એસજી હાઈવે પર AMTS બસ ભડકે બળી

અમદાવાદના સૌથી વ્યસ્ત એવા એસ.જી. હાઈવે પર આજે સોમવારે સવારે એક મોટી હોનારત ટળી હતી. સોલા સિવિલ હોસ્પિટલ પાસે મુસાફરોથી ભરેલી AMTS બસમાં અચાનક ભીષણ આગ ફાટી નીકળતા અફરાતફરીનો માહોલ સર્જાયો હતો.

ગણતરીની મિનિટોમાં જ આખી બસ આગની લપેટમાં આવી ગઈ હતી અને આકાશમાં કાળા ધુમાડાના ગોટેગોટા છવાઈ ગયા હતા. સદનસીબે, ડ્રાઈવરની સતર્કતાને કારણે તમામ મુસાફરો સમયસર નીચે ઉતરી જતા મોટી જાનહાનિ ટળી છે.

ઘટનાની વિગતો મુજબ, બસ જ્યારે સોલા સિવિલ રોડ પરથી પસાર થઈ રહી હતી ત્યારે એન્જિનના ભાગમાંથી ધુમાડો નીકળતા ડ્રાઈવરે તુરંત બસ ઉભી રાખી હતી. જોતજોતામાં આગે વિકરાળ સ્વરૂપ ધારણ કર્યું હતું. ફાયર વિભાગની ટીમે તાત્કાલિક સ્થળ પર પહોંચી આગ પર કાબૂ મેળવ્યો હતો, પરંતુ ત્યાં સુધીમાં બસનો કચ્ચરઘાણ નીકળી ગયો હતો.

પ્રાથમિક રીતે શોર્ટ સર્કિટ કારણ માનવામાં આવે છે, પરંતુ કડકડતી ઠંડીમાં પણ બસોમાં આગ લાગવાની વધતી ઘટનાઓએ તંત્રની જાળવણી પર ગંભીર સવાલો ઉભા થયા છે. 

આશ્ચર્યની વાત એ છે કે, અમદાવાદમાં સમયાંતરે AMTS અને BRTS બસોમાં આગ લાગવાની ઘટનાઓ બને છે, છતાં સત્તાધીશો દ્વારા બસ ઓપરેટર કંપનીઓ સામે કોઈ કડક પગલાં લેવામાં આવતા નથી. દર વખતે અકસ્માત બાદ તપાસના નામે માત્ર ફોર્મલિટી કરવામાં આવે છે અને બસને ખસેડીને મામલો થાળે પાડી દેવાય છે.

શું તંત્ર કોઈ મોટી જાનહાનિની રાહ જોઈ રહ્યું છે? ટેકનિકલ ખામી છે કે મેન્ટેનન્સનો અભાવ, તે બાબતે તપાસ કરવામાં એએમટીએસ વિભાગની નિષ્ક્રિયતા સામે મુસાફરોમાં ભારે રોષ જોવા મળી રહ્યો છે.