ચુડાની KGB વિદ્યાલયમાં મોટી બેદરકારી?

Food Poisoning Scare At Chuda KGB School : સુરેન્દ્રનગર જિલ્લાના ચુડા તાલુકામાં આવેલી કસ્તુરબા ગાંધી બાલિકા વિદ્યાલય (KGBV)માં ફૂડ પોઇઝનિંગની ગંભીર ઘટના સામે આવી છે. શાળાના હોસ્ટેલમાં રહેતી કુલ 147 વિદ્યાર્થિનીઓની તબિયત બગડતાં સમગ્ર જિલ્લામાં હડકંપ મચી ગયો છે. વિદ્યાર્થીઓને એકસાથે ઊલટી, ઝાડા, પેટમાં દુખાવો અને નબળાઈ જેવી તકલીફો શરૂ થતાં શાળા તંત્ર, આરોગ્ય વિભાગ અને જિલ્લા વહીવટી તંત્ર તાત્કાલિક હરકતમાં આવ્યું હતું.પ્રાથમિક માહિતી મુજબ, અસરગ્રસ્ત વિદ્યાર્થિનીઓમાંથી ચારની હાલત ગંભીર હોવાનું જાણવા મળ્યું છે, જ્યારે એક વિદ્યાર્થિનીને વધુ સારવાર માટે ICUમાં દાખલ કરવામાં આવી છે. આ ઘટનાએ શાળાના ભોજનની ગુણવત્તા અને હોસ્ટેલ વ્યવસ્થાને લઈને ગંભીર સવાલો ઉભા કર્યા છે.

શું બની સમગ્ર ઘટના?
ચુડાની કસ્તુરબા ગાંધી બાલિકા વિદ્યાલયમાં હોસ્ટેલમાં રહેતી વિદ્યાર્થિનીઓએ નિયમિત રીતે ભોજન લીધા બાદ થોડા જ કલાકોમાં તબિયત ખરાબ થવાની ફરિયાદ કરી હતી. શરૂઆતમાં થોડા વિદ્યાર્થીઓને ઊલટી અને ઝાડાની ફરિયાદ થઈ હતી, પરંતુ થોડા સમય બાદ મોટી સંખ્યામાં વિદ્યાર્થિનીઓને સમાન લક્ષણો દેખાતા પરિસ્થિતિ ગંભીર બની ગઈ.એક પછી એક વિદ્યાર્થીઓ બિમાર પડતાં શાળા તંત્રએ તાત્કાલિક આરોગ્ય વિભાગને જાણ કરી હતી. ત્યારબાદ 108 એમ્બ્યુલન્સ, આરોગ્ય કર્મચારીઓ અને ડોક્ટરોની ટીમ શાળામાં પહોંચી હતી. અસરગ્રસ્ત વિદ્યાર્થિનીઓને તાત્કાલિક ચુડા સરકારી હોસ્પિટલ તેમજ અન્ય આરોગ્ય કેન્દ્રોમાં ખસેડવામાં આવી હતી.

147 વિદ્યાર્થિનીઓ અસરગ્રસ્ત
પ્રાથમિક અહેવાલો મુજબ, કુલ 147 વિદ્યાર્થિનીઓને ફૂડ પોઇઝનિંગ જેવી અસર થઈ હોવાનું નોંધાયું છે. મોટા ભાગની વિદ્યાર્થિનીઓને સામાન્ય સારવાર બાદ ઓબ્ઝર્વેશન હેઠળ રાખવામાં આવી છે, પરંતુ ચાર વિદ્યાર્થીઓની સ્થિતિ ગંભીર હોવાથી સતત તબીબી દેખરેખ રાખવામાં આવી રહી છે.ડોક્ટરોના જણાવ્યા અનુસાર મોટાભાગની વિદ્યાર્થિનીઓની સ્થિતિ હાલ સ્થિર છે, જોકે તમામ પર સતત નજર રાખવામાં આવી રહી છે.

10 એમ્બ્યુલન્સ દ્વારા વિદ્યાર્થિનીઓને ચુડા અને સુરેન્દ્રનગર હોસ્પિટલોમાં ખસેડાઈ
ફૂડ પોઇઝનિંગની અસર બાદ અંદાજે 10 એમ્બ્યુલન્સ દ્વારા અસરગ્રસ્ત વિદ્યાર્થિનીઓને ચુડા, લીંબડી અને સુરેન્દ્રનગરની હોસ્પિટલોમાં સારવાર માટે ખસેડવામાં આવી હતી.મુખ્ય જિલ્લા આરોગ્ય અધિકારી ડો. બી.જે. ગોહિલના જણાવ્યા મુજબ 147 અસરગ્રસ્ત વિદ્યાર્થિનીઓમાંથી 102 વિદ્યાર્થિનીઓને ચુડા હોસ્પિટલમાં સારવાર આપવામાં આવી રહી છે, જ્યારે અન્યને વધુ સારવાર માટે લીંબડી અને સુરેન્દ્રનગર ગાંધી હોસ્પિટલમાં રીફર કરવામાં આવી છે. ઘટનાની ગંભીરતાને ધ્યાનમાં રાખીને આરોગ્ય વિભાગે તાત્કાલિક સારવારની વ્યવસ્થા ઉભી કરી હતી.

