ગુજરાતમાં મેઘરાજાની તોફાની બેટિંગ

Gujarat Weather News Red Alert Orange Alert Heavy Rain: ગુજરાતમાં ચોમાસું હવે ધીમે-ધીમે સમગ્ર રાજ્યમાં પોતાનો વ્યાપ વધારી રહ્યું છે. દક્ષિણ ગુજરાતમાં સક્રિય થયા બાદ હવે ચોમાસાની સિસ્ટમ અન્ય વિસ્તારો તરફ આગળ વધી રહી છે. ભારતીય હવામાન વિભાગ (IMD)ની તાજી આગાહી અનુસાર આજે રાજ્યના અનેક જિલ્લાઓમાં ભારેથી અતિભારે વરસાદની શક્યતા વ્યક્ત કરવામાં આવી છે. પરિસ્થિતિને ધ્યાનમાં રાખીને બે જિલ્લામાં રેડ એલર્ટ, 10 જિલ્લામાં ઓરેન્જ એલર્ટ અને 10 જિલ્લામાં યલો એલર્ટ જાહેર કરવામાં આવ્યું છે.હવામાન વિભાગના જણાવ્યા મુજબ અરબી સમુદ્ર તરફથી સતત ભેજયુક્ત પવનો અને સક્રિય વરસાદી સિસ્ટમના કારણે આગામી કલાકોમાં અનેક વિસ્તારોમાં વરસાદનું જોર વધી શકે છે. નીચાણવાળા વિસ્તારોમાં પાણી ભરાવા, નદીઓ અને નાળાઓમાં પાણીની આવક વધવા તેમજ વાહનવ્યવહાર પર અસર થવાની શક્યતા હોવાથી લોકોને સાવચેત રહેવાની સલાહ આપવામાં આવી છે.

બે જિલ્લામાં રેડ એલર્ટ ,10 જિલ્લામાં ઓરેન્જ એલર્ટ
આજે જૂનાગઢ અને ગીર સોમનાથ જિલ્લામાં અતિભારે વરસાદની આગાહી સાથે રેડ એલર્ટ જાહેર કરવામાં આવ્યું છે. આ વિસ્તારોમાં ટૂંકા સમયમાં ખૂબ જ ભારે વરસાદ પડી શકે છે. સ્થાનિક વહીવટીતંત્રને પણ સતર્ક રહેવા અને જરૂરી સાવચેતીના પગલાં લેવા સૂચના આપવામાં આવી છે.હવામાન વિભાગે પોરબંદર, અમરેલી, ભાવનગર,આણંદ, સુરત, ભરુચ, નવસારી, વલસાડ, ડાંગ અને તાપી જિલ્લામાં ભારે વરસાદની આગાહી સાથે ઓરેન્જ એલર્ટ જાહેર કર્યું છે.આ જિલ્લાઓમાં કેટલાક વિસ્તારોમાં ગાજવીજ સાથે ભારે વરસાદ વરસી શકે છે. ખેડૂતો, પ્રવાસીઓ અને નદીકાંઠાના વિસ્તારોમાં રહેતા લોકોએ ખાસ સાવચેતી રાખવાની જરૂર છે.

10 જિલ્લામાં યલો એલર્ટ
રાજકોટ,બોટાદ, અમદાવાદ, ખેડા, મહીસાગર, વડોદરા, નર્મદા, છોટાઉદેપુર, પંચમહાલ અને દાહોદ જિલ્લામાં યલો એલર્ટ જાહેર કરવામાં આવ્યું છે.આ વિસ્તારોમાં હળવાથી મધ્યમ વરસાદ સાથે કેટલાક સ્થળોએ ભારે વરસાદના છૂટાછવાયા ઝાપટાં પડી શકે છે.

