સ્વામિનારાયણ સંપ્રદાયના વધુ એક સાધુનો બફાટ

જલારામ બાપાને લઈને સ્વામિનારાયણ સંપ્રદાયના સંતના નિવેદનથી વિરપુર અને જલારામબાપા ભક્તોમાં જોવા મળેલો રોશ  હજુ શાંત પડ્યો નથી, ત્યાં બીજી બાજુ વધુ એક સ્વામીનારાયણ સંતનો નવો વિવાદ સામે આવ્યો છે. જેમાં આ સંપ્રદાયના એક સાધુએ ચારણબાઈ પર વિવાદાસ્પદ ટિપ્પણી કરી છે. આ વિડીયોમાં, સ્વામી કહે છે કે, સ્વામીનારાયણ ભગવાન ભક્તોનું દુઃખ દૂર કરવા ગયા હતા, ત્યારે તેમને કંઠી સાથે ચારણબાઈનો મંત્રેલો દોરો પહેરેલો જોવા મળ્યો હતો, જેના કારણે તેઓ ભક્તના દુખ દુર કર્યા વિના જ પાછા ફર્યા હતા.

શું હતી સમગ્ર ઘટના?

સ્વામિનારાયણ સંપ્રદાયના સ્વામી હરીકૃષ્ણ સ્વામીએ મોરબીના હળવદમાં એક કથા દરમિયાન આ બફાટ કર્યો હતો, જે બાદમાં સોશિયલ મીડિયા પર વાઈરલ થઈ ગયો. વિડીયોમાં, સ્વામી કહે છે કે, "જીવરાજભાઈ નામના એક ભક્ત બિમાર પડ્યા હતા. તેમની ગંભીર બીમારીના કારણે, જીવરાજભાઈએ સંતોને પ્રાર્થના કરી કે, 'સ્વામિનારાયણ ભગવાનને કહો કે, મને ધામમાં લઈ જાવ.' પરંતુ સંતોએ જવાબ આપ્યો, 'તમને ધામમાં જવાનો સમય નથી, તમારે અને તમારા દીકરા-દીકરીના પ્રસંગો કરવાના છે. તેથી, ભગવાન તમને સાજા કરશે, ધામમાં નહિ લઈ જાવ.'"

પછી જ્યારે સ્વામિનારાયણ ભગવાન ભક્ત જીાવરાજને દર્શન આપવા ગયા, ત્યારે તેમણે ચારણબાઈનો મંત્રેલો દોરો જેવો કંઠી પહેરેલા હતા. આ જોઈ ભગવાન ભક્તને દર્શન આપ્યા વિના સીધા તેના પરિવાર પાસે જઈને દર્શન આપ્યા અને તેમને કહ્યું કે, "હું તો ભક્તને દર્શન આપવા આવ્યો હતો, પરંતુ ગળામાં ચારણબાઈનો દોરો પહેરેલો હોવાથી હું પાછો ફર્યો."

આ સ્વામિનારાયણ સંપ્રદાયના સ્વામીના નિવેદનથી ચારણ સમુદાયમાં ભારે રોષ ફેલાય છે. સાથે જ આ પ્રકારના નિવેદનો કરવા માટે સ્વામીઓ પર લોકો આક્ષેપ કરી રહ્યા છે, કે તેઓ સનાતન ધર્મની લાગણીને ઠેસ પહોંચાડવા માંડ્યા છે.

જલારામ બાપા વિશે વિવાદિત ટિપ્પણી

આ પહેલાં, વડતાલ સ્વામિનારાયણ સંપ્રદાય સાથે સંકળાયેલા જ્ઞાનપ્રકાશ સ્વામી સુરતના અમરોલી ખાતેના સત્સંગમાં હાજરી આપ્યા હતા. જ્યાં તેમણે કહ્યું હતું કે, "જલારામ બાપાનો ઇતિહાસ ગુણાતિત સ્વામી સાથે જોડાય છે. ગુણાતિત સ્વામીએ જલારામ ભગતને આશિર્વાદ આપ્યા હતા. જલારામ બાપાએ સદાવ્રત માટે ગુણાતિત સ્વામી પાસે આશિર્વાદ માંગ્યા હતા, અને સ્વામીએ જલારામને આશિર્વાદ આપ્યા કે, 'તમારા ભંડાર કાયમ ભરાયેલા રહેશે.'"

આ તમામ નિવેદનો અને વિવાદોથી, સ્વામિનારાયણ સંપ્રદાયના અંદર અને બહારના લોકો વચ્ચે મોટા વિરોધ અને ચર્ચાઓ સર્જાઈ રહી છે.