લ્યો બોલો...લગ્નના 2 દિવસમાં જ યુવકનું અપહરણ

 ગાંધીનગરમાં બનેલા એક બનાવે લોકોમાં ભારે ઉત્સુક્તા જગાવી છે કારણ કે અહીં પત્નીને તેડવા ગયેલા યુવકનું જ અપહરણ થઇ ગયું છે. ચોંકાવનારી વાત એ છે કે જેની સાથે તેના  2 દિવસ પહેલા લગ્ન થયા હતા તે જ પત્નીએ તેનું અપહરણ કરાવ્યું હોવાનો ઘટસ્ફોટ થયો હતો.

ગાંધીનગરના અડાલજ પોલીસ સ્ટેશનમાં આ બાબતે ફરિયાદ  પણ નોંધાઇ છે. જાણવા મળેલી માહિતી મુજબ ગાંધીનગરના કોટેશ્વરમાં રહેતી પત્નીને તેડવા માટે તેનો પતિ પોતાના સાસરે ગયો હતો પણ તે પહેલાં જ તેનું અપહરણ થઇ ગયું હતું. એવી માહિતી સામે આવી છે કે યુવકના હજું 2 દિવસ પહેલાં જ લગ્ન થયા હતા પણ યુવતીને તેનો પતિ ગમતો ન હતો અને તેનું કોઇ અન્ય યુવક સાથે પ્રેમ પ્રકરણ ચાલતું હતું

 પ્રેમ પ્રકરણના ભાગરુપે યુવકની પત્ની અને તેના પ્રેમીએ આ પ્લાન બનાવ્યો હતો. મામલો સામે આવતા પોલીસે યુવતી અને તેના પ્રેમી સહિત 4 લોકોની ધરપકડ કરી હતી પણ યુવકની ભાળ મળી ન હતી.  યુવકનો પરિવાર પોલીસ સ્ટેશને પણ પહોંચ્યો હતો અને હોબાળો મચાવ્યો હતો તથા યુવકને જલ્દી શોધી લેવાની માગ કરી હતી.