સુરતના પલસાણામાં સૌથી વધુ 8 ઇંચ વરસાદ
છેલ્લા 24 કલાકમાં સુરત જિલ્લાનો પલસાણા તાલુકો રાજ્યમાં સૌથી વધુ વરસાદ પડ્યો , જ્યાં 7.99 ઇંચ વરસાદ નોંધાયો છે. બારડોલીમાં 7.76 ઇંચ, વલસાડના ઉમરગામમાં 7.72 ઇંચ, સુરતના મહુવામાં 7.52 ઇંચ અને વાપીમાં 7.44 ઇંચ વરસાદ વરસ્યો છે. જૂનાગઢ જિલ્લાના માલિયા હાટીનામાં 7.20 ઇંચ અને સુરતના અંબિકા તાલુકામાં 6.46 ઇંચ વરસાદ નોંધાયો છે. ઉપરાંત ગીર સોમનાથના સુત્રાપાડામાં 5.34 ઇંચ અને જૂનાગઢના કેશોદમાં 5.20 ઇંચ વરસાદ ખાબકતા અનેક વિસ્તારોમાં પાણી ભરાવાની સ્થિતિ સર્જાઈ હતી અને જનજીવન પર પણ અસર જોવા મળી હતી.

સૌરાષ્ટ્રમાં મેઘરાજાની જોરદાર બેટિંગ
સૌરાષ્ટ્ર અને દક્ષિણ ગુજરાત ઉપરાંત રાજ્યના અન્ય વિસ્તારોમાં પણ સારો વરસાદ નોંધાયો છે. જૂનાગઢના માંગરોળમાં 4.76 ઇંચ, સુરતના ઉમરપાડામાં 4.72 ઇંચ, વલસાડના પારડીમાં 4.45 ઇંચ, ભેસાણમાં 4.21 ઇંચ અને તાપીના વાલોડમાં 4.02 ઇંચ વરસાદ પડ્યો હતો. રાજકોટના લોધીકા, ગોંડલ અને જામકંડોરણા, નવસારીના ગણદેવી, નવસારી શહેર, વાંસદા અને જલાલપોર સહિત અનેક તાલુકાઓમાં 2થી 3 ઇંચ સુધી વરસાદ નોંધાયો હતો. મધ્ય ગુજરાતમાં પણ અમદાવાદ, વડોદરા, છોટાઉદેપુર, પંચમહાલ અને દાહોદ સહિતના વિસ્તારોમાં વરસાદ વરસતા વાતાવરણમાં ઠંડક પ્રસરી હતી અને લોકોને ગરમીમાંથી રાહત મળી હતી.

ગીર સોમનાથ સહિત રાજ્યભરમાં મેઘમહેર 
ગીર સોમનાથ જિલ્લામાં ફરી એકવાર મેઘરાજાએ ધમાકેદાર ઇનિંગ શરૂ કરી છે. વેરાવળ અને સુત્રાપાડા પંથકમાં વરસાદનું જોર વધતા અનેક વિસ્તારોમાં વરસાદી માહોલ છવાઈ ગયો છે. સુત્રાપાડા ફાટક વિસ્તાર વરસાદી પાણીથી તરબતર બન્યો છે. ભારે વરસાદને પગલે માર્ગો પર પાણી ફરી વળતાં વાહનચાલકો અને સ્થાનિક લોકોને અવરજવરમાં મુશ્કેલીનો સામનો કરવો પડી રહ્યો છે. નીચાણવાળા વિસ્તારોમાં પાણી ભરાવાના દૃશ્યો સામે આવી રહ્યા છે.જ્યારે ગીર સોમનાથના સુત્રાપાડામાં ૪ ઇંચ વરસાદ નોંધાયો છે. 

