અમરેલી જિલ્લાના ધારી તાલુકાના ખીસરી ગામે એક લગ્ન પ્રસંગમાં સામાન્ય બોલાચાલીએ હિંસક સ્વરૂપ ધારણ કર્યું હતું. ભોજન સમારંભ દરમિયાન માત્ર રોટલી પીરસવા જેવી સામાન્ય બાબતે જાનૈયાઓ અને કન્યા પક્ષના લોકો વચ્ચે લોહિયાળ અથડામણ થઈ હતી, જેમાં અનેક લોકો ઈજાગ્રસ્ત થયા છે.
ભોજનના ટેબલ પર શરૂ થયેલો વિવાદ હિંસામાં પલટાયો :&nbsp;
ચક્કરગઢથી ખીસરી ગામે આવેલી જાનમાં લગ્ન વિધિ બાદ જમણવાર ચાલી રહ્યો હતો. આ સમયે પીરસવા બાબતે થયેલી બોલાચાલી ઉગ્ર બની હતી અને બંને પક્ષના લોકો લાકડીઓ તથા લોખંડના પાઈપો સાથે સામસામે આવી ગયા હતા. લગ્ન મંડપમાં અચાનક શરૂ થયેલી આ મારામારીને કારણે મહેમાનોમાં નાસભાગ મચી ગઈ હતી.
બોલેરો કાર વડે ટોળાને કચડવાનો પ્રયાસ :&nbsp;
આ હિંસા ત્યારે વધુ ભયાનક બની જ્યારે જાનમાં આવેલા કેટલાક શખ્સોએ પોતાની બોલેરો કાર ત્યાં હાજર લોકોના ટોળા પર ચઢાવી દેવાનો પ્રયાસ કર્યો હતો. આ જીવલેણ હુમલાના પ્રયાસને લીધે લગ્ન પ્રસંગમાં ભારે દહેશત ફેલાઈ ગઈ હતી. આ અથડામણમાં અંદાજે 15 લોકો ઈજાગ્રસ્ત થયા હતા, જેમાંથી બે વ્યક્તિઓની હાલત ગંભીર હોવાનું જણાતા તેમને વધુ સારવાર માટે અમરેલી સિવિલ હોસ્પિટલ ખસેડવામાં આવ્યા છે.
પોલીસ છાવણીમાં ફેરવાયું ગામ :&nbsp;
ઘટનાની ગંભીરતાને જોતા ધારી પોલીસનો કાફલો તાત્કાલિક ઘટનાસ્થળે દોડી ગયો હતો. હાલ ખીસરી ગામ અને હોસ્પિટલ પરિસરમાં ચુસ્ત પોલીસ બંદોબસ્ત ગોઠવી દેવામાં આવ્યો છે. પોલીસે હિંસામાં સામેલ શખ્સો વિરુદ્ધ ફરિયાદ નોંધવાની કાર્યવાહી હાથ ધરી છે. ખુશીના અવસરે થયેલી આ લડાઈએ સમગ્ર પંથકમાં ચકચાર મચાવી દીધી છે.

લગ્ન પ્રસંગે મારામારી

ધારીના ખીસરી ગામે જાનૈયા અને માંડવીયા સામસામે: બોલેરો કાર ચઢાવવાનો પ્રયાસ

January 27, 2026 | 13:40 IST