4ની સ્થિતિ ગંભીર થતાં સુરેન્દ્રનગર ખસેડાઇ, એક ICUમાં દાખલ
લીંબડી-ચુડા મતવિસ્તારના ધારાસભ્ય કિરીટસિંહ રાણાએ હોસ્પિટલની મુલાકાત બાદ જણાવ્યું હતું કે હાલ તમામ વિદ્યાર્થિનીઓની સ્થિતિ સ્થિર છે. જોકે, ચાર જેટલી વિદ્યાર્થિનીઓની સ્થિતિ ગંભીર જણાતા તેમને વધુ સારવાર માટે સુરેન્દ્રનગર હોસ્પિટલમાં રીફર કરવામાં આવી છે. એક વિદ્યાર્થિનીની સ્થિતિ વધુ ગંભીર બનતા શ્રીમદ રાજચંદ્ર હોસ્પિટલ ખાતે ICUમાં દાખલ કરવામાં આવી છે. અન્ય તમામની સ્થિતિ સ્થિર છે. જિલ્લા કલેક્ટર, પ્રાંત અધિકારી, મામલતદાર તેમજ આરોગ્ય વિભાગના અધિકારીઓ સતત પરિસ્થિતિ પર નજર રાખી રહ્યા છે. ફૂડના નમૂનાઓ લેવામાં આવશે અને તપાસમાં જે કોઈની બેદરકારી સામે આવશે તેની સામે કડક કાર્યવાહી કરવામાં આવશે.

મોટાભાગની વિદ્યાર્થીઓની હાલત હાલમાં સ્થિર
સુરેન્દ્રનગર ગાંધી હોસ્પિટલના તબીબોના જણાવ્યા મુજબ હોસ્પિટલમાં દાખલ કરવામાં આવેલા મોટાભાગના વિદ્યાર્થીઓની હાલત હાલમાં સ્થિર છે. હોસ્પિટલમાં બે પીડીયાટ્રીશિયન, 10 મેડિકલ ઓફિસર, સ્ટાફ નર્સ અને અન્ય આરોગ્ય કર્મચારીઓની ટીમ સતત સારવાર આપી રહી છે. માત્ર એક વિદ્યાર્થિનીની સ્થિતિ વધુ ગંભીર હોવાથી તેને વિશેષ સારવાર માટે રીફર કરવામાં આવી છે.

વિદ્યાર્થિનીઓને 24 કલાક તબીબી દેખરેખ હેઠળ રાખવામાં આવશે
ગુજરાત વિધાનસભાના નાયબ મુખ્ય દંડક જગદીશ મકવાણાએ જણાવ્યું હતું કે પરિસ્થિતિ હવે મોટા ભાગે નિયંત્રણમાં છે. ચુડા, લીંબડી, સાયલા, સુરેન્દ્રનગર ગાંધી હોસ્પિટલ તેમજ અન્ય હોસ્પિટલોમાં દાખલ તમામ વિદ્યાર્થિનીઓને 24 કલાક સુધી ડોકટરોની દેખરેખ હેઠળ રાખવામાં આવશે. તેમણે જણાવ્યું કે પ્રાથમિક રીતે ભોજનના કારણે ફૂડ પોઇઝનિંગ થયું હોવાનું સામે આવ્યું છે અને તપાસ પૂર્ણ થયા બાદ જેની પણ બેદરકારી સામે આવશે તેની સામે સરકાર કડક કાયદેસરની કાર્યવાહી કરશે.

વિદ્યાર્થિનીનો ચોંકાવનારો આક્ષેપ
શ્રી કસ્તુરબા ગાંધી બાલિકા વિદ્યાલયની હોસ્ટેલમાં રહેતી ભૂમિકા કણોતરા નામની વિદ્યાર્થિનીએ હોસ્ટેલના પ્રશાસન અને શિક્ષકો સામે ગંભીર આક્ષેપો કર્યા છે. વિદ્યાર્થિના જણાવ્યા અનુસાર, હોસ્ટેલમાં સવારે બનાવેલો ખોરાક બપોરે અને રાત્રે પણ પીરસવામાં આવે છે, જેના કારણે અનેક છોકરીઓ બીમાર પડી રહી છે. તાજેતરમાં જ વિદ્યાર્થિનીઓને બે વખત ખીર પીરસવામાં આવી હતી, જેમાં કંઈક પડી ગયું હોવાની આશંકા છે અને તેના લીધે જ વિદ્યાર્થિનીઓની તબિયત લથડી હતી. આટલું જ નહીં, જ્યારે વિદ્યાર્થિનીઓ આ અંગે શિક્ષકોને ફરિયાદ કરે છે, ત્યારે તેમને શાળામાંથી LC પકડાવી કાઢી મૂકવાની ધમકી આપવામાં આવે છે. હોસ્ટેલમાં શિક્ષકો દ્વારા વિદ્યાર્થિનીઓ સાથે ભેદભાવ રાખવામાં આવે છે અને દૂરથી આવતા વાલીઓને પણ મહિનાના માત્ર ચોથા રવિવારે જ તેમની દીકરીઓને મળવા દેવાનો કડક નિયમ લાદીને પરેશાન કરવામાં આવે છે.

તપાસ બાદ સામે આવશે ઘટનાનું સાચું કારણ
આ સમગ્ર ઘટનાને પગલે આરોગ્ય વિભાગ, ફૂડ સેફ્ટી વિભાગ અને વહીવટી તંત્રે સંયુક્ત તપાસ શરૂ કરી છે. ભોજનના નમૂનાઓની લેબોરેટરી તપાસ બાદ ફૂડ પોઇઝનિંગનું ચોક્કસ કારણ સામે આવશે. હાલ તંત્રનું મુખ્ય ધ્યાન તમામ વિદ્યાર્થિનીઓને ઝડપથી સ્વસ્થ બનાવી સુરક્ષિત રીતે હોસ્ટેલમાં પરત મોકલવાનું છે, જ્યારે વાલીઓ ઘટનાની પારદર્શક તપાસ અને જવાબદારો સામે કડક કાર્યવાહી કરવાની માંગ કરી રહ્યા છે.