રાજકોટ TRP ગેમઝોન અગ્નિકાંડ મામલે 4 આરોપીઓના જામીન નામંજૂર

રાજકોટ ટીઆરપી ગેમઝોન અગ્નિકાંડ મામલે 4 આરોપીઓના નિયમિત જામીન ગુજરાત હાઈકોર્ટે નામંજૂર કર્યા છે. TPO એમ.ડી.સાગઠીયા, પૂર્વ ચીફ ફાયર ઓફિસર ઈલેશ ખેર, ગેમઝોનના માલિક અશોકસિંહ જાડેજા અને કિરીટસિંહ જાડેજાના જામીન ફગાવી દેવામાં આવ્યા છે. જ્યારે ATP રાજેશ મકવાણા અને ગૌતમ જોષી તેમજ એન્જિનિયર જયદીપ ચૌધરીના જામીન મળ્યા છે.

ATP રાજેશ મકવાણા અને ગૌતમ જોષી તેમજ એન્જિનિયર જયદીપ ચૌધરીના જામીન મંજૂર

રાજકોટના કાલાવડ રોડ ઉપર TRP ગેમ ઝોનમાં 25 મે, 2024ના રોજ આગ લાગી હતી. આ ઘટનામાં 27 લોકોના મોત થયા હતા. ઘટના બાદ રાજ્ય સરકારે તાત્કાલિક એસઆઈટીની રચના કરી હતી. તપાસમાં મનપા, ફાયર, પોલીસ, માર્ગ અને મકાન વિભાગની બેદરકારી સામે આવી હતી. જ્યારે ગેમિંગ ઝોનના માલિકોને સૌથી મોટા ગુનેગાર ગણાવ્યા હતા. ત્યારબાદ ગેમિંગ ઝોનના માલિકો ઉપરાંત સરકારી કર્મચારીઓની બેદરકારી મામલે ધરપકડ કરવામાં આવી હતી. હાલ જેલમાં રહેલાં 7 આરોપીઓએ ગુજરાત હાઈકોર્ટમાં નિયમિત જામીન માટે અરજી કરી હતી. ગુજરાત હાઈકોર્ટે બંને પક્ષોની દલીલો સાંભળ્યા બાદ ટાઉન પ્લાનિંગ ઓફિસર એમ.ડી.સાગઠીયા, પૂર્વ ચીફ ફાયર ઓફિસર ઈલેશ ખેર, ગેનઝોનના માલિકો અશોકસિંહ જાડેજા અને કિરીટસિંહ જાડેજાના જામીન ફગાવી દીધા છે. જ્યારે મનપાના આસિસ્ટન્ટ ટાઉન પ્લાનિંગ ઓફિસર રાજેશ મકવાણા અને ગૌતમ જોષી તેમજ એન્જિનિયર જયદિપ ચૌધરીના જામીન મંજૂર કર્યા છે.