અમદાવાદમાં આજે વરસાદી માહોલ
અમદાવાદમાં આજે લાંબા સમય બાદ આકાશમાં ઘેરા વાદળો છવાયેલા જોવા મળી રહ્યા છે. ગઈકાલે મોડી રાત્રે શહેરના કેટલાક વિસ્તારોમાં ઝરમર વરસાદ નોંધાયો હતો, જેના કારણે વાતાવરણમાં ઠંડક પ્રસરી હતી. આજે દિવસ દરમિયાન વરસાદની તીવ્રતા વધવાની શક્યતા હવામાન વિભાગે વ્યક્ત કરી છે. જો વરસાદ સક્રિય બનશે તો શહેરના અનેક વિસ્તારોમાં ટ્રાફિકની સમસ્યા અને નીચાણવાળા વિસ્તારોમાં પાણી ભરાવાની સ્થિતિ સર્જાઈ શકે છે.હવામાન નિષ્ણાતોના જણાવ્યા અનુસાર આગામી એકથી બે દિવસ સુધી ગુજરાતના દક્ષિણ, મધ્ય અને સૌરાષ્ટ્રના અનેક જિલ્લાઓમાં વરસાદી માહોલ યથાવત રહેવાની સંભાવના છે. ખાસ કરીને દરિયાકાંઠાના વિસ્તારોમાં પવનની ગતિ પણ વધી શકે છે. માછીમારોને સમુદ્રમાં જતાં પહેલાં સ્થાનિક તંત્ર અને હવામાન વિભાગની સૂચનાઓનું પાલન કરવાની સલાહ આપવામાં આવી છે.

7 જુલાઈ સુધી રાજ્યભરમાં વરસાદની આગાહી
હવામાન વિભાગે આગામી 7 જુલાઈ સુધી સમગ્ર ગુજરાતમાં વરસાદી માહોલ યથાવત રહેવાની આગાહી કરી છે. વિભાગના અનુમાન મુજબ દક્ષિણ ગુજરાત, મધ્ય ગુજરાત, સૌરાષ્ટ્ર અને ઉત્તર ગુજરાતના અનેક જિલ્લાઓમાં હળવાથી ભારે વરસાદ પડી શકે છે. આ ઉપરાંત રાજ્યના મહત્તમ તાપમાનમાં 2થી 4 ડિગ્રી સેલ્સિયસ સુધીનો ઘટાડો નોંધાઈ શકે છે. વરસાદના કારણે ગરમીમાં રાહત મળશે અને ત્યારબાદ તાપમાનમાં ખાસ કોઈ મોટો ફેરફાર થવાની શક્યતા નથી. વિભાગ દ્વારા જિલ્લાવાર રેડ, ઓરેન્જ અને યલો એલર્ટ પણ જાહેર કરવામાં આવ્યા છે. જ્યાં ભારે વરસાદની સંભાવના છે ત્યાં સ્થાનિક તંત્રને સાવચેત રહેવા સૂચના આપવામાં આવી છે અને નાગરિકોને પણ જરૂરી સાવચેતી રાખવાની સલાહ આપવામાં આવી છે.

ખેડૂતો માટે સારા સંકેત
રાજ્યમાં સક્રિય બનેલું ચોમાસું કૃષિ ક્ષેત્ર માટે ખૂબ જ મહત્વપૂર્ણ માનવામાં આવે છે. વરસાદના કારણે વાવણીને ગતિ મળશે અને જળાશયોમાં પાણીની આવક પણ વધશે. જોકે ભારે વરસાદની સંભાવના ધરાવતા વિસ્તારોમાં નદી-નાળાઓ અને નીચાણવાળા વિસ્તારોમાં પાણી ભરાવાની સ્થિતિ સર્જાઈ શકે છે. હવામાન વિભાગની આગાહી મુજબ આગામી દિવસોમાં વરસાદનું જોર યથાવત રહેવાની શક્યતા હોવાથી લોકોને બિનજરૂરી મુસાફરી ટાળવા, હવામાનની સત્તાવાર માહિતી પર નજર રાખવા અને સ્થાનિક તંત્રની સૂચનાઓનું પાલન કરવાની સલાહ આપવામાં આવી છે.