AMCનો અણઘડ વહિવટઃ રૂપિયા 9.31 કરોડના ખર્ચે વિવાદિત હાટકેશ્વર બ્રિજ તોડી પડાશે

અમદાવાદ મહાનગરપાલિકાના ભ્રષ્ટાચારનો પર્યાય બનેલા હાટકેશ્વર બ્રિજને અઢી વર્ષ બાદ તોડવાનો નિર્ણય લેવામાં આવ્યો છે. બ્રિજને તોડીને નવો બનાવવાના બદલે માત્ર તોડવાનો નિર્ણય કરાયો છે. રૂપિયા 9.31 કરોડનું ટેન્ડર બહાર પાડીને 21 દિવસમાં પ્રક્રિયા પૂર્ણ કરવાનું સ્ટેન્ડિંગ કમિટીના ચેરમેને કહ્યું છે. જ્યારે વિપક્ષના નેતાએ સત્તાધીશો સામે પ્રહાર કરતાં કહ્યું કે, 1 હજાર દિવસ બાદ માત્ર તોડવાનો નિર્ણય કરતાં નવો બ્રિજ બનાવવાનો શાસકપક્ષનો દાવો પોકળ સાબિત થયો છે. 

ગુજરાતના બહુચર્ચિત અમદાવાદના હાટકેશ્વર બ્રિજને તોડી પાડવા ટેન્ડર બહાર પાડવામાં આવ્યુ છે. સ્ટેન્ડિંગ કમિટીના ચેરમેન દેવાંગ દાણીએ કહ્યું કે, હાટકેશ્વર બ્રિજને તોડવા માટે રૂપિયા 9.31 કરોડનું ટેન્ડર બહાર પાડવામાં આવ્યુ છે. 21 દિવસમાં તમામ પ્રક્રિયા પૂર્ણ કરવામાં આવશે. સત્તાધીશોના નિર્ણય સામે વિપક્ષના નેતા શહેજાદખાન પઠાણે સવાલ ઉઠાવ્યા છે. તેમણે જણાવ્યુ કે, 1 હજાર દિવસ બાદ માત્ર બ્રિજ તોડવાનો નિર્ણય લેવાયો છે. બ્રિજ તોડીને નવો ક્યારે બનાવવામાં આવશે તે અંગે નિર્ણય કરાયો નથી. 40  કરોડના ખર્ચે બનાવાયેલો બ્રિજ 100 વર્ષ સુધી ચાલવો જોઈતો હતો. પરંતુ બ્રિજના નિર્માણમાં ભ્રષ્ટાચાર થતાં હલકી ગુણવત્તાના કારણે બે વર્ષમાં બ્રિજ તૂટી ગયો છે. બ્રિજના ભ્રષ્ટાચાર મામલે જવાબદાર ઉચ્ચ અધિકારીઓ સામે આજદિન સુધી કાર્યવાહી કરવામાં આવી નથી.

એએમસીના અધિકારીઓ અને કોન્ટ્રાક્ટરની મીલીભગતથી હાટકેશ્વર બ્રિજ હલકી ગુણવત્તાવાળો બન્યો હતો. બ્રિજને તોડી નવો બનાવવાનો ખર્ચ કોન્ટ્રાક્ટર પાસેથી વસૂલવામાં આવશે તેવું સત્તાધીશોએ જે તે સમયે જણાવ્યું હતું. કોન્ટ્રાક્ટરને વધારે પૈસા ચૂકવવા ન પડે તે માટે માત્ર તોડવાનો નિર્ણય કરાયો છે. પ્રજાના ટેક્સના 40 કરોડ રૂપિયાના ખર્ચે બનેલા હાટકેશ્વર બ્રિજને તોડવા માટે કોન્ટ્રાક્ટર પાસેથી માત્ર 10 કરોડ રૂપિયા વસૂલ કરાશે.

માર્ચ 2022માં તત્કાલિન મ્યુનિસિપલ કમિશનર એમ.થેન્નારેસન દ્વારા હાટકેશ્વર બ્રિજને તોડી પાડવાની જાહેરાત કરી હતી. ત્યારબાદ ચાર ટેન્ડર કરવામાં આવ્યા હતા. ત્રણ ટેન્ડરમાં કોઈ એજન્સી ક્વોલિફાય થઈ નહોતી. ચોથા ટેન્ડરમાં રાજસ્થાનની એજન્સી ક્વોલિફાય થઈ હતી. જો કે, રાજસ્થાનની એજન્સીએ વધુ ભાવ ભર્યા હોવાથી ટેન્ડર રદ કરાયુ હતું.

એએમસીના બ્રિજ પ્રોજેક્ટ વિભાગના ડેપ્યુટી કમિશનર મીરાંત પરીખે જણાવ્યું હતું કે, હાટકેશ્વર બ્રિજને તોડીને નવો બનાવવા માટેનું ટેન્ડર રદ કરવામાં આવ્યું છે. બ્રિજને હાલ પૂરતો તોડવાનો નિર્ણય કરી ટેન્ડર પ્રક્રિયા કરવામાં આવી છે. બ્રિજ તોડવાનો સંપૂર્ણ ખર્ચ કોન્ટ્રાક્ટર પાસેથી વસૂલ કરવામાં આવશે. જૂના કોન્ટ્રાક્ટરના જોખમે અને ખર્ચે હાટકેશ્વર બ્રિજને તોડીને નવો બનાવવામાં આવશે તેવો નિર્ણય કરાયો છે.

ઉલ્લેખનીય છે કે, રૂપિયા 42 કરોડના ખર્ચે હલકી ગુણવત્તાવાળો બનેલો હાટકેશ્વર બ્રિજ 3 વર્ષથી બંધ કરવામાં આવ્યો છે. વર્ષ 2014માં ટેન્ડર પ્રક્રિયા કરી વર્ષ 2015માં બ્રિજ બનાવવાની કામગીરી શરૂ કરાઈ હતી. જ્યારે વર્ષ 2017માં કામગીરી પૂર્ણ કરી નાગરિકો માટે બ્રિજ ખુલ્લો મૂકવામાં આવ્યો હતો. બ્રિજની ગુણવત્તાનો ખુલાસો થતાં કોન્ટ્રાક્ટરો સામે પોલીસ ફરિયાદ નોંધાવવામાં આવી હતી. મહેસાણાની અજય એન્જનિયરીંગ ઈન્ફ્રાસ્ટ્રક્ટચર તેમજ SGS ઇન્ડિયા પ્રા.લિના ડિરેક્ટરો, એન્જિનિયરો, મેનેજરિયલ માણસો સામે પોલીસ ફરિયાદ નોંધાઈ હતી.