ધ્વનિ પ્રદૂષણ મામલે કન્ટેમ્પ્ટ ઓફ કોર્ટની અરજી, ગુજરાત હાઇકોર્ટનું આકરુ વલણ 

ધ્વનિ પ્રદૂષણના નિયમોનો સરેઆમ ભંગ થતાં ગુજરાત હાઇકોર્ટે આકરુ વલણ દાખવ્યું છે અને ધ્વનિ પ્રદુષણની સમસ્યા જનમાનસને અસર કરનારી છે તેમ જણાવીને આ મામલે દાખલ કરાયેલી પિટીશન મુદ્દે  જીપીસીબી, વન સચિવ, પોલીસ કમિશનર, મ્યુનિ.કમિશનરને નોટિસ પાઠવી છે.

ધ્વનિ પ્રદુષણને નાથવા જીપીસીબીના જાહેરનામા, નોઇઝ પોલ્યુશન કંન્ટ્રોલ રેગ્યુલેશન સહિતની જોગવાઇ હોવા છતાં તેનો સરેઆમ ભંગ થઇ રહ્યો છે અને હાલ બોર્ડ પરીક્ષા ચાલી રહી છે ત્યારે ધ્વનિ પ્રદુષણનુ ન્યુસન્સ વકર્યું છે જેથી આ મામલે હાઇકોર્ટમાં કન્ટેમ્પ્ટ ઓફ કોર્ટની પિટીશન દાખલ કરાઇ છે જેની સુનાવણી કરતા ગુજરાત હાઇકોર્ટે આ પક્ષકારોને નોટિસ આપી છે. 

હાઇકોર્ટે કેસની સુનાવણીમાં ટીકા કરતા કહ્યું કે ધ્વનિ પ્રદુષણની સમસ્યા ગંભીર અને જનમાનસને અસર કરનારી છે. પિટીશનમાં જણાવાયું છે કે ધ્વનિ પ્રદૂષણ મામલે વર્ષ 2022માં થયેલી જાહેર હિતની રિટ અરજીમાં હાઇકોર્ટે 4 માર્ચ, 2024ના રોજ શહેર પોલીસ કમિશનર, મ્યુનિસીપલ કમિશનર સહિતના સત્તાવાળાઓને ઉદ્દેશીને હુકમ કરાયેલો છે પણ અમદાવાદ શહેર સહિત રાજ્યભરમાં તેનું પાલન જોઇએ તેવું થઇ રહ્યું નથી. ધ્વનિ પ્રદુષણને નાથવા સુપ્રીમ કોર્ટે 2005ના મહત્વના ચુકાદા મારફતે જરુરી માર્ગદર્શીકા દાખલ કરેલી છે. જો કે તમામ સુચના અને જોગવાઇ તથા આદેશ માત્ર કાગળ પર રહી જાય છે અને આ તમામ નિર્દેશ અને માર્ગદર્શીકાઓનું ચુસ્તપણે પાલન કરાવવામાં સરકાર, પોલીસ અને મ્યુનિ.કમિશનર સહિતના સંબંધીત સત્તાવાળા નિષ્ફળ રહ્યા છે જેથી તેમની વિરુદ્ધ કન્ટેમ્પ્ટ ઓફ કોર્ટ અને બંધારણની કલમ 215 હેઠળ જરુરી કાર્યવાહી કોર્ટે હાથ ધરવી જોઇએ. 

રાજ્યભરમાં ડીજે, લાઉડ સ્પીકર, વાંજિત્રોના માધ્યમ દ્વારા નિયત સાઉન્ડ લિમીટનો ભંગ કરી ધ્વનિ પ્રદૂષણ ફેલાવતા વપરાશકર્તાઓ, ઉત્પાદનકારો અને વેચાણકર્તાઓ વિરુદ્ધ કડક કાર્યવાહી કરવા પિટીશનમાં માગ કરાઇ હતી. અરજદારે ધ્યાન દોર્યું કે સાઉન્ડ લિમીટ વગરના લાઉડ સ્પીકર, ડીજે, વાંજિત્રોના વેચાણ કે ઉપયોગના કારણે ધ્વનિ પ્રદુષણનું ન્યુસન્સ સર્જાયું છે. હાલ બોર્ડ પરીક્ષા સહિત ઘણી પરીક્ષા ચાલી રહી છે અને વિદ્યાર્થીઓને ખલેલ પહોંચે છે. તો વૃદ્ધ અને બાળકો , મહિલાઓ, નવજાત શિશુઓને માનસિક અને શારિરીક અસરો થઇ રહી છે.