વિશ્વામિત્રી નદીને અપવિત્ર કરી રહ્યું છે ખુદ કોર્પોરેશન, ભાજપના કોપોરેટરે જ ફોડ્યો ભાંડો

એક તરફ વડોદરા મહાનગરપાલિકા વિશ્વામિત્રી પ્રોજેક્ટના નામે કરોડોનું આંધણ કરી રહી છે તો બીજી તરફ વિશ્વામિત્રી નદીમાં ભયંકર રીતે પ્રદૂષણ ફેલાવાઇ રહ્યું છે. ખાનગી કંપનીઓ અને લોકો તો પ્રદૂષણ ફેલાવે જ છે પણ ખુદ કોર્પોરેશન જ વિશ્વામિત્રીને પ્રદૂષિત કરી રહી છે અને તેનો ભાંડો ખુદ શાસક પક્ષના ભાજપના કોર્પોરેટરે જ ફોડ્યો છે.

ભાજપના કોર્પોરેટર આશિષ જોશીએ વીડિયો જાહેર કરીને કોર્પોરેશન તંત્રને ઉઘાડુ પાડ્યું છે. બેશરમ કોર્પોરેશન તંત્રએ વિશ્વામિત્રીને અપવિત્ર કરી દીધી છે. ભાજપના કોર્પોરેટર આશિષ જોશીએ વીડિયો જાહેર કરીને જણાવ્યું છે કે અટલાદરા સુએઝ પપિંગ સ્ટેશનમાંથી અનટ્રીટેડ પાણી વિશ્વામિત્રી નદીમાં છોડવામાં આવી રહ્યું છે. તેમણે કોર્પોરેશનના વિશ્વામિત્રી પ્રોજેક્ટ પર સવાલો ઉઠાવ્યા છે. તેમણે કહ્યું કે અટલાદરા સુએઝ પપિંગ સ્ટેશનમાંથી રોજનું 50થી 60 એમએલડી ગંદુ અને અનટ્રીટેડ પાણી વિશ્વામિત્રીમાં છોડવામાં આવી રહ્યું છે. લોકોને વિશ્વામિત્રીને સ્વચ્છ રાખવાની સુફિયાણી સલાહો આપતું કોર્પોરેશન તંત્ર બિન્ધાસ્ત પોતે જ વિશ્વામિત્રીને અપવિત્ર કરી રહ્યું છે. 

 

કોર્પોરેશન તંત્રને વિશ્વામિત્રીની માટીમાં જ રસ છે પણ તેની પવિત્રતાની કંઇ જ પડી નથી. આ રીતે ગંદુ પાણી વિશ્વામિત્રીમાં છોડાતા મગર સહિતના જળચરોને પણ ગંભીર નુકશાન થઇ શકે છે. તંત્રને ઘોર બેદરકારી છતી થઇ છે. આશિષ જોશીએ તાત્કાલિક અસરથી આ ગંદુ પાણી બંધ કરવા કોર્પોરેશનમાં માગ કરી છે. 

 

 

ઉલ્લેખનિય છે કે કોર્પોરેટર આશિષ જોશી એ જ છે કે જેમણે પોતાના વિસ્તારના મહાનાળાની ફાઇ બાબતે કોર્પોરેશનની સામાન્ય સભામાં જ તત્કાલિન મ્યુનિ.કમિશનર દિલીપ રાણા સામે શિંગડા ભેરવ્યા હતા. તેમણે સામાન્ય સભામાં કમિશનરનો ઉધડો લઇ લીધો હતો. આશિષ જોશી હરણી બોટકાંડમાં પણ પીડિતોના પક્ષે રહીને તેમને ન્યાય મળે તે માટે પ્રયત્નો કરી રહ્યા છે અને તેઓ બોલકા હોવાના કારણે તાજેતરમાં જ તેમને શહેર ભાજપ તરફથી શો કોઝ નોટિસ પણ મળી હતી. હવે તેમણે કોર્પોરેશનના અધિકારીઓ અને કર્મચારીઓને નિશાને લીધા છે અને તેમની ઘોર બેદરકારી છતી કરી છે જેથી શહેર ભાજપમાં પણ ખળભળાટ મચી ગયો છે. 

આ પણ વાંચો--  ગુજરાતના આ શહેરમાં બની સૌથી મોટી ગર્લ્સ હોસ્ટેલ, મળશે ફાઈવ સ્ટાર જેવી સુવિધાઓ...

 સમાચાર મેળવવા આજે જ અમારી WAHTSAPP ચેનલ સાથે જોડાવ