અમરેલી લેટરકાંડ મામલે પ્રશ્ન પૂછનાર અને જવાબ આપનાર બંને વિધાનસભામાં ગેરહાજર

વડાપ્રધાન નરેન્દ્ર મોદી અને લોકસભા વિપક્ષના નેતા રાહુલ ગાંધીના ગુજરાત પ્રવાસને લઈ અમરેલી લેટરકાંડના પ્રશ્ને વિધાનસભામાં પ્રશ્ન પૂછનાર અને જવાબ આપનાર ગેરહાજર રહ્યા હતા. કોંગ્રેસનાં ધારાસભ્યોએ લેટરકાંડ મામલે રાજ્ય સરકારને ઘેરવા 10 જેટલાં પ્રશ્નો કરી જવાબ માગ્યો હતો. જો કે, બંને પક્ષના નેતાઓ ગેરહાજર રહેતાં લેટરકાંડ મામલે ચર્ચા નિરસ રહી હતી.

વિધાનસભામાં શુક્રવારે અમરેલી લેટરકાંડનો પ્રશ્ન પડઘાયો હતો. લેટરકાંડ મામલે સરકારને ઘેરવા વિપક્ષના ધારાસભ્યોએ અંદાજે 10 જેટલા પ્રશ્નો કર્યા હતા. તારાંકિત પ્રશ્નોત્તરીમાં પ્રશ્ન ક્રમાંક 5, 47,  58, 69, 70, 77 અને 79 પ્રશ્નમાં અમરેલી લેટરકાંડનો પ્રશ્ન પૂછવામાં આવ્યો હતો. જો કે, તે સમયે વિપક્ષના ધારાસભ્યો અને જવાબ આપનાર ગૃહ રાજ્યમંત્રી હર્ષ સંઘવી ગૃહમાં ગેરહાજર રહ્યા હતા.

ગૃહમાં તારાંકીત પ્રશ્નોત્તરીમાં  પ્રશ્ન પૂછવામાં આવ્યો હતો કે 31 જાન્યુઆરી 2025ની સ્થિતિએ અમરેલી જિલ્લામાં છેલ્લા છ માસમાં આક્ષેપો કરતા લેટરકાંડ બાબતે પોલીસ ફરિયાદ કયારે કરવામાં આવી છે. હાલની સ્થિતિએ લેટરકાંડમાં પોલીસ દ્વારા જવાબદાર શખ્સોની ક્યારે ધરપકડ કરવામાં આવી, હાલની સ્થિતિએ લેટરકાંડના પત્રની એફએસએલ તપાસ કરવામાં આવી છે કે કેમ?, જો હા તો એફએસએલના રિપોર્ટ અંતર્ગત સરકારે શું કાર્યવાહી કરી છે?

આ મામલે સરકારે જવાબ રજૂ કરીને કહ્યું કે 28 ડિસેમ્બર 2024ના રોજ ફરિયાદ નોંધવામાં આવી હતી. તે જ દિવસે ધરપકડ કરવામાં આવી હતી. જેની તપાસ હાલમાં ચાલુ છે. જ્યારે ધારાસભ્ય ડો તુષાર ચૌધરીના પ્રશ્નના જવાબમાં સરકારે જવાબ આપ્યો કે આ કેસમાં 4 શખ્સોની ધરપકડ કરી છે અને રાત્રિના સમયે મહિલાની ધરપકડ કરવામાં આવી નથી. જેના કારણે સરકારની કથની અને કરની બાબતે સવાલ ઉઠ્યા છે.

રાજ્ય સરકારે લેટરકાંડ મામલે ત્રણ પોલીસ અધિકારીઓની બદલી કરી છે. જેમાં અમરેલી LCB પીઆઈ એ.એમ. પટેલની કચ્છના ભુજ ખાતે, અમરેલી સાયબર ક્રાઇમના પીઆઈ એ.એમ.પરમારની વડોદરા શહેરમાં અને અમરેલી LCB પીએસઆઇ કુસુમ પરમારની બદલી વડોદરા ગ્રામ્ય ખાતે કરાઈ છે.

અમરેલીના લેટરકાંડ મામલે પોલીસની કામગીરી પર સવાલો ઉઠ્યા હતા. પાયલ ગોટી જેલથી બહાર આવી ત્યારે તેણીએ પોલીસ દ્વારા પટ્ટા મારવામાં આવ્યા હોવાના ગંભીર આક્ષેપ કર્યા હતા. પાયલ ગોટીના આક્ષેપને લઈ SITની રચના કરવામાં આવી છે. જેમાં DySP એ.જી.ગોહિલ, મહિલા પીઆઈ આઇ.જે. ગીડા, મહિલા પીએસઆઇ એચ.જે.બરવાડીયાનો સમાવેશ કરવામાં આવ્યો છે.