અમદાવાદમાં 6 વર્ષ અગાઉ બનેલો બ્રિજ બન્યો જોખમી

અમદાવાદના સુભાષ બ્રિજ પર સ્પાન બેસી જવાની ઘટનાને એક મહિનો થયો નથી. તેવામાં વધુ એક બ્રિજ જોખમી બન્યો છે. રણજીત બિલ્ડકોન કંપની દ્વારા 6 વર્ષ અગાઉ બનાવાયેલા ઈન્કમટેક્સ બ્રિજ ઉપર જોઈન્ટ એક્સપાન્શનનો ભાગ ખુલી જતાં ગુણવત્તા સામે સવાલ ઉઠી રહ્યા છે. એએમસી દ્વારા દર 6 મહિને બ્રિજનું ઈન્સપેક્શન કરાવવા માટે કરોડો રૂપિયાનો ખર્ચ કરવામાં આવતો હોય છે. તેમ છતાં તંત્રના અધિકારીઓને તેની જાણ નહી હોવાથી ઈન્સપેક્શનની કામગીરી સામે સવાલ ઉઠી રહ્યા છે. 

શહેરના ઇન્કમટેક્સ ઓવરબ્રિજ પર બે સ્પાનને જોડવા માટે જોઈન્ટ એક્સપાન્શન કરવામાં આવ્યુ હતું.  6 વર્ષ અગાઉ બનાવવામાં આવેલા ઇન્કમટેક્સ ઓવરબ્રિજ પરના જોઈન્ટ એક્સ્પાન્શનના ભાગમાં બોલ્ટ લગાવવામાં આવ્યા હતા તે ભાગ ખુલી ગયો છે. બ્રિજના મધ્ય ભાગની આગળના ભાગે બોલ્ટ ખુલી ગયા છે. જેના કારણે થઈને ટુ વ્હીલર ચાલકોને અકસ્માત થવાની શક્યતા છે. જે ભાગમાં બોલ્ટ ખુલી ગયા છે તેના નીચેના ભાગે એક સામાન્ય તિરાડ પણ જોવા મળી છે.

અમદાવાદ મહાનગરપાલિકા દ્વારા તમામ ઓવર બ્રિજ અને અંડર બ્રિજના ઇન્સ્પેક્શન માટે કન્સલ્ટન્ટ એજન્સીઓ પાસે ઇન્સ્પેક્શન કરાવવામાં આવે છે. જેમાં વિઝ્યુઅલ ઇન્સ્પેક્શન અને ડિટેઈલમાં ચેકિંગ કરાવવામાં આવતું હોય છે. બ્રિજ કન્સલ્ટન્ટ એજન્સીઓ દ્વારા ઇન્સ્પેક્શન કરીને ઓવરબ્રિજના જોઈન્ટ એક્સપાન્શન યોગ્ય નથી તે અંગે રિપોર્ટ પણ કરવામાં આવે છે. ત્યારે ઈન્કમટેક્સ ઓવર બ્રિજના જોઈન્ટ એક્સપાન્શન યોગ્ય નહી હોવાનો રિપોર્ટ આપવામાં આવ્યો હતો કે કેમ તે અંગે સવાલ ઉઠ્યા છે.

તમને જણાવી દઈએ કે, આશ્રમ રોડ પર ટ્રાફિકની સમસ્યા હળવી કરવા બનાવાયેલા ઇન્કમટેક્સ બ્રિજ પર ભયજનક તિરાડો જોવા મળી છે. પ્રાપ્ત વિગતો અનુસાર બાટા સર્કલથી ઉસ્માનપુરા તરફ જતાં કાલુપુર બેંક પાસે બ્રિજના જોઈન્ટ એક્સપાન્શન તૂટી ગયા છે. તૂટેલા ભાગમાંથી બ્રિજની નીચે અવર જવર સ્પષ્ટ જોઈ શકાય તેવી મોટી ગેપ પડી ગઈ છે. બીજી તરફ, ઉસ્માનપુરાથી બાટા સર્કલ તરફ જતાં આયકર ભવન પાસે બ્રિજ પરના લોખંડના બોલ્ટ બહાર આવી ગયા છે. આ ઉઘાડા બોલ્ટના કારણે ગમે ત્યારે મોટો અકસ્માત થઈ શકે છે.

ઈન્કમટેક્સ બ્રિજ પરથી દિવસ-રાત હજારો વાહનો પસાર થાય છે. જોઈન્ટ એક્સપાન્શન તૂટવાના કારણે ટુ-વ્હીલરના ટાયર ફસાઈ જવાની શક્યતાએ વાહન ચાલક ફંગોળાઈ શકે છે. ચાલુ વાહને બોલ્ટ સાથે ટાયર અથડાવાથી વાહન સ્લિપ થવાનો પણ ભય રહે છે. રાત્રિના સમયે વિઝિબિલિટી ઓછી હોય ત્યારે આ ખાડા જીવલેણ સાબિત થઈ શકે છે. ત્યારે માત્ર 6 વર્ષમાં બ્રિજની આવી હાલત કેમ થઈ? આ સવાલ દરેક અમદાવાદીના મનમાં ઉઠી રહ્યા છે. કરોડો રૂપિયાના ટેક્સના પૈસાથી બનાવેલા પ્રોજેક્ટ્સમાં આટલી જલ્દી ક્ષતિઓ દેખાવી તે ભ્રષ્ટાચાર કે નબળા સુપરવિઝન તરફ આંગળી ચીંધી રહી છે.

AMCએ શું સ્પષ્ટતા કરી?

ઈન્કમટેક્સ ઓવર બ્રિજના જોઈન્ટ એક્સપાન્સનનો મામલો શહેરમાં ચર્ચાસ્પદ બનતાં એએમસીના સત્તાવાળાઓને સ્પષ્ટતા કરવાની ફરજ પડી હતી. તેઓએ પ્રેસનોટ ઈસ્યુ કરીને જણાવ્યું કે, બ્રિજના એક્સપાન્શન જોઇન્ટના બોલ્ટ ઢીલા થવાથી જોઇન્ટ ખૂલી ગયા છે. બ્રિજના સ્ટ્રક્ચરમાં ખામી નથી. લ એક્સપાન્શન જોઇન્ટના બોલ્ટ બદલવાની કામગીરી શરૂ કરવામાં આવી છે. રણજીત બિલ્ડકોન લિમિટેડની ગેરંટી પીરીયડ હેઠળ રિપેરીંગની કામગીરી કરવામાં આવી રહી છે. આ રિપેરીંગ કામગીરી રણજીત બિલ્ડકોનની જવાબદારી અને ખર્ચે કરવામાં આવશે.