અધિકારી ચરણસિંહ ગોહિલને તપાસ સોંપવામાં આવી છે. તપાસમાં તથ્યોને આધીન ઘટનામાં સામે વ્યક્તિ સામે સામે કાયદાકીય કાર્યવાહી કરવામાં આવશે,