અમદાવાદમાં AMTS બસે સર્જ્યો ભયાનક અકસ્માત

અમદાવાદના વ્યસ્ત ગોતા વિસ્તારમાં આજે સવારે કાળમુખી AMTS બસના ચાલકે પાયમાલી સર્જી હતી. બસની પૂરપાટ ઝડપ અને બેદરકારીને કારણે અનેક પરિવારોના માળા વિખેરાતા રહી ગયા છે. આ અકસ્માતે ફરી એકવાર શહેરના જાહેર પરિવહન અને રોડ સેફ્ટી સામે મોટા સવાલો ઉભા કર્યા છે.

અમદાવાદના ગોતા વિસ્તારમાં આવેલા ચાંદની હોમ ડેકોરેટરની સામે ત્રણ રસ્તા પાસે આજે સવારે એક ભયાનક અકસ્માતની ઘટના બની હતી. પૂરપાટ ઝડપે આવી રહેલી AMTS બસના ચાલકે સ્ટીયરિંગ પરથી કાબૂ ગુમાવ્યો હતો અને રસ્તા પર ઉભેલા ત્રણ અલગ-અલગ વાહનોને પોતાની અડફેટે લીધા હતા. ટક્કર એટલી પ્રચંડ હતી કે વાહનોના ફુરચા ઉડી ગયા હતા અને આસપાસના લોકોમાં નાસભાગ મચી ગઈ હતી.

પ્રત્યક્ષદર્શીઓના જણાવ્યા અનુસાર, એક ગ્રે કલરની ફોર-વ્હીલર રોડ ક્રોસ કરી રહી હોવાથી એક સ્કૂલવાન ચાલક ત્યાં ઉભો હતો. તેની બાજુમાં જ રિક્ષા અને સામેથી એક ટેમ્પો આવી રહ્યો હતો. બરાબર આ જ સમયે પાછળથી ધસમસતી આવેલી AMTS બસે સીધી જ સ્કૂલવાનને પાછળથી ટક્કર મારી હતી. આ ટક્કરના કારણે સ્કૂલવાન આગળ રહેલા ટેમ્પો અને રિક્ષા સાથે ભટકાયું હતું. આમ, એક સાથે ત્રણ વાહનો બસની અડફેટે આવ્યા હતા.

સદનસીબે બાળકો નહોતા, મોટી જાનહાનિ ટળી

આ અકસ્માતમાં સૌથી રાહતની વાત એ રહી કે જે સ્કૂલવાનને ટક્કર લાગી હતી, તેમાં તે સમયે કોઈ જ બાળક બેસેલું નહોતું. જો વાન બાળકોથી ભરેલી હોત, તો આ અકસ્માત મોટી કરૂણાંતિકામાં પરિણમી શક્યો હોત. બસની ટક્કરને કારણે વાન અને રિક્ષામાં બેઠેલા બે લોકોને ગંભીર ઇજાઓ પહોંચી હતી, જ્યારે ટેમ્પોમાં બેઠેલો વ્યક્તિ પણ અંદર જ ફંગોળાઈ ગયો હતો. ઇજાગ્રસ્તોને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે.

CCTV ફૂટેજ: એક્ટિવાચાલકનો પુનર્જન્મ

આ સમગ્ર અકસ્માતના સીસીટીવી ફૂટેજ સામે આવ્યા છે, જે અત્યંત ભયાનક છે. ફૂટેજમાં દેખાય છે કે AMTS બસ તેની નિર્ધારિત ગતિ કરતા ઘણી વધારે સ્પીડમાં હતી. આ ઘટનામાં એક એક્ટિવાચાલક નસીબનો બળિયો નીકળ્યો હતો. બસ ટકરાઈ તેના માત્ર ૧૦ સેકન્ડ પહેલા જ તે ત્યાંથી પસાર થવાની તૈયારીમાં હતો, પરંતુ તેણે સમયસૂચકતા વાપરી બ્રેક લગાવી દીધી હતી. જો તે બે સેકન્ડ પણ મોડો પડ્યો હોત, તો તે બસની નીચે કચડાઈ ગયો હોત.

ટ્રાફિક પોલીસની કાર્યવાહી

ઘટનાની જાણ થતા જ એ-ડિવિઝન ટ્રાફિક પોલીસનો કાફલો સ્થળ પર પહોંચી ગયો હતો. પોલીસે અકસ્માતગ્રસ્ત વાહનોને રોડ પરથી ખસેડી ટ્રાફિક ક્લિયર કરાવ્યો હતો. બસ ચાલકની ધરપકડ કરવા માટે તજવીજ હાથ ધરવામાં આવી છે. પોલીસ અત્યારે એ તપાસ કરી રહી છે કે શું બસની બ્રેક ફેલ થઈ હતી કે પછી ચાલકની ઘોર બેદરકારીને કારણે આ અકસ્માત સર્જાયો હતો.

અમદાવાદમાં AMTS અને BRTS બસો દ્વારા થતા અકસ્માતોની સંખ્યા સતત વધી રહી છે, જે નાગરિકોની સુરક્ષા માટે ચિંતાનો વિષય છે.