અમદાવાદના રસ્તા બન્યા મોતનો માર્ગ

ચોમાસાની શરૂઆતથી ગણતરીના 70 દિવસમાં અમદાવાદમાં 12 નિર્દોષ નાગરિકોનાં મોત થયાં છે, જેનું સીધું કારણ અમદાવાદ મ્યુનિસિપલ કોર્પોરેશન (AMC)ની બેદરકારી અને નિષ્ક્રિયતા છે. સ્માર્ટ સિટીના નામે શણગારેલા આ શહેરમાં રસ્તાઓની દુર્દશા, ખાડકાઓ, ખુલ્લા વીજળીના તારો અને અપૂરતી સ્ટ્રીટ લાઇટિંગે નાગરિકોનો જીવ લેવાનું ચાલુ રાખ્યું છે. આ ઘટનાઓ છતાં, AMCના અધિકારીઓ કે સત્તાધીશો દ્વારા જવાબદારી નક્કી કરવામાં કે કાર્યવાહી કરવામાં સંપૂર્ણ નિષ્ફળતા જોવા મળી છે.

રસ્તાઓની દયનીય સ્થિતિ, નાગરિકોનો જીવ જોખમમાં

 દર વર્ષે AMC દ્વારા રસ્તાઓના નવીનીકરણ અને નિર્માણ માટે 1000 કરોડથી વધુનો ખર્ચ કરવામાં આવે છે. આમ છતાં, શહેરના રસ્તાઓ ગામડાઓ કરતાં પણ ખરાબ હાલતમાં છે. ઉબડખાબડ રસ્તાઓ, ખુલ્લા મેનહોલ, અને બંધ સ્ટ્રીટ લાઇટ્સે વાહનચાલકો અને રાહદારીઓ માટે જોખમો વધાર્યા છે. નાગરિકોનું કહેવું છે કે રસ્તા પર નીકળવું એટલે ભગવાન ભરોસે જીવન જોખમમાં મૂકવું.

મોતનો સિલસિલો: ચોંકાવનારી ઘટનાઓ

ચોમાસા દરમિયાન થયેલી કેટલીક મુખ્ય ઘટનાઓ આ પ્રમાણે છે

1. 16 જૂન 2025: ઘી-કાંટા વિસ્તારની દૂધવાળી પોળ પાસે વરસાદી પાણીમાંથી પસાર થતાં જશરાજ જગદીશ ગોહિલને AMCના ખુલ્લા વીજ તારથી કરંટ લાગતાં મોત થયું.
2. 19 જૂન 2025: નિકોલના મધુમાલતી આવાસ યોજનામાં બીમાર જીતુભાઈને હોસ્પિટલ લઈ જવા 108 એમ્બ્યુલન્સ ભરાયેલા પાણીને કારણે પહોંચી શકી નહીં. સાયકલ રિક્ષાથી હોસ્પિટલ લઈ જવાયા, પરંતુ સારવાર દરમિયાન તેમનું મોત થયું.
3. 30 જૂન 2025: ઓઢવના અંબિકાનગર પાસે ખારીકટ કેનાલમાં વરસાદી પાણીના પ્રવાહમાં તણાઈ જતાં મનુભાઈ પિતાંબરદાસ પંચાલનું મોત થયું. ફાયર વિભાગે 200 ફૂટ અંદર જઈ તેમનો મૃતદેહ બહાર કાઢ્યો.
4. 23 જુલાઈ 2025: ખોખરા સ્મશાનગૃહના નવીનીકરણ દરમિયાન ખાડામાં ભરાયેલા પાણીનો તાગ મેળવવા ઉતરેલા દીપક રાધેશ્યામ સેવતાનું મોત.
5. રાણીપ, બલોલનગર: સિમેન્ટ રોડ પરથી પસાર થતાં બાઇક પર પાછળ બેઠેલી વ્યક્તિ પડી જતાં મોત.
6. જમાલપુર: ડોર-ટુ-ડોર કચરાની ગાડીએ એક વ્યક્તિને 30 ફૂટ સુધી ઘસડતાં મોત.
7. જશોદાનગર: ગેરકાયદે બાંધકામના ડિમોલિશન દરમિયાન એક મહિલાએ આત્મવિલોપન કરી મોતને ભેટી.
8. સરખેજ, શકરી તળાવ: લીલ કાઢવા બોટ લઈ ગયેલા ત્રણ કિશોરોનું ડૂબી જવાથી મોત.
9. મટનગલી, નારોલ: વરસાદી પાણીમાં મોપેડ પર પસાર થતાં દંપતીને વીજ કરંટ લાગતાં મોત.

અધિકારીઓની નિષ્ક્રિયતા અને નાગરિકોનો રોષ

આ ઘટનાઓમાં AMCની બેદરકારી સ્પષ્ટ દેખાય છે, પરંતુ જવાબદાર અધિકારીઓ સામે કોઈ કડક કાર્યવાહી થઈ નથી. તપાસ સમિતિ બનાવવાની વાતો માત્ર કાગળ પર જ રહી છે. શહેરના 70 લાખથી વધુ નાગરિકો આવી બેદરકારીથી કંટાળી ગયા છે અને રોષ વ્યક્ત કરી રહ્યા છે. આગામી પાંચ મહિનામાં AMCની ચૂંટણીઓ આવવાની છે, પરંતુ હાલ નાગરિકો ભગવાન ભરોસે જીવન જોખમમાં મૂકી રસ્તાઓ પર નીકળી રહ્યા છે.

નાગરિકોની માંગ: જવાબદારી નક્કી કરો

નાગરિકો માંગ કરી રહ્યા છે કે AMC અધિકારીઓની જવાબદારી નક્કી કરી, તેમની સામે કડક કાર્યવાહી કરવામાં આવે. સ્માર્ટ સિટીના નામે થતા ખર્ચનો હિસાબ અને રસ્તાઓની ગુણવત્તાની તપાસ થવી જોઈએ. જો આવી ઘટનાઓ ન રોકાઈ, તો અમદાવાદના રસ્તાઓ ખરેખર ‘મોતનો કૂવો’ બની રહેશે.